15 mietraŭ u dzień. Rasijskaja armija va Ukrainie ŭstanaviła antyrekord pa tempach prasoŭvańnia za 100 hadoŭ sučasnaj historyi vojnaŭ

Canoj hihanckich strat, jakija dasiahnuli ŭ siarednim 35 tysiač čałaviek u miesiac, hienierały Hienštaba RF zmahli ŭziać pad kantrol 0,8% terytoryi Ukrainy ŭ minułym hodzie (4831 kvadratnych kiłamietraŭ) i 0,6% — u 2024‑m (3604 kvadratnych kiłamietraŭ). Pry hetym na klučavych napramkach rasijski nastup akazaŭsia navat pavolniejšym za apieracyi Pieršaj suśvietnaj vajny, jakaja prasłaviłasia zaciažnymi akopnymi bajami biez prasoŭvańnia linii frontu.

Tak, nastup na Časaŭ Jar, jaki pačaŭsia ŭ lutym 2024 hoda, prasoŭvajecca z chutkaściu 15 mietraŭ u dzień, padličyli ŭ CSIS: za niapoŭnyja dva hady armija prajšła tolki 10 kiłamietraŭ i całkam uziać horad pad kantrol tak i nie zmahła.

Ruch na Kupiansk, jaki startavaŭ u listapadzie 2024 hoda, išoŭ z chutkaściu 23 mietry ŭ dzień. Apieracyja pa zachopie Pakroŭska, jakaja pačałasia ŭ lutym 2024 hoda paśla kryvavych bajoŭ za Aŭdziejeŭku, prasoŭvajecca z chutkaściu 70 mietraŭ u dzień. Prajšoŭšy 50 kiłamietraŭ za 2 hady, rasijskija vojski zaraz kantralujuć «bolšuju častku horada», adznačajuć ekśpierty CSIS.

Dla paraŭnańnia: padčas bitvy na Somie, jakaja ličycca adnoj z samych krovapralitnych bitvaŭ Pieršaj suśvietnaj, francuzskaja armija ruchałasia z chutkaściu 80 mietraŭ u dzień. A ŭ bitvie pry Beła Vud 1918 hoda, kali amierykanskija piechacincy spynili hiermanski nastup, chutkaść prasoŭvańnia składała 410 mietraŭ u dzień.

Mizernyja frantavyja zavajovy dalisia Rasii canoj strat, jakich nie niesła nivodnaja armija śvietu z časoŭ Druhoj suśvietnaj vajny, padkreślivaje CSIS: ź lutaha 2022 hoda pa śniežań 2025‑ha vojski stracili 1,2 miljona čałaviek, u tym liku da 325 tysiač — zabitymi. Straty USU ŭ centry aceńvajuć prykładna ŭ 600 tysiač čałaviek, u tym liku 140 tysiač zabitych.

Rasijskaja armija pakazała siabie «słaba», havorycca ŭ dakładzie: pa vynikach apošnich dvuch hadoŭ kampanii joj praktyčna niama čaho pakazać u jakaści novych terytaryjalnych zavajoŭ.

Pavialičyć

U pieršyja 5 tydniaŭ uvarvańnia rasijskija vojski ŭziali pad kantrol 115 tysiač kvadratnych kiłamietraŭ terytoryi Ukrainy. Ale ŭžo ŭ krasaviku 2022 hoda 35 tysiač kvadratnych kiłamietraŭ było stračana, a da listapada USU advajavali ŭ ahulnym liku 75 tysiač kvadratnych kiłamietraŭ. Ciapier armija RF kantraluje 120 tysiač kvadratnych kiłamietraŭ va Ukrainie, abo prykładna 20% jaje terytoryi (uklučajučy Krym, «DNR» i «ŁNR», jakija znachodzilisia pad kantrolem Maskvy da ŭvarvańnia). Niepasredna padčas «SVA» vojski zachapili 75 tysiač kvadratnych kiłamietraŭ, adznačajuć u CSIS.

Za 1394 dni niamiecka-savieckaj vajny Čyrvonaja armija dajšła da Bierlina, rasijskaja ž — ledź dasiahnuła Pakroŭska, raźmieščanaha za 500 km ad Kijeva. Hetyja vyniki, pišuć ekśpierty centra, «značna niedaciahvajuć da met kampanii», jakaja, jak śćviardžała dziaržprapahanda, skončycca padzieńniem Kijeva za try dni.

Zrešty, rasijskaja stratehija zaklučajecca ŭ vajnie na źniasileńnie, kanstatuje CSIS: Kreml hatovy pryniać vysokija straty ŭ nadziei ŭ kančatkovym vyniku ŭziać ukrainskuju armiju i hramadstva zmoram.

• 2
• 1
• 2
• 2
• 1
• 0
• 0
• 0