Kurcy zastalisia pry svaich pravach — padviali vyniki abmierkavańnia zakonaprajekta
Kancern «Biełdziaržcharčpram» padvioŭ vyniki publičnaha abmierkavańnia prajekta zakona «Ab tytuniovaj syravinie, tytuniovych, nietytuniovych nikatynatrymalnych vyrabach, elektronnych sistemach kureńnia, vadkaściach dla ich, sistemach dla ŭžyvańnia tytuniu», piša Tochka.by.
Cikaviłasia idejami hramadzian z 17 pa 27 červienia 2025 hoda. Mahčyma było vykazać svaju dumku na sajcie «Pravavy forum Biełarusi». Usiaho pastupiła 75 paviedamleńniaŭ ad 36 karystalnikaŭ. U ich byli jak ahulnaja acenka zakonaprajekta, tak i kankretnyja prapanovy i zaŭvahi pa jaho dapracoŭcy.
Usie idei byli ŭvažliva vyvučanyja rabočaj hrupaj pa padrychtoŭcy kompleksnaha prajekta narmatyŭna‑pravavoha akta. Pieravažnaja bolšaść ź ich była adchilena.
Nie padtrymali členy rabočaj hrupy prapanovy ab nieabchodnaści poŭnaj zabarony vytvorčaści i abarotu nikacinaŭtrymalnych vyrabaŭ, vadkaściej, sistem u Biełarusi.
Taksama adchilili prapanovy ab admienie abaviazkovaha licenzavańnia vytvorčaści i abarotu nazvanych tavaraŭ. Nie stanuć źmiakčać i licenzijnyja patrabavańni da aptovaha handlu. Nie pašyrać skład asob, jakija majuć prava na impart, aptovy i roźničny handal takimi vyrabami.
Pa‑ŭsiamu vidać, nie źmienicca i źniešni vyhlad pačkaŭ cyharet i nikacinaŭtrymalnaj vadkaści. A prapanoŭvali pisać tam pra narkatyčny charaktar i śmiarotnuju niebiaśpieku ŭ vyniku ŭžyvańnia hetaj pradukcyi.
Ab prodažy pradukcyi i abmiežavańni miescaŭ dla kureńnia
Nie byli ŭličany rabočaj hrupaj pa padrychtoŭcy kompleksnaha prajekta zakona prapanovy ab abmiežavańniach abo zabaronach spažyvańnia vyrabaŭ, vadkaściej, sistem na bałkonach šmatpaviarchovych damoŭ, u niepasrednaj blizkaści ad ich u studyjach mienš za 20 m², u aŭtamabilach, pry najaŭnaści dziaciej da 18 hadoŭ, u tualetnych pakojach, raźmieščanych u hramadskich i vytvorčych budynkach.
Pa‑raniejšamu nie budzie zabarony na kureńnie ŭ hramadskich miescach i inšych łakacyjach masavaha skapleńnia ludziej na adkrytym pavietry.
Hetyja prapanovy adchilili z‑za składanaściaŭ u vyznačeńni terytaryjalnych miežaŭ i parušeńnia hramadzianskich pravoŭ uładalnikaŭ majomaści. Pa tych ža pryčynach nie ŭličyli prapanovy pra zabaronu prodažu vyrabaŭ, vadkaściej, sistem:
- bližej, čym za 5 km ad susiedniaj škoły
- u kijoskach, kramach płoščaj mienš za 100 m²
- na adlehłaści bližej 1 km ad ustanoŭ adukacyi, spartyŭnych abjektaŭ, sacyjalnych prytułkaŭ dla dziaciej, dziciačych balnic.
Kamientary