Dźmitryj Zavadski, biełaruski žurnalist, supracoŭnik Hramadskaha rasijskaha telebačańnia (ORT, ciapier — Pieršy kanał), źnik 7 lipienia 2000 hoda, na toj momant jamu było 27 hadoŭ, nahadvaje Radyjo Svaboda.
Ranicaj taho dnia Zavadski vyjechaŭ z domu ŭ Nacyjanalny aeraport Minsk sustrakać Paŭła Šaramieta, karespandenta ORT pa Biełarusi, jaki prylataŭ z Maskvy. Mašynu znajšli na stajancy aeraporta z vyciertymi adbitkami palcaŭ, Dźmitryja ŭ joj nie było. Z tych časoŭ Zavadskaha bolš nichto nie bačyŭ.
Z 1994 pa 1996 hod Zavadski pracavaŭ u apieratarskim pule Alaksandra Łukašenki, potym pierajšoŭ na pracu ŭ ORT. Uletku 1997 hoda jon razam z Paŭłam Šaramietam byŭ aryštavany i abvinavačany ŭ niezakonnym pierasiačeńni biełaruska-litoŭskaj miažy padčas zdymak repartažu, jaho ŭmoŭna asudzili na paŭtara hoda pazbaŭleńnia voli. Z kastryčnika 1999 pa travień 2000 hoda Zavadski pracavaŭ u Čačni, dzie razam z Šaramietam zdymaŭ film «Čačenski dziońnik».
U 2002 hodzie Minski abłasny sud pryznaŭ vinavataj u vykradańni Zavadskaha hrupu byłoha bajca śpiecpadraździaleńnia MUS «Ałmaz» Valeryja Ihnatoviča. Ihnatovič, a taksama pryznany vinavatym u vykradańni Maksim Malik byli asudžanyja na pažyćciovaje źniavoleńnie. Byłoha kursanta Akademii MUS Alaksieja Huza i biespracoŭnaha Siarhieja Savuškina, jakija taksama prachodzili padazravanymi ŭ hetaj spravie, u vyniku pryznali vinavatymi ŭ inšych złačynstvach i asudzili adnaho na 25 hadoŭ kałonii ŭzmocnienaha režymu, druhoha na 12 hadoŭ strohaha režymu.
Viersija zabojstva
Aficyjnaja viersija — zabojstva z pomsty za intervju Zavadskaha «BDH», u jakim jon zhadaŭ pra biełaruskich najmitaŭ. Siamja ličyć, što pryčynaj staŭ film pra vajnu ŭ Čačni.
«Ja schilajusia da taho, što pryčynaj staŭ film «Čačenski dziońnik», — raskazvała žonka Dźmitryja Śviatłana. — Jon pavinien byŭ vyjści na ORT 10 lipienia 2000 hoda. Pa televizii krucili anons hetaj stužki aŭtarstva Paŭła Šaramieta. Mahčyma, naviersie spałochalisia. Nie vyklučana, što 7 lipienia Dźmitryja ŭziali, kab daviedacca pra źmiest, ci budzie tam niešta pra Biełaruś. Ale, siadziačy ŭ Minsku, mantavać jon, viadoma, nie moh. Mahčyma, jaho katavali, a kali ŭbačyli, što nie zmohuć schavać śladoŭ — zabili…»
Padčas śledstva staranna vyvučali bijahrafiju Dźmitryja, u jakoj nie było nijakich «čornych plam», uspaminała Śviatłana.
«Adzinaje, za što ŭdałosia začapicca — voś hetaje intervju «BDH». I ŭ mianie takoje ŭražańnie, što ŭžo potym da hetaha intervju prosta «padciahnuli» abvinavačanych. Hetaja viersija tolki na pieršy pohlad mocnaja. Ale navošta bandytam było brać Dźmitryja ŭ aeraporcie, kali napiaredadni jon adzin jeździŭ na rybałku? I čamu kamiery, jak na złość, mienavita 7 lipienia nie pracavali, a milicejski post u aeraporcie źniali? Heta ŭsio Ihnatovič zrabiŭ?»
Cieła niama
27 listapada 2003 hoda sud Frunzienskaha rajona Minska pryznaŭ Zavadskaha pamierłym, choć jaho cieła tak i nie było znojdziena. U sakaviku 2004 hoda prakuratura prypyniła rasśledavańnie spravy ab vykradańni Zavadskaha «ŭ suviazi ź nievyjaŭleńniem bieź viestak źnikłaj asoby». U 2005 hodzie rasśledavańnie było adnoŭlena, ale ŭ krasaviku 2006 znoŭ prypyniena.
U 2019 hodzie ŭdava Zavadskaha Śviatłana źviarnułasia ŭ Śledčy kamitet Biełarusi z prośbaj dapytać u jakaści śviedak asob, proźviščy jakich nazvaŭ u intervju DW były bajec biełaruskaha SACHR Juryj Haraŭski. Haraŭski pryznaŭsia va ŭdziele ŭ palityčnych zabojstvach hramadskich dziejačaŭ i palitykaŭ Biełarusi i nazvaŭ proźviščy inšych vykanaŭcaŭ złačynstvaŭ. U studzieni 2020 hoda ŭdava Zavadskaha atrymała aficyjny adkaz Śledčaha kamiteta z admovaj adnavić prypynienaje papiaredniaje rasśledavańnie spravy vykradzienaha apieratara.
U pačatku 2000-ch hadoŭ byli apublikavanyja dakumienty, ź jakich vynikała, što z apazicyjnymi palitykami i hramadskimi dziejačami raspraŭlaŭsia śpiecyjalna stvorany dla hetaha «eskadron śmierci». Siarod datyčnych da vykradańniaŭ zhadvalisia: były dziaržsakratar Savieta biaśpieki Viktar Šejman, byłyja ministry ŭnutranych spraŭ Uładzimir Navumaŭ i Juryj Sivakoŭ, a taksama były kamandzir bryhady śpiecnazu ŭnutranych vojskaŭ MUS Dźmitryj Paŭličenka. Z hetaj pryčyny im zabaronieny ŭjezd na terytoryju Jeŭrasajuza, i sankcyi ŭ dačynieńni da ich nikoli nie zdymalisia.
Ciapier čytajuć
«Hanna adkazała: «Tak!» Vital Hurkoŭ zrabiŭ prapanovu ruki i serca. Chto ž niaviesta?24
Kamientary