Cana — užo nie klučavy faktar. Što adbyvajecca na rynku zaharadnaj nieruchomaści kala stalicy
Siaredzina leta — tradycyjny čas pavyšanaj aktyŭnaści na rynku zaharadnaj nieruchomaści. Pa słovach śpiecyjalistaŭ, siezon 2025 hoda nie staŭ vyklučeńniem. Pra hałoŭnyja tendencyja śpiecyjalisty pa nieruchomaści raskazali vydańniu Realt.
Asnoŭnyja pakupnickija zapyty zasiarodžvajucca vakoł dastupnych i hatovych da pražyvańnia abjektaŭ. Najbolšy popyt majuć dačy koštam da 20 tysiač dołaraŭ — zvyčajna heta siezonnyja domiki na pryrodzie.
Jašče adna hrupa, jakaja karystajecca asablivaj papularnaściu, — heta damy ŭ miežach 100—150 tysiač dołaraŭ, całkam hatovyja da zasialeńnia. Ludzi nie chočuć marnavać čas i srodki na budaŭnictva abo ramont, jany šukajuć varyjanty «zajezdžaj i žyvi».
Adznačajecca i vyrazny deficyt damoŭ z padviedzienymi kamunikacyjami (vada, kanalizacyja, elektryčnaść, pažadana haz) u košcie da 100 tysiač dołaraŭ. Takija abjekty asabliva cikavyja dla tych, chto šukaje pastajannaje miesca žycharstva, a nie tolki siezonny adpačynak.
Pryjarytet nabyvajuć damy i ŭčastki ŭ radyusie da 30 kiłamietraŭ ad Minska. Heta dazvalaje sumiaščać adnosny spakoj i mahčymaść chutka dabracca da horada.
Pa architekturnych pieravahach, papularnymi zastajucca adnapaviarchovyja damy ŭ styli šale z hazasilikatu ci kieramzitabietonu, płoščaj kala 150 m². Rastuć zapyty i na modulnyja kanstrukcyi, «barnchausy» i hatovyja rašeńni «pad kluč».
U paraŭnańni ź minułym hodam istotna skaraciłasia kolkaść ździełak ź niedabudavanymi damami. Heta źviazvajuć z novymi patrabavańniami: uładalnikam pry prodažy niezavieršanych budynkaŭ na pryvatnaj ziamli davodzicca vypłačvać dadatkovyja sumy, časta bolš vyhadna zaviaršyć budaŭnictva samastojna.
Na fonie rostu ipatečnych stavak popyt na kvatery krychu źniziŭsia, u toj čas jak cikavaść da zaharadnaj nieruchomaści zastałasia stabilnaj. Akramia taho, banki stali bolš achvotna kredytavać kuplu ziamielnych učastkaŭ, što taksama ŭpłyvaje na rynak.
Sa źnižeńniem cikavaści da letnikaŭ, nie prystasavanych da zimovaha pražyvańnia, pakupniki ŭsio čaściej vybirajuć abjekty, u jakich možna žyć kruhły hod.
Cikava, što cana ŭžo nie źjaŭlajecca hałoŭnym kryteryjem — pakupniki bolš uvažliva aceńvajuć kamfort, infrastrukturu, transpartnuju dastupnaść. Ludzi vybirajuć pa zručnaści: kab usio było hatova, kab była transpartnaja dastupnaść, narmalnyja susiedzi i nie pryjšłosia «ŭkładvacca biaskonca». Siońnia nieruchomaść za horadam pierastała być dačnym ekśpierymientam. Heta — śviadomy vybar dla žyćcia, kažuć ekśpierty.
Kamientary