U Finlandyi zatrymali byłoha vahnieraŭca, jaki prasiŭ prytułku. Jon vajavaŭ u Bachmucie
Raniej hety Jaŭhien davaŭ intervju rasijskim prapahandystam i śćviardžaŭ, što dobraachvotna pajechaŭ vajavać u 2022 hodzie.
Na terytoryi Finlandyi zatrymali byłoha najmita rasijskaj pryvatnaj vajskovaj kampanii «Vahnier», jaki paprasiŭ prytułku ŭ krainie. Pra heta havorycca ŭ publikacyi Yle, paviedamlaje «Jeŭrapiejskaja praŭda».
Finskaja pamiežnaja słužba raniej paviedamlała pra mužčynu, jaki 17 červienia pierasiok miažu pablizu horada Kitei ŭ Paŭnočnaj Karelii. Pavodle infarmacyi Yle, paćvierdžanaj niekalkimi krynicami, mužčyna — rasijski vajskoviec Jaŭhien.
Mužčyna pierasiok finskuju miažu ŭ rajonie Vialivaara. Hety ŭčastak raźmieščany ŭ lasistaj miascovaści i nie pieraharodžany pamiežnym płotam.
Pavodle źviestak Yle, pamiežniki znajšli mužčynu dziakujučy spracoŭvańniu datčykaŭ i zatrymali jaho adrazu paśla pierasiačeńnia miažy.
Jon paprasiŭ u Finlandyi mižnarodnaj abarony i ciapier znachodzicca ŭ centry časovaha ŭtrymańnia.
Rasiejec publikavaŭ u sacsietkach fatahrafii i videazapisy, jakija paćviardžajuć jaho ŭdzieł u vajnie suprać Ukrainy. Na niekatorych z hetych materyjałaŭ bačnaja našyŭka «Vahniera» na jaho formie.
U intervju rasijskim prapahandysckim kanałam Jaŭhien raskazvaŭ pra bai va Ukrainie i śćviardžaŭ, što dobraachvotna ŭstupiŭ u vojski RF u 2022 hodzie, prajšoŭ padrychtoŭku ŭ składzie «Vahniera» i ŭdzielničaŭ u apieracyjach u Bachmucie.
U adnym ź intervju Jaŭhien raskazvaje, jak jahonaje padraździaleńnie źniščyła aŭtamabil z ukrainskimi vajskoŭcami ŭ Sielidavie.
Z vosieni 2024 hoda jon źnik z publičnaha pola, a ŭžo ŭ lutym 2025 hoda apublikavaŭ videa, u jakim rezka raskrytykavaŭ rasijskaje kamandavańnie.
30 červienia Jaŭhien znoŭ apublikavaŭ u sacsietcy «Ukantakcie» videa z krytykaj rasijskaha vajskovaha kiraŭnictva. Pa danych Yle, na momant publikacyi hetaha videa mužčyna ŭžo znachodziŭsia ŭ Finlandyi.
Centralnaja kryminalnaja palicyja pravodzić papiaredniuju pravierku ŭ dačynieńni da jaho. Padčas pravierki palicyja aceńvaje, ci jość padstavy dla pačatku kryminalnaha rasśledavańnia.
Na dadzieny momant finskija ŭłady nie padazrajuć Jaŭhiena ŭ ździajśnieńni vajennych złačynstvaŭ.
U sakaviku akruhovy sud Chielsinki pryznaŭ zasnavalnika i byłoha kamandzira vajskovaj hrupoŭki «Rusič» Voisłava Tordena (Jana Piatroŭskaha) vinavatym va ŭčynieńni vajennych złačynstvaŭ va Ukrainie i prysudziŭ jaho da pažyćciovaha źniavoleńnia.
U lutym minułaha hoda Tordena prysudzili ŭ Finlandyi da dvuch hadoŭ turemnaha źniavoleńnia za dvuchrazovaje parušeńnie zabarony na ŭjezd.
«Vahnier» zavierbavaŭ ludziej u Łondanie, kab tyja vykrali rasijskaha biznesmiena Čyčvarkina. Adzin ź ich pierapisvaŭsia z «Minsk KGB»
«Sa 100 šturmavikoŭ u žyvych zastalisia tolki 8». Vahnieraviec raskazaŭ pra maštab strat u bajach na miažy z Ukrainaj
U finskim sieryjale rasijanie vysadžvajuć desant z samalota «Biełavija». Što robiać Suomi?
Ciapier čytajuć
Biełarus-hruzčyk, jaki staŭ asabistym pamočnikam i davieranaj asobaj kiraŭnika rasijskaha Śbierbanka Hiermana Hrefa, sapraŭdy isnuje5
Kamientary
[Zredahavana]