Litoŭski deputat paskardziŭsia ŭ prakuraturu na Siarhieja Cichanoŭskaha
Pradstaŭnik Nacyjanalnaha abjadnańnia ŭ Siejmie Vitaŭtas Sinica źviarnuŭsia ŭ Hienprakuraturu, kab jana acaniła, ci nie parušajuć vykazvańni Siarhieja Cichanoŭskaha ab mahčymaściach stvareńnia ŭ Litvie biełaruskich aŭtanomnych astravoŭ pałažeńniaŭ Kryminalnaha kodeksa i pryncypaŭ terytaryjalnaj cełasnaści krainy, paviedamlaje Lietuvos Rytas.
«Cichanoŭskija nie asudžajuć litvinizm, zaklikajuć Siejm razam šukać histaryčnuju praŭdu pra Vialikaje Kniastva Litoŭskaje, byccam Litva jašče jaje nie znajšła, na svaich psieŭdapašpartach prysvojvajuć sabie simvał «Vicisa» («Pahoni»), krytykujuć abmiežavańni mihracyjnaj palityki i, u rešcie rešt, zahavaryli pra «astravy»,— zajaŭlaje V. Sinica.
Pavodle jaho, na fonie vajny va Ukrainie padobnyja prapanovy pavinny być acenieny asabliva surjozna, pakolki mienavita z takich dziejańniaŭ i pačałasia rasijskaja ahresija suprać Ukrainy.
«Sam S. Cichanoŭski niadaŭna publična zachaplaŭsia anieksijaj Kryma, ździejśnienaj Rasijaj. Tut niama apraŭdańniaŭ i navat niama dvuchsensoŭnaści. U Litvie ŭžo niekatory čas raźvivajecca svojeasablivaja alternatyŭnaja Biełaruś u vyhnańni, tolki S. Cichanoŭski adzin tak nieabačliva i adkryta heta nazvaŭ», — śćviardžaje deputat Siejma.
U zvarocie ŭ prakuraturu V. Sinica adznačaje, što častka 1 artykuła 121 Kryminalnaha kodeksa praduhledžvaje kryminalnuju adkaznaść dla tych, chto «udzielničaŭ u hrupie, jakaja maje metu niezakonnym sposabam źmianić kanstytucyjny ład Litoŭskaj dziaržavy, pasiahać na jaje niezaležnaść, parušyć terytaryjalnuju cełasnaść».
Raniej Sinica na hetym tydni źviarnuŭsia ŭ Ministerstva zamiežnych spraŭ Litvy z prośbaj ab skasavańni akredytacyi Ofisa Śviatłany Cichanoŭskaj. Hetuju akredytacyju ŭ 2021 hodzie nadaŭ tahačasny ministr zamiežnych spraŭ Habryelus Łandśbierhis.
U intervju prajektu «Žyćcio-malina» ŭ pačatku lipienia Siarhiej Cichanoŭski skazaŭ, što ŭ vypadku niaŭdačy źviaržeńnia režymu Alaksandra Łukašenki, biełarusy, jakija pakinuli radzimu, mahli b stvarać «astravy» z aŭtanomijaj.
«Ja chaču žyć u Biełarusi, u turmie šmat pra heta dumaŭ. Kali biełarusy nie zachočuć zmahacca, nie buduć vieryć mnie — niachaj vierać kamuści inšamu, hałoŭnaje, kab jany zmahalisia, kab heta dało vynik. Kali heta nie daje vyniku… Ja pačnu stvarać takija astravy. U Rasii była takaja niamieckaja aŭtanomnaja vobłaść, niešta padobnaje, była i jaŭrejskaja. My možam raźvivacca i tak. Kraina — heta ž ludzi», — havaryŭ były palitviazień.
Ale potym paśla rozhałasu ŭ litoŭskich ŚMI i navat kamientara prezidenta Hiatanasa Naŭsiedy były palitviazień rastłumačyŭ padrabiaźniej, što mieŭ tady na ŭvazie.
«Mnie škada, što mianie niapravilna zrazumieli. Nichto i nikoli nie budzie stvarać nijakich aŭtanomnych akruh i astraŭkoŭ u Litvie. Biełarusy biaźmierna ŭdziačnyja Litvie za haścinnaść, my pavažajem suvierenitet i terytaryjalnuju cełasnaść Litvy, — skazaŭ Siarhiej Cichanoŭski. — Ja zaklikaju biełarusaŭ praciahvać baraćbu z režymam Łukašenki. Nie zabyvać svaju movu i kulturu, mieć znosiny pamiž saboj, dapamahać adno adnamu. Naša zadača — viarnuć svaju krainu, a pakul my ŭ vyhnańni — nie stracić pamiž saboj suviaź.
Zrazumiejcie, ja pradprymalnik. I ja chacieŭ prapanavać biełarusam u ES stvaryć biznes-chaby, dla biełaruskich pradprymalnikaŭ, kab jany i ich siemji razmaŭlali pamiž saboj. Bo šmat talenavitych i kvalifikavanych śpiecyjalistaŭ pierajechali siudy praz represii. Ja i da 2020-ha dapamahaŭ ludziam, i ciapier — chaču im dapamahčy. Mienavita heta ja mieŭ na ŭvazie i pra heta kazaŭ bolš padrabiazna ŭ svaich papiarednich intervju.
Vitaŭtas Sinica — palitołah, fiłosaf i adziny ŭ Sojmie Litvy deputat ad nacyjanalistyčnaj partyi Nacyjanalnaje abjadnańnie. Partyja sabrała 2,93% hałasoŭ na vybarach 2024 hoda i pa partyjnych śpisach u parłamient nie prajšła, ale Sinica ŭ druhim tury pieramoh u vilenskaj akruzie Karaliniški-Zamačak svajho supiernika z partyi «Sajuz Ajčyny».
Ministr zamiežnych spraŭ Litvy zastupiŭsia za Ofis Cichanoŭskaj
Cichanoŭski paśla šumichi vakoł jaho słoŭ pra aŭtanomnyja «astravy» biełarusaŭ za miažoj patłumačyŭ svaju pazicyju
Litoŭskaje telebačańnie padkreśliła, što ni Cichanoŭskaja, ni jaje pres-sakratarka dahetul nie vałodajuć litoŭskaj movaj
Naŭsieda vykazaŭsia nakont idei Cichanoŭskaha pra aŭtanomnyja «astravy» biełarusaŭ u roznych krainach
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram20
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary