Prezident ZŠA Donald Tramp u paniadziełak abvieścić ab novym płanie pastavak uzbrajeńnia Ukrainie, i hety płan budzie ŭklučać nie tolki zienitnyja kompleksy, ale i nastupalnyja ŭzbrajeńni. Heta napisała vydańnie Axios, spasyłajučysia na ananimnych insajdaraŭ.
Dźvie krynicy skazali Axios, što ŭ ich jość padstavy ličyć, što hety płan budzie ŭklučać dalnabojnyja rakiety, jakija mohuć dasiahać celaŭ u hłybini terytoryi Rasii, uklučajučy Maskvu. «Praŭda, ni ŭ adnaho, ni ŭ druhoha nie było infarmacyi ab jakim-niebudź kančatkovym rašeńni» — piša Axios.
«Pucin vielmi razzłavaŭ Trampa. Jaho zajava budzie vielmi rašučaj», — cytuje vydańnie sienatara-respublikanca Lindsi Hrema.
Pavodle infarmacyi Axios, pra novy płan budzie abvieščana na sustrečy Trampa z hienieralnym sakratarom NATO Markam Rute.
Pry hetym pastaŭki amierykanskaha ŭzbrajeńnia Ukrainie buduć apłačvać jeŭrapiejskija sajuźniki. Taki miechanizm u červieni prapanoŭvaŭ na samicie NATO prezident Ukrainy Uładzimir Zialenski, a na minułym tydni pra jaho nahadaŭ Donald Tramp.
«My pašlem im «Petryjaty», u jakich jany adčajna majuć patreby, bo Pucin mnohich ździŭlaje. Jon hładka havoryć, a potym viečaram pačynaje ŭsich bambić. Ale tut jość maleńkaja prablemka: mnie heta nie padabajecca», — skazaŭ Tramp žurnalistam u niadzielu.
«My ŭ pryncypie źbirajemsia pasyłać im roznyja ŭzory vielmi składanaj vajennaj techniki. Jany [jeŭrapiejcy] buduć płacić 100%», — dadaŭ Tramp.
Kamientary