Robiert Fica nazvaŭ chłuślivaj publikacyju, što jon nibyta kiepska vykazvaŭsia pra psichałahičny stan Trampa
Premjer-ministr Słavakii Robiert Fica zajaviŭ, što kateharyčna admaŭlaje publikacyju partała Politico, u jakoj śćviardžałasia, što jon nibyta nazvaŭ psichałahičny stan prezidenta ZŠA Donalda Trampa «šakujučym» i «niebiaśpiečnym». U Biełym domie hetuju infarmacyju taksama nazvali fejkam.
U dopisie ŭ sacsietcy X Fica napisaŭ, što Politico nibyta napisała chłuśniu pra jaho acenku sustrečy z Trampam na niefarmalnym samicie ES u Brusieli.
Pavodle słoŭ premjera Słavakii, nie było ni śviedkaŭ, ni publičnych vykazvańniaŭ, adnak heta nie pieraškodziła partału, jak jon śćviardžaje, raspaŭsiudzić chłuślivuju infarmacyju.
Słavacki premjer padkreśliŭ, što padčas samitu jon nie vystupaŭ i nie abmiarkoŭvaŭ svoj vizit u ZŠA ŭ niefarmalnych razmovach ź inšymi lidarami. Jon taksama adznačyŭ, što čakaŭ admieny pajezdki ŭ Złučanyja Štaty paśla svajho rezkaha vykazvańnia nakont situacyi ŭ Vieniesuele. Hetaha, adnak, nie adbyłosia, što, na dumku palityka, tolki pavyšaje značeńnie sustrečy z amierykanskim prezidentam.
Fica nahadaŭ, što paśla zatrymańnia vieniesuelskaha lidara Nikałasa Madura amierykanskimi vajskoŭcami 3 studzienia jon žorstka raskrytykavaŭ hetuju apieracyju, nazvaŭšy jaje napadam i «naftavaj avanturaj». Pry hetym jon padkreślivaŭ, što hatovy adstojvać svaju pazicyju navat koštam paharšeńnia adnosin z ZŠA.
Partał Politico Fica acharaktaryzavaŭ jak varoža nastrojeny, prabrusielski i libieralny, jaki, na jaho dumku, imkniecca padarvać kanstruktyŭnyja suviazi Słavakii ź inšymi krainami. Jon taksama zajaviŭ, što dla hetaha vydańnia suvierenitet, abarona nacyjanalnych intaresaŭ i ŭłasnaja dumka ličacca ledź nie złačynstvam.
Raniej Politico śćviardžaŭ, što padčas samitu ES 22 studzienia Fica nibyta raskazvaŭ inšym jeŭrapiejskim lidaram pra svajo ździŭleńnie stanam Trampa na sustrečy ŭ Fłarydzie. Vydańnie spasyłałasia na piać dypłamataŭ, jakija zajaŭlali, što słovy słavackaha premjera nasili vielmi niehatyŭny charaktar. Pry hetym nivodnaja z krynic nie prysutničała asabista pry tych razmovach.
U Vašynhtonie hetyja śćviardžeńni rašuča adchilili. Namieśnica pres-sakratarki Biełaha doma Anna Kieli nazvała materyjał Politico absalutna fejkavaj navinoj i padkreśliła, što sustreča Fica i Trampa ŭ Mar-a-Łaha 17 studzienia była kanstruktyŭnaj i prajšła ŭ pazityŭnaj atmaśfiery.
Sam partał adznačaŭ, što słovy, prypisanyja Fica, vyklikali rezanans jašče i tamu, što jon źjaŭlajecca adnym ź niamnohich jeŭrapiejskich lidaraŭ, jaki adkryta padtrymlivaje Trampa pa šerahu pytańniaŭ i nieadnarazova krytykavaŭ palityku Jeŭrasajuza.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»4
Kamientary