Hramadzianin Biełarusi nie moža zvolnicca z ukrainskaha vojska i atrymać hramadzianstva Ukrainy
Upaŭnavažanaja Prezidenta Ukrainy pa pytańniach abarony pravoŭ vajskoŭcaŭ Volha Rašaciłava razam z kalehami z Centralnaha ŭpraŭleńnia abarony pravoŭ vajskoŭcaŭ Ministerstva abarony źviarnulisia ŭ Hienieralny štab z prośbaj pravieści pravierku abstavin zaličeńnia adnaho hramadzianina Biełarusi i adnaho hramadzianina Rasii na słužbu va ŭkrainskim vojsku, piša «Radyjo Svaboda».
«Jašče ŭ 2022 hodzie mužčyny 1967 i 1981 hadoŭ naradžeńnia vyrašyli dałučycca da vojska, bo, jak sami kažuć, chacieli abaraniać krainu, na terytoryi jakoj žyli. Adnak zamiest kantraktaŭ z zamiežnikami ź imi padpisali kantrakty jak z hramadzianami Ukrainy. Ciapier abodva mužčyny, u pryvatnaści, nie mohuć zvolnicca z vojska, choć, zhodna z častkaj 5 artykuła 26 Zakona Ukrainy «Pra vajskovy abaviazak i vajskovuju słužbu», pavinny byli mieć na heta prava. Akramia taho, praz pamyłki, dapuščanyja ŭ pracesie zaličeńnia na vajskovuju słužbu, abodva nie mohuć atrymać ukrainskaje hramadzianstva», — havorycca ŭ paviedamleńni Upaŭnavažanaj prezidenta Ukrainy pa pytańniach abarony pravoŭ vajskoŭcaŭ.
Pavodle najaŭnaj infarmacyi, hramadzianie Rasii i Biełarusi słužać u adnoj z vajskovych čaściej terytaryjalnaj abarony Suchaputnych vojskaŭ Ukrainy.
U paviedamleńni adznačajecca, što Ministerstva abarony Ukrainy z studzienia pa červień 2025 hoda atrymała na haračuju liniju bolš za 20 skarhaŭ ad mabilizavanych inšaziemcaŭ i asob biez hramadzianstva.
Akramia pravierki, Volha Rašaciłava inicyjavała stvareńnie sumiesnaj z Hienieralnym štabam pracoŭnaj hrupy, jakaja budzie razhladać kožny vypadak i pracavać nad adpaviednymi źmienami ŭ narmatyŭna-pravavyja akty.
Hramadzianie Biełarusi vajujuć na baku Ukrainy z 2014 hoda, a paśla rasijskaha vajennaha ŭvarvańnia ŭ lutym 2022 hoda ich kolkaść pavialičyłasia. Jany słužać pavodle kantraktaŭ u roznych vajskovych častkach i farmiravańniach Uzbrojenych sił Ukrainy.
Viadoma, što, zmahajučysia na baku Ukrainy, zahinuli prynamsi 70 biełarusaŭ, ale dakładnaj statystyki nie isnuje. Imiony zahinułych nie zaŭsiody nazyvajuć, bo aścierahajucca pieraśledu ichnich svajakoŭ, jakija zastajucca ŭ Biełarusi.
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary
Biurokratičieskije ošibki proischodiat tolko tohda, kohda etoho chotiat.