Kolki kaštujuć akulary-avijatary, jak u Makrona? Heta francuzski luksavy brend
Prezident Francyi Emanuel Makron źjaviŭsia na Suśvietnym ekanamičnym forumie ŭ Davosie ŭ akularach-avijatarach. «Heta praź nievialikuju prablemu», — tłumačyŭ jon, čamu apošnim časam chavaje pačyrvaniełaje voka. Na Makronie byli akulary francuzskaha luksavaha brenda Henry Jullien. U toj ža dzień sajt brenda nie vytrymaŭ napłyvu naviedvalnikaŭ i pierastaŭ pracavać, piša RBK.
Francuzski prezident vybraŭ madel Pacific S 01 ź sinimi lustranymi linzami i ŭ pazałočanaj apravie koštam €659. Na chvali pośpiechu brend stvaryŭ na svaim sajcie časovuju staronku, pryśviečanuju tolki hetaj madeli.
Na vyrab adnoj pary sychodzić da čatyroch miesiacaŭ: akulary vyrableny i sabrany ŭručnuju z vykarystańniem tradycyjnaj techniki załačeńnia na zavodzie Łons-le-Sańje, linzy vyrablajucca ŭ rehijonie Jura kampanijaj Dalloz u Sien-Kłodzie. Mienavita hety fakt — što akulary całkam francuzskaj vytvorčaści — niekalki hadoŭ tamu padkupiŭ Makrona.
«Jon nie pryniaŭ ich u padarunak. Jon nastajaŭ na tym, kab kupić ich samomu», — rastłumačyŭ Stefana Fulšyr, uładalnik iVision Tech. U 2023 hodzie Fulšyr vykupiŭ Henry Jullien, kampaniju z bolš čym viekavoj historyjaj, zachavaŭšy vytvorčuju placoŭku ŭ rehijonie Franš-Kante.
Aerakaśmičnaja stal, zołata, tytan — brend akularaŭ Henry Jullien spałučaje inavacyi i tradycyi ručnoj pracy, za što ŭ 2018 hodzie byŭ udastojeny ŭznaharody EPV (Entreprise du Patrimoine Vivant, «pradpryjemstva žyvoj spadčyny»). Jana prysudžajecca kampanijam, jakija majuć hłybokija karani ŭ Francyi, vałodajuć pieradavymi technałohijami, patentami i histaryčnymi archivami.
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary