Cichanoŭski paśla šumichi vakoł jaho słoŭ pra aŭtanomnyja «astravy» biełarusaŭ za miažoj patłumačyŭ svaju pazicyju
Na słovy byłoha palitviaźni adreahavaŭ navat prezident Litvy.
U intervju prajektu «Žyćcio-malina» ŭ pačatku lipienia Siarhiej Cichanoŭski skazaŭ, što ŭ vypadku niaŭdačy źviaržeńnia režymu Alaksandra Łukašenki, biełarusy, jakija pakinuli radzimu, mahli b stvarać «astravy» z aŭtanomijaj.
«Ja chaču žyć u Biełarusi, u turmie šmat pra heta dumaŭ. Kali biełarusy nie zachočuć zmahacca, nie buduć vieryć mnie — niachaj vierać kamuści inšamu, hałoŭnaje, kab jany zmahalisia, kab heta dało vynik. Kali heta nie daje vyniku… Ja pačnu stvarać takija astravy. U Rasii była takaja niamieckaja aŭtanomnaja vobłaść, niešta padobnaje, była i jaŭrejskaja. My možam raźvivacca i tak. Kraina — heta ž ludzi», — havaryŭ były palitviazień.
Prezident Litvy Hitanas Naŭsieda na fonie dyskusij paśla hetych słoŭ zajaviŭ, što nikoli nie zhadzicca na stvareńnie aŭtanomij na terytoryi Litvy. Adnak jon adznačaje, što słovy Siarhieja Cichanoŭskaha, jaki vykazaŭ takuju ideju, nie varta ŭsprymać usurjoz.
Ciapier były palitviazień rastłumačyŭ padrabiaźniej, što mieŭ tady na ŭvazie.
«Mnie škada, što mianie niapravilna zrazumieli. Nichto i nikoli nie budzie stvarać nijakich aŭtanomnych akruh i astraŭkoŭ u Litvie. Biełarusy biaźmierna ŭdziačnyja Litvie za haścinnaść, my pavažajem suvierenitet i terytaryjalnuju cełasnaść Litvy, — skazaŭ Siarhiej Cichanoŭski. —
Ja zaklikaju biełarusaŭ praciahvać baraćbu z režymam Łukašenki. Nie zabyvać svaju movu i kulturu, mieć znosiny pamiž saboj, dapamahać adno adnamu. Naša zadača — viarnuć svaju krainu, a pakul my ŭ vyhnańni — nie stracić pamiž saboj suviaź.
Zrazumiejcie, ja pradprymalnik. I ja chacieŭ prapanavać biełarusam u ES stvaryć biznes-chaby, dla biełaruskich pradprymalnikaŭ, kab jany i ich siemji razmaŭlali pamiž saboj. Bo šmat talenavitych i kvalifikavanych śpiecyjalistaŭ pierajechali siudy praz represii. Ja i da 2020-ha dapamahaŭ ludziam, i ciapier —— chaču im dapamahčy. Mienavita heta ja mieŭ na ŭvazie i pra heta kazaŭ bolš padrabiazna ŭ svaich papiarednich intervju.
Biełarusy pavažajuć Litvu, i my biarom z vas prykład. I ja asabista skazaŭ prezidentu Naŭsiedzie i ministru zamiežnych spraŭ Budrysu, što ja budu ŭsio žyćcio ŭ daŭhu pierad Litvoj za toje, što vyratavali maich dziaciej. I pasprabuju pavodzić siabie tak, kab vy nie mahli znajści bolšaha siabra Litvy, čym ja.
Ja chaču padziakavać litoŭskamu narodu, litoŭskamu ŭradu, parłamientu, za toje što prymajecie biełarusaŭ, padtrymlivajecie našu baraćbu za svabodu. Ja časta kažu, nakolki Litva stała prykładam dla ŭsiaho śvietu: vaša pazicyja pa Ukrainie, i ŭ padtrymku Biełarusi — zasłuhoŭvaje vialikaj pavahi. Ja viedaju jak Litva sama zmahałasia za svaju svabodu, suprać kamunizmu, i vy viedajecie, jak doraha kaštuje svaboda. I ciapier vy dapamahajecie tym, chto zmahajecca za jaje. Paviercie — historyja i biełarusy hetaha nie zabuduć.
Biełarusy pavažajuć i zaŭsiody buduć pavažać vašu dziaržavu, vašu niezaležnaść, vašu kulturu i movu. Ja zaklikaju biełarusaŭ vučyć litoŭskuju movu, i sam źbirajusia zapisacca na kursy litoŭskaj.
Nichto nie śmieje zamachvacca na vaš suvierenitet. I ja razumieju, čamu heta tak važna. Litoŭskaja historyja — historyja pieramoh, historyja baraćby za svabodu. U nas, biełarusaŭ i ŭ litoŭcaŭ adzin ahulny vorah — režym Łukašenki i impieryjalistyčny režym Pucina. Davajcie padtrymlivać adno adnaho ŭ hetaj baraćbie».
Kamientary
Jašče relihija ŭniesła vielmi značnuju rolu ŭ zachavańnie, zhurtavańnie.