Uładalnik «najmacniejšaj aŭry». Jak taniec na łodcy staŭ internet-siensacyjaj i hałoŭnym tancam leta
Hałoŭny taniec hetaha leta niečakana źjaviŭsia dziakujučy talisman u indaniezijskich vieślaroŭ — chłopčyku, jaki padčas spabornictvaŭ tančyć na nosie łodki. Čamu ŭvieś śviet vyvučaje jahonyja ruchi, a siarod prychilnikaŭ — zorki sportu, piša Bi-bi-si.
Padčas tradycyjnych spabornictvaŭ pa viesłavańni Pacu Jalur u Indaniezii na nosie łodak stajać chłopčyki, jakija rytmična ruchajucca. Ichniaja zadača — padtrymlivać bajavy duch kamandy i prynosić joj udaču.
Honki šmat stahodździaŭ byli łakalnaj padziejaj, ale na pačatku hetaha leta pra ich daviedalisia miljony ludziej z roznych krain.
Dziakujučy videa pad huki chita repiera Melly Mike, ruchi adnaho z maładych indaniezijcaŭ ciapier paŭtarajuć va ŭsim śviecie, a roliki ź im nabirajuć miljony prahladaŭ.
Kamientatary adznačajuć pryvabnaść i enierhičnaść indaniezijskaha tanca i iranizujuć, što ŭsia ich stužka zapoŭniena «tancami vieślaroŭ».
Chłopčyk, pavodle karystalnikaŭ, «viadzie siabie vielmi kruta» i «stvaraje aŭru». Jaho lohkija i niazmušanyja ruchi pryvablivajuć i natchniajuć.
Trend padchapili i viadomyja spartoŭcy: honščyk Formuły-1 Aleks Ałban, zorka amierykanskaha futboła Trevis Kiełsi i futbolnaja kamanda PSŽ.
Za ŭsim hetym staić 11-hadovy Rajan Arkan Dzicha, jaki raspavioŭ, jak źjavilisia virusnyja ruchi.
«Ja sam hety taniec prydumaŭ, — rastłumačyŭ chłopčyk u intervju BBC Indonesia. — Heta było absalutna spantanna».
Žyvie Rajan u vioscy ŭ pravincyi Kuantan Sinhinhi. Heta byŭ jaho debiut na nacyjanalnych honkach Pacu Jalur.
Na virusnym videa jon apranuty ŭ tradycyjnaje małajskaje adzieńnie i kapialuš.
Stojačy na nosie chutkasnaj łodki, jakoj kirujuć jak minimum 11 darosłych, jon niazmušana i rytmična ruchaje rukami — i ŭsio heta z absalutna kamiennym tvaram.
Videa z roznymi saŭndtrekami pad cheštehami #aura farming kid on boat i #boat race kid aura nabrali z kanca červienia miljony prahladaŭ u TikTok.
A sam Dzicha atrymaŭ mianušku «Žniec».
«Jaho tak nazyvajuć, bo jon nikoli nie prajhraje», — havorycca ŭ adnym z kamientaroŭ pad rolikam, jaki nabraŭ 1,1 miljona ŭpadabańniaŭ.
«Hety bro znosić supiernikaŭ svajoj aŭraj, jon prosta šalony», — śćviardžaje inšy.
Šmat karystalnikaŭ sprabujuć kapijavać jaho ruchi, publikujučy videa, dzie jany sami abo ich siabry paŭtarajuć taniec.
Nie adstajuć i spartyŭnyja kamandy.
1 lipienia francuzski futbolny kłub «Pary Sien-Žermien» vykłaŭ u TikTok rolik sa sprobaj paŭtaryć virusny taniec, padpisaŭšy jaho tak: «Jaho aŭra dajšła až da Paryža».
Za 10 dzion videa prahledzieli bolš za 7 miljonaŭ čałaviek.
Na nastupny dzień Trevis Kiełsi, hulec NFŁ i chłopiec pop-zorki Tejłar Śvift, vykłaŭ svaju viersiju, jakaja z taho času nabrała bolš za 14 miljonaŭ prahladaŭ.
U Indaniezii Pacu Jalur — nie prosta honki, a častka kultury i honaru krainy. Tradycyja padtrymlivajecca na dziaržaŭnym uzroŭni.
«Tancavać na nosie łodki — heta nie tak prosta, — patłumačyŭ žurnalistam ministr kultury Fadli Zon. — Treba trymać raŭnavahu i adnačasova matyvavać kamandu. Mahčyma, mienavita tamu vybirajuć dziaciej, a nie darosłych — bo im lahčej zachoŭvać raŭnavahu».
Ź im zhodnaja maci chłopčyka, Rani Rydavaci. «Najbolš my baimsia, što jon upadzie i trapić pad viosły», — skazała jana.
Ale dadała, što Rajan vielmi dobra płavaje, a kamanda ratavalnikaŭ zaŭsiody pobač.
Choć Rajan nie viedaje nikoha z zorak, jakija paŭtarajuć jaho taniec, sam jon imkliva stanovicca papularnym, asabliva ŭ rodnaj krainie.
Na minułym tydni hubiernatar pravincyi Ryjau, adkul chłopčyk rodam, nazvaŭ jaho pasłom kultury.
Na hetym tydni jaho z maci zaprasili ŭ stalicu Džakartu, kab sustrecca ź ministrami kultury i turyzmu krainy i vystupić na nacyjanalnym telebačańni.
Pavodle słoŭ Rajana, jon «ščaślivy», što jaho taniec zaŭvažyli va ŭsim śviecie.
«Kožny raz, kali siabry bačać mianie, jany kažuć: «Ty virusny»», — kaža jon, źziajučy saramlivaj uśmieškaj.
Jon maryć stać palicejskim, a tym, chto choča pajści jaho šlacham, raić: «Siabry, bieražycie zdaroŭje — i tady zmožacie stać takimi, jak ja».
Kamientary