Łuck, Žytomir i Ciarnopal byli ŭ epicentry ŭdaraŭ Rasii šachiedami i rakietami
Rasija ŭ noč na 9 lipienia ździejśniła vialikuju kambinavanuju ataku pa Ukrainie ŭdarnymi dronami, kryłatymi rakietami i aerabalistyčnymi «Kinžałami», paviedamlaje Bi-bi-si — Ukraina.
Pavodle źviestak Pavietranych sił, Rasija atakavała pieravažna zachad Ukrainy, u pryvatnaści najbolšaja pahroza była Łucku, Ciarnopalu i Žytomiru, šachiedy dasiahali Lvoŭščyny i Ivana-Frankoŭščyny.
Masiravanaja ataka praciahvałasia ŭsiu noč i pačałasia jašče poźnim viečaram 8 lipienia. Pavietranuju tryvohu pa ŭsioj krainie admianili kala 6-j ranicy, ale jana jašče praciahvałasia na Vałyni.
Jašče da poŭnačy va Ukrainu zalacieli sotni «šachiedaŭ», jakija praz centr Ukrainy, u tym liku i Kijeŭ, nakiroŭvalisia na zachodni napramak. U Kijevie ŭsiu noč było čutno huki pracy SPA i vybuchi, adnak pra razbureńni ŭłady nie paviedamlali.
Bližej da apoŭnačy rasijanie zapuścili pieršuju chvalu aerabalistyčnych «Kinžałaŭ», jakija atakavali Žytomir — manitorynhavyja telehram-kanały dapuskali, što ŭdar moh być pa avijabazie ŭ Aziornym.
«Šachiedy», pavodle źviestak Pavietranych sił, pieravažna ruchalisia na zachad, ale mahli atakavać Starakanstancinaŭ, dzie raźmieščanaja avijabaza. Častka nakiroŭvałasia ŭ bok Ciarnopala i Łucka.
Akramia «šachiedaŭ», pa Łucku taksama ŭdaryła druhaja chvala «Kinžałaŭ», jakija Rasija zapuściła amal a treciaj nočy.
Paźniej va Ukrainu zalacieła hrupa kryłatych rakiet z naziemnych puskavych ustanovak.
Mer Łucka Ihar Pališčuk amal usiu noč paviedamlaŭ pra ataku na horad «šachiedami», «kinžałami» i kryłatymi rakietami.
Poŭny adboj tryvohi pa ŭsioj Ukrainie abviaścili ŭžo paśla 6:17 ranicy.
Na hety momant infarmacyi pra zahinułych u vyniku varožaj ataki niama.
Kamientary