«Nakolki naša burbałka z pahardaj stavicca da zvyčajnych biełarusaŭ». U fejsbuku spračajucca pra Maksa Karža

U polskich miedyja pisali, što žychary Varšavy byli aburany niesankcyjanavanym schodam prychilnikaŭ biełaruskaha repiera, jakija pakinuli paśla siabie šmat śmiećcia i vielmi hučna siabie pavodzili.

Žurnalist Alaksandr Arsionaŭ z hetaj nahody napisaŭ u fejsbuku zvarot da palakaŭ.

«Darahija palaki! Jak biełarus, ja sa škadavańniem pryznaju, što Maks Korž — moj suajčyńnik, i siarod jaho prychilnikaŭ šmat maich suajčyńnikaŭ.

Mnie soramna za toje, jak pavodziać siabie jaho fanaty, i ja źbiantežany jaho niajomkimi vykazvańniami. Ja prašu vas zrazumieć, što prychilniki Karža nie pradstaŭlajuć uvieś biełaruski narod, hetak ža jak prychilniki dyska-poła nie pradstaŭlajuć uvieś polski narod.

Jaho pohlady na sens žyćcia i staŭleńnie da žančyn mnie čužyja, a časam i prosta adšturchvajuć. Adnak ź jaho tvorčaści možna zrabić vysnovu, što jon nie padtrymlivaje ni Łukašenku («Ciapło»), ni Pucina («Svoj dom»). Jamu ciažka farmulavać svaje dumki, i jak tolki jon vykazvajecca, jon robić heta vielmi aściarožna — mahčyma, praz strach represij suprać svaich blizkich u Biełarusi.

Maks Korž — dzicia svajho času. Čas, kali ŭ Biełarusi amal usio biełaruskaje zabaroniena, a Łukašenka naviazvaje biełarusam «ruski śviet». Maks Korž — jašče nie horšaje, što mahli prynieści takija časy. Heta nihilizm i žananianaviść, ale, prynamsi, nie pucinizm. Na ščaście, heta nie adziny biełaruski artyst, jaki vystupaje ŭ Polščy».

Antoś Žukaŭ z BYSOL nie zhodny z takoj pazicyjaj i adkazvaje ŭsim, chto ŭ fejsbuku niezadavoleny vykazvańniami Karža.

«Vy nie lubicie Karža ci ŭsio-taki nie lubicie biełarusaŭ?

U Varšavie prajšoŭ kancert hałoŭnaj biełaruskaj zorki — Maksa Karža. Na jaho sabrałasia kala 80 000 čałaviek. Paśla hetaha pačaŭsia sapraŭdny kašmar… u kamientaryjach demakratyčnaj tusovački ŭ Facebook.

Chtości vypisvaŭ Karža ź biełarusaŭ, chtości vybačaŭsia pierad palakami za fanataŭ artysta i jaho tvorčaść, chtości zasmučaŭsia, čamu heta Maksim nie staŭ zajmać ich pazicyju pa vajnie va Ukrainie i represijach u Biełarusi.

Možna hladzieć na heta jak na nieprymańnie samoha artysta, ale ja vam prapanuju pahladzieć hłybiej. Maks Korž — samy papularny artyst u historyi našaj krainy, i heta jak minimum matematyčny fakt. Ni adzin artyst u historyi Biełarusi nie źbiraŭ u Minsku poŭny stadyjon «Dynama». Ci moža heta być vypadkovaściu? Ci moža być vypadkovaściu toje, što vakoł artysta vyrasła cełaja subkultura, čymści padobnaja da futbolnych fanataŭ?

Moj adkaz — nie, heta nie vypadkovaść. Korž tranśluje tyja kaštoŭnaści, jakija vielmi blizkija «siaredniestatystyčnamu» biełarusu.

Miarkujcie sami: artystu nie padabajecca vajna, jon zaklikaje jaje spynić, ale nie śpiašajecca abvinavačvać Rasiju. (…)

Korž vychodzić razam ź miljonami biełarusaŭ na akcyi pratestu na samym piku, ale paźniej chavajecca ŭ bulbu i addaje pieravahu kazać pra svaju pazicyju tolki ŭskosna.

Ci nie padajecca vam, što pad usimi hetymi zajavami i dziejańniami padpisałasia b bolšaść biełarusaŭ u Biełarusi — u adroźnieńnie ad demakratyčnaj burbałki ŭ Facebook? Ci nie padajecca vam, što biełarusy bačać u hetym artyście, jaho tvorčaści, jaho vobrazie adlustravańnie svajho śvietapohladu, i mienavita tamu jon taki papularny?

Što jašče dobra padśviečvaje hetaja situacyja — dyk heta toje, nakolki naša burbałka zakampleksavanaja, adarvanaja ad realnaści i ź jakoj pahardaj jana stavicca da zvyčajnych biełarusaŭ, jakija nijak nie chočuć upisvacca ŭ ich ujaŭleńni pra «pravilnuju» biełaruskaść».

«Što ŭ vyniku? — praciahvaje Antoś. — Korž — heta idealny prykład «siaredniestatystyčnaha» biełarusa. Jaho pohlady na śviet i našu krainu rezanujuć z bolšaściu našych suajčyńnikaŭ. Maks — heta tvar sapraŭdnaj Biełarusi, jakaja moža vam padabacca ci nie, ale jana voś takaja.

I kali vy chiejcicie Korža, vy, pa sutnaści, pakazvajecie, nakolki vam nie padabajecca hety «narodziec».

• 28
• 3
• 3
• 30
• 2
• 0
• 2
• 0