Pieraklučalniki padačy paliva byli adklučany pierad katastrofaj samalota Air India

Indyjskija ŭłady apublikavali papiarednija vysnovy rasśledavańnia katastrofy 12 červienia samalota Boeing 787 Dreamliner avijakampanii Air India, jaki vylecieŭ u Łondan z horada Achmiedabad i raźbiŭsia nieŭzabavie paśla ŭźlotu.

U dakładzie havorycca, što samalot adrazu pačaŭ stračvać ciahu i źnižacca, a piłoty razmaŭlali pra vyklučeńnie tumblera padačy paliva ŭ ruchaviki.

Rasśledavańnie zasiarodžana na dziejańniach ekipaža. U 15-staronkavym dakumiencie Indyjskaha biuro pa rasśledavańni avijacyjnych incydentaŭ skazana, što abodva pieraklučalniki padačy paliva nieŭzabavie paśla ŭźlotu byli pierastaŭleny z pazicyi «run» («pracuje») u «cut-off» («adklučana»). Zvyčajna hetyja tumblery vykarystoŭvajucca dla zapusku i spynieńnia ruchavikoŭ, kali samalot znachodzicca na ziamli. Pakolki padača paliva ŭ ruchaviki była pierakryta, jany stracili ciahu.

Amal adrazu paśla adryvu samalota ad ziamli, jak bačna na zapisach z kamier videanazirańnia, spracavała reziervovaja krynica enierhii, jakaja nazyvajecca turbinkaj nabiahajučaha pavietra, što śviedčyć pra stratu mahutnaści ruchavikoŭ.

Aŭtary dakłada pišuć, što na zapisie razmovy pamiž piłotami ŭ apošnija momanty palotu čuvać, jak adzin ź ich pytaje druhoha, čamu toj «nacisnuŭ cut-off». Druhi piłot adkazvaje, što jon hetaha nie rabiŭ, havorycca ŭ dakumiencie.

U dakładzie nie ŭdakładniajecca, chto ź piłotaŭ zadavaŭ pytańnie, a chto adkazvaŭ. Padčas uźlotu samalotam kiravaŭ druhi piłot, a kapitan sačyŭ za palotam.

Paśla hetaj razmovy pieraklučalniki byli viernuty ŭ pazicyju, u jakoj jany pavinny znachodzicca padčas palotu.

U dakładzie havorycca, što na momant padzieńnia samalota adzin ruchavik užo nabiraŭ ciahu, a druhi byŭ zapuščany, ale ciahu jašče nie nabiraŭ. Dakład stavić novyja pytańni nakont raźmiaščeńnia krytyčna važnych vyklučalnikaŭ padačy paliva, ale pry hetym miarkujecca, što Boeing i vytvorca ruchavikoŭ nie niasuć vidavočnaj adkaznaści za katastrofu, adznačaje ahienctva Reuters.

Aŭtary rasśledavańnia padkreślivajuć, što praca praciahvajecca, tamu kančatkovyja vysnovy pra pryčyny katastrofy rabić jašče rana.

«Na hetym etapie rasśledavańnia my nie možam rekamiendavać nijakich dziejańniaŭ apierataram i vytvorcam B787-8 (h.zn. samalota Boeing 787 Dreamliner) i/abo ruchavikoŭ GE GEnx-1B. Heta aznačaje, što nie było vyjaŭlena značnych niaspraŭnaściaŭ samalota ci jaho ruchavikoŭ», — havorycca ŭ rasśledavańni.

Samalot, jaki vykonvaŭ rejs AI171 u łondanski aeraport Hatvik pad kiraŭnictvam kapitana Sumita Sabcharvała i druhoha piłota Kłajva Kundara, vylecieŭ z zachodniaha indyjskaha horada Achmiedabad u čaćvier, 12 červienia, u 13:39 pa miascovym časie.

Łajnier raźbiŭsia mienš čym praz 40 siekund paśla ŭźlotu.

Zahinuli 260 čałaviek, u tym liku 241 čałaviek, što znachodziŭsia na borcie (adnamu pasažyru ŭdałosia vyžyć), a taksama ludzi na ziamli.

Kamandziram samalota Air India byŭ 56-hadovy Sumit Sabcharvał z ahulnym nalotam 15 638 hadzin, jaki, pavodle dadzienych urada Indyi, taksama byŭ instruktaram kampanii Air India. Druhim piłotam byŭ 32-hadovy Kłajv Kundar z ahulnym nalotam 3 403 hadziny.

U papiarednim dakładzie nie tłumačycca, jak tumblery mahli pieraklučycca ŭ pazicyju «cut-off» užo padčas palotu. Amierykanskija ekśpierty ŭ halinie avijabiaśpieki zajaŭlajuć, što piłot nie moh vypadkova pieraklučyć pieraklučalniki padačy paliva, adznačaje Reuters.

Pieraklučeńnie ŭ pazicyju «cut-off» praktyčna imhnienna hłušyć ruchaviki. Najčaściej heta vykarystoŭvajecca dla vyklučeńnia ruchavikoŭ u aeraporcie i ŭ niekatorych nadzvyčajnych situacyjach — naprykład, pry pažary ruchavika.

Amierykanski ekśpiert Entani Brykchaus ličyć, što klučavoje pytańnie zaklučajecca ŭ tym, čamu pieraklučalniki byli pieraklučany takim čynam: «Jany pieramiaścilisia sami ci z voli piłotaŭ? I kali jany byli pieraklučany z voli piłota, to čamu?»

Avijakampanija Air India zajaviła, što supracoŭničaje ź indyjskimi ŭładami, admoviŭšysia ad dalejšych kamientaryjaŭ.

• 0
• 0
• 0
• 0
• 0
• 0
• 0
• 0