Kampanii, jakija spadziavalisia zekanomić na ŠI, ciapier vydatkoŭvajuć značnyja hrošy na vypraŭleńni
Kampanii, što imknulisia skaracić vydatki praz zamienu supracoŭnikaŭ hienieratyŭnym ŠI, sutyknulisia z dadatkovymi tratami. Jak paviedamlaje BBC, siońnia źjaviŭsia asobny kłas śpiecyjalistaŭ — piśmieńnikaŭ i prahramistaŭ, jakija vypraŭlajuć pamyłki, dapuščanyja štučnym intelektam. I za svaju pracu jany atrymlivajuć dobryja hrošy. Surazmoŭcy vydańnia adznačajuć, što nie bajacca straty pracy praz raspaŭsiudžvańnie ŠI. Naadvarot — ciapier asnoŭnaja častka ich zaniataści źviazanaja z «fiksam» niedakładnaściaŭ, zroblenych technałohijaj.
Mnohija kampanii, jakija vyrašyli vykarystać hienieratyŭny štučny intelekt zamiest najmu śpiecyjalistaŭ, sutyknulisia ź niepradbačanymi vydatkami: ciapier im davodzicca płacić za vypraŭleńnie pamyłak, što dapuścili mašyny. Jak vynik, źjaviŭsia novy siehmient rynka — prafiesijanały, jakija redaktujuć teksty i kod, stvoranyja ŠI.
Sara Skid z Aryzony, jakaja pracuje mieniedžaram pa markietynhu, dadatkova zarablaje na vypraŭleńni tekstaŭ, napisanych hienieratyŭnym ŠI. U traŭni joj daviałosia pierarabić uvieś tekst dla sajta kampanii z haściničnaj śfiery — zamiest cikavych i pradajučych fraz ŠI stvaryŭ «zanadta banalny» tekst. Za 20 hadzin pracy jana atrymała $2000. Pa słovach Skid, šmat chto z kaleh užo zarablaje pieravažna na tym, kab «prybirać za ŠI».
Padobnyja prablemy z tekstami i kodam adznačajuć i inšyja. Safi Uorner ź Vialikabrytanii, saŭładalnica ličbavaj markietynhavaj ahiencyi, zaŭvažyła, što klijenty, raniej źviartalisia za dapamohaj pa sajtach, ciapier časta vykarystoŭvajuć ChatGPT. U vyniku na svaich sajtach jany ŭstaloŭvajuć niajakasny kod, što moža vyklikać zboi i pahrozy biaśpiecy. Adnamu ź jaje klijentaŭ takaja pamyłka kaštavała troch dzion prastoju biźniesu.
Pa słovach Uorner, jana ŭsio čaściej vymušanaja nie tolki vypraŭlać pamyłki, ale i tłumačyć klijentam, što navat «biaspłatnyja» instrumienty mohuć abyścisia doraha, kali nie razumieć ich miežaŭ.
Prafiesar Fen Li ź biźnies-škoły Bayes adznačaje, što niekatoryja firmy zanadta aptymistyčna staviacca da mahčymaściaŭ ŠI, ihnarujučy jaho abmiežavańni. Heta viadzie da nizkajakasnaha kantentu, zbojaŭ u sistemach i reputacyjnych strat. «Biez čałaviečaha kantrolu mahčymyja surjoznyja nastupstvy», — padkreślivaje jon.
U Indyi kapirajtar Kašyš Barat taksama pierarablaje anhłamoŭnyja teksty, stvoranyja AI, kab jany vyhladali bolš «čałaviečymi». Jana kaža, što klijenty pryvykli da chutkaści ŠI i čakajuć imhniennych vynikaŭ, ale «jakasnaje redahavańnie patrabuje času i myśleńnia, a nie prosta kampilacyi dadzienych».
«ŠI ŭjaŭlajecca chutkim i niedarahim rašeńniem, ale jon redka ŭličvaje ŭnikalnuju indyvidualnaść brenda, metavyja demahrafičnyja hrupy abo toje, što dyzajn pavinien pracavać na kanviersiju. Jon paprostu nie moža zamianić kaštoŭnuju čałaviečuju ekśpiertyzu i kantekst haliny», — havoryć Uornier.
Ciapier čytajuć
Były pamočnik Łukašenki Ihar Bryło pryznaŭ, što nabraŭ chabaraŭ na $2 miljony8
Kamientary