«Ty pabačyš i pačuješ. Heta budzie nie bomba, a bombišča». Ranicaj 2 lipienia Pavieł Łatuška atrymaŭ list ad asoby, jakaja pastajanna atakuje jaho

33-hadovy biełarus Jaŭhien Kazancaŭ kinuŭ u Paŭła Łatušku śmietnicu i kryčaŭ na ŭsiu zału, što toj «zdradnik i chacieŭ spalić apazicyjanieraŭ», paŭtarajučy słovy Alaksandra Łukašenki, ahučanyja im padčas vystupu 1 lipienia.

Pavieł Łatuška pierakanany, što zdareńnie treba razhladać u bolš šyrokim kantekście.

«Za apošnija tydni ja atrymaŭ šmat pahrozaŭ zabojstva, a taksama mahčymaha vykradańnia z terytoryi Polščy. Heta byli elektronnyja listy, heta byŭ pryjezd pradstaŭnikoŭ kryminalnaha śvietu, jakija pahražali mnie, što ja budu, naprykład, vykradzieny», — apaviadaje palityk.

Zajavu Łukašenki pra toje, što Łatuška płanavaŭ spalić usich lidaraŭ apazicyi na čale sa Śviatłanaj Cichanoŭskaj 9—10 žniŭnia 2020 hoda, kiraŭnik NAU nazyvaje absalutnaj chłuśnioju i padkreślivaje, što na toj momant nie byŭ ni ŭ apazicyi, ni ŭ demakratyčnych siłach, a ŭznačalvaŭ Kupałaŭski teatr.

2 lipienia zranku Pavieł Łatuška atrymaŭ elektronny list ad asoby, jakaja rehularna jaho atakuje.

«Hetaja asoba, jak ja miarkuju, źviazanaja sa śpiecsłužbami, z KDB Biełarusi, — raskazaŭ palityk «Biełsatu». — Mnie pryjšła infarmacyja, što pačynajecca majo źniščeńnie, što ŭsio, što skazaŭ Łukašenka, najbližejšymi dniami budzie bačna. «Ty pabačyš i pačuješ. Heta budzie nie bomba, a bombišča» — tam takija słovy. I jašče dadaje, što ŭsie hetyja materyjały, jakija my pabačym, Kit Kiełah hladzieŭ padčas sustrečy z Łukašenkam».

Paśla hetaha lista namieśnik Śviatłany Cichanoŭskaj daviedaŭsia, što rasijskim śpiecsłužbam byli pieradadzienyja źviestki jahonaha pražyvańnia na terytoryi Polščy, i heta, pavodle słovaŭ palityka, paćvierdžanaja infarmacyja. Nastupnym zdareńniem staŭsia ŭłasna napad u Varšaŭskim univiersitecie.

«Padčas majho zapłanavanaha vystupu da mianie biažyć čałaviek i kidaje ŭ mianie pradmietam. Psichałahična, kaniešnie, ty rychtuješsia da ataki. Nie było nijakaha strachu, ale psichałahična ja rychtavaŭsia, što zaraz budzie ŭdar. Toj čałaviek kryčaŭ, što ja zdrajca i vinavaty ŭ tym, što chacieŭ spalić usiu biełaruskuju apazicyju. Ja razumieju, što heta čałaviek, jaki, chutčej za ŭsio, u łancužku ŭsich tych padziejaŭ, što adbyvalisia apošnimi tydniami i, u tym liku, źviazanyja z tym učorašnim vykazvańniem Łukašenki», — kaža Łatuška.

Kiraŭnik NAU spadziajecca, što śledstva vyznačyć matyvy Kazancava, a taksama ci była heta zapłanavanaja pravakacyja, ci paŭpłyvaŭ raschistany psichałahičny stan napadnika.

Palityk zaznačyŭ, što padčas jahonych sustrečaŭ sa śpiecsłužbami i ŭ Ministerstvie ŭnutranych spravaŭ Polščy jaho infarmavali pra toje, što «na siońniašni dzień davoli lohka zavierbavać našych suhramadzianaŭ, ale nie tolki, a ŭ tym liku i hramadzianaŭ inšych krainaŭ za tysiaču — dźvie tysiačy jeŭraŭ, kab učynić pravakacyju, a za troški bolšuju sumu — zabojstva».

«Tamu ja nie vyklučaŭ by situacyi, što heta, mahčyma, było arhanizavana za niejkuju sumu hrošaj. Tak mnie padałosia ź jahonych pavodzinaŭ padčas hetaj ataki na mianie», — kaža Pavieł Łatuška.

Kazancava zatrymali. Namieśnik Cichanoŭskaj zaznačyŭ, što nie razmaŭlaŭ z napadnikam i nie płanavaŭ hetaha rabić. Palityk padziakavaŭ biełarusam, jakija byli pobač ź im padčas napadu i ŭzialisia jaho achoŭvać.

«Padtrymaŭ mianie namieśnik kiraŭnika Biuro nacyjanalnaj biaśpieki Polščy. Tam byŭ ministr, ambasadar Čechii, pradstaŭnica ambasady Hruzii, kiraŭnictva ŭniviersitetu, šmat pavažnych asobaŭ, u tym liku pradstaŭniki ŭradu, prezidenta i parłamientu Polščy. Dumaju, na heta i było skiravanaje hetaje dziejańnie — pryciahnuć da jaho maksimalnuju ŭvahu», — kaža Łatuška.

• 2
• 0
• 2
• 5
• 1
• 1
• 6
• 1