Dziaŭčynu zapisali ŭ darmajedy. Jana adkazała, što nie budzie pracavać, bo žanich zabiaśpiečvaje

U sacsietkach ciapier papularny trend Get Ready With Me («Padrychtujsia razam sa mnoj») — tam čałaviek (čaściej za ŭsio dziaŭčyna) pakazvaje, jak rychtujecca da niejkaj padziei: nanosić makijaž, vybiraje adzieńnie i adnačasova raskazvaje pra płany ci žyćcio.

Tema takoha roliku moža być lubaja: vobraz na pracu, spatkańnie, u vandroŭku, na špacyr ź siabroŭkami… Ale ŭ Biełarusi svaja śpiecyfika.

Dziaŭčyna z Bresta zapisała videa, jak farbujecca i apranajecca dla pachodu ŭ centr zaniataści «ŭ metach stymulavańnia pracazdolnych hramadzian da pracoŭnaj dziejnaści». Raniej u RAUS jana daviedałasia, što jaje paličyli darmajedkaj.

Pra toje, što da jaje dajšła čarha, maładaja biełaruska raspaviadaje spakojna. Niadaŭna pryhažuni patelefanavali ź nieznajomaha numaru.

— Mužčyna kaža: «Vam telefanujuć z RAUS». Ja navat nie dała jamu dahavaryć, bo na aŭtamacie padumała, što heta čarhovyja machlary. Ja takaja na pafasie kažu: «Aha», — i skidaju. Mnie adrazu znoŭ telefanujuć — ja skidaju.

U hety momant u dziaŭčyny źjaviłasia dumka, a što, kali sapraŭdy ź milicyi telefanujuć. Ale jana vyrašyła, što kali b było tak, dyk joj by chutčej za ŭsio dasłali niejkaje aficyjnaje paviedamleńnie. Tamu nastupnyja zvanki jana taksama praihnaravała.

@ms.loni5 #biełaruś #tuniejadcy #tuniejadcyrb #briest ♬ orihinalnyj zvuk - Ms.Loni

U chutkim časie patelefanavała ŭžo maci.

— Jana paprasiła terminova zapisać niejkaje proźvišča i adras, pakul jana nie zabyłasia — proźvišča śledčaha i adras RAUS.

Śledčy, jaki nie zmoh parazmaŭlać z samoj dziaŭčynaj, vyrašyŭ dahrukacca da jaje takim čynam.

— Jak skazała mama, mužčyna byŭ vielmi dobrazyčlivy, skazaŭ nie pužacca, bo ničoha drennaha nie adbyłosia. Jon spytaŭ u maci, ci pracuju ja niedzie, na što mama adkazała: «Nie, jaje zabiaśpiečvaje jaje žanich».

Mama dziaŭčyny navat paśmiajałasia sa śledčym z taho, jak u jaje atrymałasia tak dobra prystroić dačku.

— Śledčy skazaŭ, što mnie treba padyści ŭ paniadziełak da jaho i pastavić podpis u niejkim apaviaščeńni, što źjaŭlajecca farmalnaściu, tamu što ŭsio heta ŭ asnoŭnym nakiravana na ludziej, jakija viaduć asacyjalny ład žyćcia.

Dziaŭčyna pryznajecca, što pačała krychu chvalavacca:

— Bo kali pahladzieć videa ŭ tyktoku i instahramie na hetuju temu, dyk kožnamu druhomu pahražajuć aryštam dy štrafami.

Ale ŭsio abyšłosia.

— Ja, kali ščyra, čakała niejkaha žorstkaha dopytu, ale jon absalutna ničoha nie spytaŭ. Jon skazaŭ, što ŭžo parazmaŭlaŭ z majoj mamaj i aznajomleny z majoj situacyjaj. Adzinaje, spytaŭsia, ci źbirajusia ja bližejšym časam uładkoŭvacca na pracu. Ale spytaŭ heta z uśmieškaj, vidavočna viedajučy, što moj adkaz budzie «Nie».

Śledčy rastłumačyŭ, što na praciahu tydnia dziaŭčynie nieabchodna źjeździć u centr zaniataści. I dadaŭ, što heta tolki farmalnaść i nichto nie budzie prymušać pracavać.

Pavialičyć

U centry zaniataści dziaŭčyna prasiadzieła kala 40 chvilin u čarzie, bo ludziej chapała.

— Žančyna, da jakoj ja trapiła, była vielmi dobrazyčlivaja. Ja, kali ščyra, čakała tych samych złych ciotačak z rehistratury.

Błohierka raspaviała joj, što nie pracuje i nie vučycca, a zabiaśpiečvaje jaje kachany mužčyna.

— Jana z uśmieškaj pacikaviłasia, ci nieabchodna mnie dapamoha z pracaŭładkavańniem. Ja, kaniešnie, adkazała, što nie. Chvilin piać jana rabiła niešta ŭ kampjutary i paśla na advarotnym baku paviedamleńnia, ź jakim ja pryjšła, napisała, što ja źviarnułasia ŭ słužbu zaniataści, u sadziejničańni ŭ pracaŭładkavańni nie maju patreby.

Supracoŭnica centra paviedamiła, što paźniej RAUS buduć prasić u ich śpisy tych darmajedaŭ, jakija pryjšli.

Dziaŭčyna kaža, što nie hatovaja iści pracavać za 700 rubloŭ za miesiac, bo stolki tracić za tydzień.

— Kali b prapanavali chacia b 2000 za miesiac za pracu, jakaja nie paškodzić majmu zdaroŭju, i z narmalnym hrafikam, ja b jašče padumała. A tak… Niachaj sami pracujuć za takija hrošy.

• 13
• 1
• 31
• 11
• 1
• 0
• 3
• 1