Cimanoŭskaja raskazała, što atrymlivaje ŭ Varšavie jak spartoŭka 700 jeŭra ŭ miesiac
«Hrošaj sa stypiendyj nie chapaje, kab pakryć košt arendy kvatery».
Biełaruskaja lohkaatleka raskazała WP SportoweFakty pra svajo finansavaje stanovišča.
«Hrošaj sa stypiendyj nie chapaje, kab pakryć košt arendy kvatery. Na ščaście, ad kłuba ja atrymlivaju dapłaty na abiedy. Časam u mianie byvajuć nievialikija rekłamnyja supracoŭnictvy, dziakujučy jakim ja mahu praciahvać karjeru», — kaža Kryścina Cimanoŭskaja.
29‑hadovaja sprynterka nie chavaje, što žyćcio ŭ Varšavie dla jaje — vialikaje vyprabavańnie. Ciapier jana atrymlivaje tolki nievialikija stypiendyi ad horada i Polskaj asacyjacyi lohkaj atletyki.
«Heta mienš za try tysiačy złotych u miesiac (kala 700 jeŭra. — NN)», — pryznajecca jana.
Jak padkreślivaje spartsmienka, klučavoj krynicaj dadatkovaha dachodu stali sacyjalnyja sietki.
«Mianie ratuje Instagram. Bieź jaho ja b, mahčyma, nie zmahła praciahvać karjeru. U mianie niama nijakich źbieražeńniaŭ paśla taho, jak usio, što ja mieła, zabraŭ moj były partnior», — kaža jana pra byłoha muža Arsienija Zdanieviča.
Sprynterka admoviłasia ad dadatkovych zaniatkaŭ i całkam pryśviaciła siabie treniroŭkam. Jana razumieje, što času na dasiahnieńnie metaŭ zastałosia niašmat.
«U hetym hodzie mnie spoŭnicca 30 hadoŭ, i ja ŭśviadomiła, što ŭ mianie zastałosia maksimum dva, moža try hady prafiesijnaha biehu. Ja pajšła na maksimalnuju ryzyku i admoviłasia ad bolš kamfortnaha žyćcia», — padkreślivaje jana.
Jaje hałoŭnaja meta — palapšeńnie asabistaha rekordu na dystancyi 200 mietraŭ.
«U majoj hałavie ŭžo šmat hadoŭ jość vynik 22.50 siekundy. Heta majo samaje vialikaje žyćciovaje žadańnie, navat apantanaść», — zakančvaje Kryścina.
Nahadajem, što piać hadoŭ tamu vakoł Kryściny Cimanoŭskaj na Alimpijadzie Tokia vybuchnuŭ skandał.
Jana admoviłasia biehčy ŭ niaprofilnaj estafiecie 4 pa 400 mietraŭ i skazała, što aficyjnaja biełaruskaja delehacyja sprabavała prymusam vyvieźci spryntarku ŭ Biełaruś. U aeraporcie Kryścina admoviłasia siadać u samalot, paprasiła abarony ŭ japonskaj palicyi i atrymała humanitarnuju vizu ŭ ambasadzie Polščy. Spartoŭka stała vystupać za zbornuju Polščy pa lohkaj atletycy, ale značnych pośpiechaŭ ni jana, ni zbornaja Polščy nie zdabyła.
U 2023 hodzie Kryścina kančatkova razyšłasia z mužam Arsienijem Zdanievičam (para była razam dzieviać hadoŭ, ź ich šeść — u aficyjnym šlubie), jaki viarnuŭsia ŭ Biełaruś. Amal adrazu paśla pierajezdu ad byłoha biahucha palacieła ŭ adpačynak u Hrecyju — i tam sustreła novaje kachańnie. Jaje abrańnikam staŭ ukrainski błohier Alaksandr Sałonski, jaki potym zrabiŭ joj prapanovu, a jana skazała jamu «tak».
Kamientary