Hrecyja abviaściła časovuju zabaronu na prytułak dla ŭciekačoŭ z Afryki — zamiest hetaha buduć adrazu adpraŭlać u turmu
Premjer-ministr Hrecyi Kiryjakas Micatakis pastanaviŭ, što ŭciekačy z Paŭnočnaj Afryki časova nie buduć prachodzić praceduru pradastaŭleńnia prytułku. Ich płanujuć adpraŭlać u novuju turmu na Krycie, piša Bild.
Pa danych hrečaskich uładaŭ, z pačatku hoda bolš za 10 000 nielehalnych mihrantaŭ prybyli na turystyčny vostraŭ Kryt z Paŭnočnaj Afryki praź Mižziemnaje mora. Heta rost na 350% u paraŭnańni ź minułym hodam. U apošnija dni štodnia prybyvała kala 500 čałaviek.
«Va ŭmovach rezkaha rostu nielehalnych prybyćciaŭ marskim šlacham z Paŭnočnaj Afryki, asabliva ź Livii na Kryt, my pryniali ciažkaje, ale absalutna nieabchodnaje rašeńnie časova prypynić razhlad zajavak na prytułak dla asob, jakija prybyvajuć marskim šlacham z paŭnočnaafrykanskich krain», — skazaŭ Micatakis.
Heta aznačaje, što ich buduć ličyć nielehalnymi pierasialencami i adpraŭlać u turmu. Pakolki na Krycie pakul niama takoj turmy dla mihrantaŭ, zaraz nieabchodna pabudavać novuju — i, pa zajavie ŭładaŭ, pry nieabchodnaści navat dźvie.
Bolšaść biežancaŭ adpłyvajuć z uźbiarežža Livii. Ciapier hetaja paŭnočnaafrykanskaja kraina znachodzicca ŭ stanie kanfliktu: bolšaja častka ŭźbiarežža kantralujecca lidaram paŭstancaŭ Chalifaj Chaftaram, jaki padtrymlivaje suviazi z Rasijaj i maskoŭskimi najmitami. Mienšaja častka znachodzicca pad kantrolem aficyjnaha ŭrada ŭ Trypali.
Micatakis, pry hetym, prapanuje dapamohu abodvum bakam: «My hatovyja ciesna supracoŭničać ź livijskimi ŭładami, kab spynić adpraŭleńni».
Ale premjer-ministr Hrecyi taksama padkreślivaje, što Hrecyja adna nie spravicca z kryzisam na Krycie:
«Nam taksama patrebny ahulny jeŭrapiejski adkaz. Hrecyja zastajecca prychilnaj spraviadlivaj i efiektyŭnaj mihracyjnaj palitycy, uklučajučy lehalnyja šlachi mihracyi — ale biahučaja situacyja patrabuje nieadkładnych dziejańniaŭ. I heta adkaznaść nie tolki Hrecyi, ale i ŭsioj Jeŭropy».
Ciapier čytajuć
U Biełarusi množacca placoŭki dla tancaŭ na śviežym pavietry — pahladzicie, jak adpalvajuć razam moładź i piensijaniery ŭ Sierabrancy7
Kamientary