Jaki Cichanoŭski bolš padabajecca Śviatłanie — Siarhiej-2020 ci Siarhiej-2025?
Śviatłana Cichanoŭskaja raskazała, jak ciapier vybudoŭvaje siamiejnyja adnosiny z mužam. «U mianie sustrečy, mnie treba kudyści jechać, a dla jaho heta ŭ takuju navinku. A jak? A ŭ kolki ty pryjdzieš?»
Zakranajučy pytańnie adnosin u siamji ŭ novym vypusku tok-šou «Žyćcio-malina», Śviatłana Cichanoŭskaja adznačyła, što niemahčyma paraŭnać ich siamiejnaje žyćcio da 2020 hoda i ciapier. Chacia možna pravieści niekatoryja paraleli:
«My jak tady redka bačylisia, tak i ciapier redka bačymsia. Tamu što tady jon pracavaŭ i dastatkova redka byvaŭ doma, a ciapier my pracujem aboje i prychodzim dadomu — i ja stomlenaja, i jon stomleny.
Ja pačynaju złavać, što tam posud nie pamyty, što mnie treba stanavicca jaho myć, a jon mnie choča ŭžo dapamahčy, čaho raniej taksama asabliva nie było».
Jak adznačaje Śviatłana, da 2020 hoda situacyja była inšaj:
«Ja była vielmi kłasičnaj žonkaj. I tak skłałasia našaje žyćcio, što ja była doma. Ja hladzieła dziaciej, jon šmat pracavaŭ, i heta było jak by naturalna [žoncy myć posud]».
Ciapier ža situacyja źmianiłasia: «Ciapier jon, bačačy, jak stamlajusia ja, jamu chočacca i dapamahčy, i jon taksama stomleny, jon hetaha nie choča rabić, ale razumieje, što mnie treba dapamahčy».
Śviatłana adznačaje, što razumieje nieabchodnaść vučycca nanava žyć razam u novych realijach:
«Raniej u nas nie było takoha, što ja zachacieła, pajšła kudyści. My, kali jon pryjazdžaŭ, my ŭvieś čas bavili razam. Ciapier u mianie sustrečy, mnie treba kudyści jechać.
A dla jaho heta ŭ takuju navinku. «A jak? A a katoraj ty pryjdzieš? A kudy ty jedzieš?» I voś jon adzin zastajecca na haspadarcy ź dziećmi. Nu heta takija niuansy».
Cichanoŭskaja ŭpeŭniena: «Kali jość u siamji pavaha i kachańnie, to heta takija drobnyja bytavyja ciažkaści, jany ŭsie pieraadolvajucca».
«Jon mianie ŭkałoŭ, što voś u ciabie pavucińnie. Ale ja dumaju, što heta takija fłešbeki ŭ jaho turemnaje žyćcio, kali za luby pył, za luboje pavucińnie jaho mahli pasadzić u ŠIZA. U jaho taki voś tryhier: «Voś u ciabie pavucińnie, vuń pył. A davaj ja prybiaru, davaj ja dapamahu», — pryvodzić prykład Śviatłana.
Na pytańnie, nakolki dapamahaje Siarhiej, ci staŭ jon myć padłohu, jana adkazała: «Pa-roznamu. Raźmiarkoŭvaje suvymierna. U kaho jość svabodny čas. Ale heta my robim razam. Heta raduje».
Pra hrošy
Zakranajučy materyjalnaje pytańnie, Śviatłana Cichanoŭskaja pryznajecca, što ciapier jany žyvuć na jaje hrošy:
«Ja jamu, zrazumieła, dapamahaju na pieršych etapach, tamu što dzie jon voźmie ich [hrošy]? (…) Tut taksama takija ciažkaści, što ŭ jaho niama dakumientaŭ, niemahčyma adkryć rachunak. Niejkija prychodziać danaty, i jon nie moža ich vyvieści. Viadoma, ja jamu dapamahaju [finansava na jaho hramadskuju dziejnaść]. Ja ŭ hetym ničoha nienaturalnaha nie baču, bo adkul u jaho hrošy?»
Što ž tyčycca novaj techniki Apple, jakoj ciapier karystajecca Siarhiej, to jaje, pa słovach Śviatłany, dapamoh nabyć «absalutna čužy čałaviek»:
«Kali ty metanakiravana chočaš pracavać na dobraj technicy i słuchać jakasnuju muzyku, nu voś jamu chočacca. I ja nie maju prava havaryć, što ty pavinien sabie kupić niešta praściejšaje, ściplejšaje, tamu što piać hadoŭ jon žyŭ bolš čym ścipła. Voś jamu chočacca. Kali łaska, kali ŭ ciabie jość takaja mahčymaść dla hetaha. Jon nie ŭziaŭ heta ź siamiejnaha biudžetu, čałaviek jamu dapamoh metanakiravana, kab jon zmoh sabie kupić».
Pa słovach Śviatłany, Siarhiej «kajfuje» ad muzyki, jakuju słuchaje praz nabytyja navušniki.
«Mnie tak padabajecca, što jon kajfuje, što jon pje kavu. Viedajecie, voś hetyja ŭsie dotyki, adčuvańni na słych, jamu chočacca nahnać, čaho nie było», — dzielicca Cichanoŭskaja.
Na pytańnie, jak Siarhiej ciapier usprymaje svajo zaležnaje stanovišča ad žonki, Śviatłana adkazvała:
«My heta nie abmiarkoŭvali, i ja dumaju, što dla jaho heta naturalna i dla mianie heta naturalna. Tut niama takoha, što ja zarabiła, i ja tabie niešta kuplaju, daju, utrymlivaju ciabie. Nie, tamu što heta vyhladała b vielmi dziŭna. Jak možna čałavieku, jaki tolki vyjšaŭ z turmy, adrazu mieć niejki svoj kapitał, svaje dachody?»
«Cichanoŭski 2020» vs «Cichanoŭski 2025»
To jakija ž pieramieny adbylisia ŭ Siarhieju Cichanoŭskim proci 2020 hoda, aproč vahi? Pa słovach Cichanoŭskaj, ciapier u Siarhieja «vielmi vialikaje zapatrabavańnie być u siamji»:
«Kali raniej heta byŭ biznes, heta byli siabry…. Viadoma, my pravodzili čas razam, jon pryjazdžaŭ i vioz nas na daču, i ŭvieś hety čas pryśviačaŭ nam, ale ciapier jon lubuju volnuju chvilinu — «dzieci, Śviatłana, voś razam». Pajeści, razam niekudy schadzić z synam. Razmovy takija praciahłyja.
Nu i čas byŭ inšy. Ab čym było z 10-hadovym dziciem pahavaryć tady? U jaho nikoli nie było času asabliva, a ciapier voś jamu treba heta. I znoŭ ža, chiba što nahaniać toje, što jon prapuściŭ, nahaniać toje, čaho nie było hetyja piać hadoŭ. Jamu voś prosta fizična nieabchodna abdymacca, jamu treba, kab my byli pobač, kab adčuvać nas».
Śviatłana pryznajecca, što «Cichanoŭski-2025» joj bolš padabajecca za «Cichanoŭskaha-2020».
«Jon usio ž taki byŭ davoli ehaistyčnym da 2020 hoda, a ciapier heta čałaviek, jaki nasamreč šanuje i mianie, i ludziej vakoł siabie, i razumieje, što bieź ludziej vakoł (my, ja kažu, heta nacyja, heta biełarusy) pa-pieršaje, i jon nie byŭ by na voli, i tyja pieramieny, jakija adbyvajucca z našaj krainaj, z našym unutranym stanam, jany taksama nie atrymalisia b. Tamu staŭ bolš šanavać atačeńnie».
Kamientary