Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj
Biełaruskim pratestantam dazvolili pravieści biesprecedentny jevanhielizacyjny fiestyval u «Čyžoŭka-Arenie». Pa infarmacyi «Našaj Nivy», na jaho mohuć pryjechać Džon Koŭł i jahonaja žonka Hreta van Sasteren. Ci z hetaj nahody na svabodu vyjdzie jašče hrupa viaźniaŭ sumleńnia?
16‑17 maja biełaruskija pratestanty źbiarucca ŭ Minsku na «Fiestyval nadziei». Dla praviadzieńnia hetaha forumu ŭpieršyniu zhurtavalisia dźvie pratestanckija denaminacyi: chryścijanie viery jevanhielskaj i baptysty. Ułady dazvolili im arandavać «Čyžoŭka-Arenu». A hałoŭnym hościem budzie Franklin Hrem — viadomy baptyscki prapaviednik z ZŠA i syn kultavaha kazańnika Bili Hrema.
Franklin Hrem uznačalvaje dabračynny fond Samaritan's Purse. Jon upłyvovy ŭ ZŠA prapaviednik: jon nie raz sustrakaŭsia i z prezidentam Donaldam Trampam.
Padzieja budzie nastolki vialikaja, što adzin tolki chor, jaki śpiavaćmie na schodzie, budzie naličvać 1300 čałaviek.
Repietycyi vystupu ŭžo iduć, u chory buduć śpiavać biełarusy z 42 haradoŭ i viosak.
Akramia choru, abiacajuć roznych muzykaŭ, u tym liku z ZŠA.
28 krasavika byŭ vyzvaleny znakavy palitźniavoleny Andrej Pačobut. Śpiecpasłańnik prezidenta ZŠA pa Biełarusi Džon Koŭł u hety dzień znachodziŭsia ŭ stalicy Polščy Varšavie. Na pres-kanfierencyi ź ministram zamiežnych spraŭ Polščy Radasłavam Sikorskim jon raskazaŭ, što «praz dva-try tydni» znoŭ pajedzie ŭ Biełaruś.
Chutčej za ŭsio, novy pryjezd Džona Koŭła ŭ Minsk budzie prymierkavany mienavita da vialikaha pratestanckaha forumu.
Ale pry čym tut Koŭł? Reč u tym, što jaho žonka Hreta van Sasteren daŭno supracoŭničaje z fondam Samaritan's Purse i aśviatlaje jaho pracu jak žurnalistka. Franklin Hrem nie tolki ź joj znajomy, jon jašče i viedaje pra pracu Džona Koŭła pa vyzvaleńni biełaruskich palitviaźniaŭ: Hrem repościŭ videa, dzie Hreta abviaščaje pra adno z čarhovych masavych vyzvaleńniaŭ palitviaźniaŭ.
Hrem nazyvaje Koŭła svaim siabram. Jość fota Koŭła razam z žonkaj i Hremam u Alascy.
U śniežni Franklin Hrem, repościačy artykuł pra pieramovy Koŭła z Łukašenkam, pisaŭ: «Ja spadziajusia, što adnojčy zmahu prapaviedavać Jevanhielle ŭ Biełarusi».
Pa danych «Našaj Nivy», Hreta van Sasteren pryjedzie ŭ Biełaruś i na ciapierašni schod. Vyhladaje, što razam ź joj pryjedzie i Džon Koŭł. Mahčyma, razam z hetym adbuducca i novyja vyzvaleńni palitviaźniaŭ.
«Ja čakaju, što my zmožam dabicca vyzvaleńnia niekatorych źniavolenych najbližejšym miesiacam, — skazaŭ Džon Koŭł ahienctvu Reuters 28 krasavika. — I ja viarnusia, kab sadziejničać hetamu na praciahu nastupnaha miesiaca. Ničoha peŭnaha, ale, mabyć, u nastupnym miesiacy».
«Naša Niva» — bastyjon biełaruščyny
PADTRYMAĆCiapier čytajuć
«Kali pasadziać znoŭ, to pasiadžu». Pačobut pra svajo vyzvaleńnie, kamiery śmiarotnikaŭ, bitvu za honar u sudzie i žadańnie viarnucca4
Kamientary
bo amierykanskija fondy adličvajuć režymu hrošykb...