Kibierpartyzany: My ŭzłamali sajt KDB pasiarod nočy. Jany za hety čas biehła sabrali naradu i damovilisia, kaho buduć padstaŭlać?
Inicyjatyva prakamientavała viersiju KDB pra «kantralavany ŭzłom» sajta viedamstva.
U siužecie ANT Kamitet dziaržaŭnaj biaśpieki Biełarusi pierakonvaje, što ŭzłom aficyjnaha sajta viedamstva, jaki adbyŭsia ŭ pačatku 2024 hoda, nibyta byŭ častkaj ich ža śpiecapieracyi.
Viersija KDB nastupnaja: na svaim sajcie ŭ raździele zvarotaŭ jany nibyta zrabili pastku. Tam znachodziŭsia archiŭ z 40 tysiač zvarotaŭ hramadzian (danosy, zapyty na infarmacyju ab represavanych svajakach, prosta spam) ź vieraśnia 2014 hoda pa žnivień 2023-ha. KDB śćviardžaje, što ŭ žniŭni 2023-ha śpiecyjalna tudy ŭkinuŭ fejkavy danos aktyvista «Narodnaj Hramady» Paŭła Bialucina. A ŭ pačatku vosieni 2023 niby zafiksavali źniešniuju ataku na sajt KDB, paśla čaho, pa ich słovach, u kastryčniku Kibierpartyzany atrymali dostup byccam tolki da hetaha błoku. KDB zajaviŭ, što niby kantralavaŭ uvieś praces uzłomu. A vyčakaŭšy čas, u studzieni 2024-ha, pa słovach KDB, jany sami zakryli sajt.
Kibierpartyzany paśla siužetu paviedamili, što jany ŭzłamali sajt KDB za paru hadzin pasiarod nočy.
«To bok jany za hety čas biehła sabrali naradu, damovilisia, kaho buduć padstaŭlać, sfalsifikavali bazu danych na dziasiatki tysiač zvarotaŭ, padlili jaje na siervier. I ŭsio heta dla čaho? Kab zhańbicca publična na ŭvieś śviet z nadziejaj praź niekalki hadoŭ, mahčyma, złavić niejkaha nounejma? Aha, hučyć praŭdapadobna», — iranizujuć Kibierpartyzany ŭ kamientary na svaim kanale.
Sajt KDB paśla taho ŭzłomu ŭžo paŭtara hoda nie pracuje.
Jak stała viadoma sa źlitaj bazy danosaŭ, 31 studzienia 2017 hoda Bialucin napisaŭ nastupnaje paviedamleńnie: «Dobry dzień. U mianie jość niekatoryja padstavy mierkavać, što hramadzianin RB Aŭtuchovič Mikałaj Mikałajevič pradumvaje i pačynaje ažyćciaŭlać padrychtoŭku da sproby ŭzbrojenaha zachopu ŭłady ŭ našaj respublicy. Pra sprobu daviedaŭsia sa słoŭ hr. Aŭtuchoviča M.M.».
Paśla taho, jak stała viadoma pra hety danos, Bialucina vyklučyli z «Narodnaj Hramady». Jaho tłumačeńni byli niaŭciamnymi. «Kali dać sapraŭdnuju infu, to ŭsio pierahorniecca», — zahadkava kazaŭ jon.
Sama baza zvarotaŭ sapraŭdnaja. «Naša Niva» tady zvaniła niekatorym danosčykam (voś i voś), jany paćviardžali, što pakidali zvaroty ŭ KDB.
Piać mutnych momantaŭ u historyi pra danosčyka Bialucina i «śpiecapieracyju» KDB
KDB aryštavaŭ padazronaha aktyvista Paŭła Bialucina. U jakoj krainie heta adbyłosia, nieviadoma
Padazronaha aktyvista-stukača Paŭła Bialucina pryvieźli z Turcyi
Stukač z «Hramady», jaki letaś sprabavaŭ praleźci ŭ Kaardynacyjnuju radu, pajechaŭ u Polšču i prapaŭ
Dvoje siabroŭ «Narodnaj hramady» pisali danosy ŭ KDB. Chto jany i jak tłumačać situacyju?
Kamientary