Dastyš nie fantastyš + videa

Dastyš fantastyš (Dastiš fantastiš)

Biełaruś, 2010, kalarovy, 80 chv, na ruskaj movie

Režysior: Alaksandr Kananovič

Roli vykonvajuć: Alaksandr Kazeła, Maryja Vozba, Palina Syrkina, Siarhiej Žuraviel, Anastasija Špakoŭskaja, Mikałaj Kiryčenka, Aleh Harbuz, Uładzimir Mišančuk, Zoja Biełachvościk, Alaksiej Chackievič, Lavon Volski

Žanr: Kinaisteryka (ekscentryčnaja treš-kamiedyja pavodle scenaru Maryi Mažar)

Adznaka: 4 (z 10)

Viaskovy durań-Vańka adpraŭlajecca ŭ horad za spadčynaj pamierłaha dziadźki (Uładzimir Mišančuk). Ale ad spadčyny — adnyja zierniejki. Razzłavany Vańka vykidaje ich — a ranicaj vyrastajuć hrašovyja drevy. Šalonstva ŭ krainie durniaŭ pačynajecca.

Ružovy tank, što paluje za falšyvym murynam, pradadzienaja Nacyjanalnaja biblijateka (machlar — Aleh Harbuz), italjanskija mafijoźniki z klizmaj (sadamazachisckaja Anastasija Špakoŭskaja dyj Mikałaj Kiryčenka), čyrvonyja vałasy, naviaźlivaja dyrektarka turmy z dačkoj na vydańni. Na desiert – Lavon Volski z «Krambambulaju», hopnik Alaksiej Chackievič, hluki, šyza, isteryka.

Karcina — poŭnamietražny ihravy debiut Alaksandra Kananoviča, jakoha aŭtar hetych radkoŭ paśla dypłomnaje stužki «Koler kachańnia» — nazvaŭ biełaruskim Kusturycaj. Ad svaich słoŭ nie admaŭlajusia, ale siońnia biełaruski Kusturyca vyžłukciŭ 10 litraŭ samahonki i kastorkaju zakusiŭ. (Pjanka tyčycca ŭsioj zdymačnaj hrupy, zakuska — taja ž). «Anarchija — maci paradku!»

Za režysiorskim pultam zašmat Siarhieja Pataranskaha, jaki nie tolki prydumaŭ nazvu karciny (pazyčanuju z papularnaha niamieckaha kinažanru) — ale j staŭsia ideołaham stužki. I zamała ŭ filmie — stvaralnika Alaksandra Kananoviča.

Zašmat režysiorskaha raździaŭbajstva — i zamała lohkaści ŭ kadry.

Zašmat ahrarna-bahiemnaj tusovačnaści — i zamała žyvoj atmaśfiery.

Zamiest biełaruskaj «Čornaj kotki j biełaha kata» my bačym usiu tuju ž «Na śpinie ŭ čornaha kata» — tolki ź mienšym hłamuram i pafasam. «Biełaruśfilm» nie maje da hetaha filma nijakaha dačynieńnia,» — śćviardžałasia u rekłamnaj ulotcy. Na žal, maje.

Nat sama adviazny treš patrabuje chałodnaj hałavy, cyničnaha raźliku, intelektualnaha bahažu — i ŭnutranaje svabody. A kali tvorca vyrašaje apuścicca da ŭzroŭniu viaskovaha idyjota, što puskaje śluni na virtualnych pryhažuniaŭ, to atrymajecca «Das ist fantastisch!»

Jak ni dziŭna, hladzieć film nie nudna, chacia i soramna. Stužka znojdzie amataraŭ — u vuzkich tusovačnych kołach. Film vychodzić na DVD. Dla sučasnaha «Biełaruśfilmu» heta ŭžo zašmat.

Ale heta niedaravalna mała dla lepšaha vypusknika Michaiła Ptašuka — Alaksandra Kananoviča.

• 0
• 0
• 0
• 0
• 0
• 0
• 0
• 0