U Rasii fatohrafa asudzili da 16 hadoŭ za pieradaču amierykancu lehalnaj knihi pra savieckija bunkiery
Piermski krajovy sud pryznačyŭ 16 hadoŭ kałonii fatohrafu i muzykantu Hryhoryju Skvarcovu pa spravie ab dziaržaŭnaj zdradzie (artykuł 275 KK RF). Padstavaj dla kryminalnaj spravy stała toje, što jon pieradaŭ amierykanskamu žurnalistu knihu pra savieckija bunkiery, jakuju možna adkryta kupić, piša Bi-bi-si.
Havorka idzie pra knihu «Savieckija sakretnyja bunkiery»: haradskaja śpiecyjalnaja fartyfikacyja 1930—1960-ch hadoŭ» historykaŭ Dźmitryja Jurkova i Siarhieja Palatajeva ź ilustracyjami Anastasii Zotavaj.
Aŭtary knihi, pavodle ich ułasnych słoŭ, vyvučyli dźvie tysiačy staronak dakumientaŭ z 11 archivaŭ, u tym liku rassakrečanuju infarmacyju pra savieckija fartyfikacyjnyja zbudavańni — naprykład, pra «Mietro-2».
Hetaja kniha nie zabaronienaja i svabodna pradajecca. Na jaje sajcie havorycca, što ciapier nakład raskupleny, ale asobniki možna znajści na servisie «Avita». Na tym ža sajcie apublikavany frahmienty chvalebnych vodhukaŭ na knihu ŭ praŭładnych «Rasijskaj haziecie» i «Kamsamolskaj praŭdzie».
Skvarcoŭ — viadomy ŭ Piermi fatohraf, jaki cikavicca pramysłovaj i architekturnaj zdymkaj, a taksama zasnavalnik indastryjał-hrupy Jagath, jakaja časta vystupała ŭ Piermi: u šachtach, na zakinutych budoŭlach i ŭ zavodskich cechach.
Adno ź jaho zachapleńniaŭ — rufinh (ekstremalnyja padarožžy pa dachach i inšych vyšynnych abjektach), i ŭ 2016 hodzie jany razam ź niaviestaj trapili ŭ naviny jak para ekstremaŭ-maładažonaŭ, što zrabiła viasielnuju fotasiesiju na viaršyni anteny piermskaj televiežy.
29 listapada 2023 hoda Skvarcoŭ pavinien byŭ prylacieć ź Piermi ŭ Pieciarburh, ale źnik. Paźniej vyśvietliłasia, što Lefortaŭski sud Maskvy ŭ hety dzień adpraviŭ fatohrafa ŭ SIZA pa spravie ab dziaržaŭnaj zdradzie.
Na staroncy Skvarcova ŭ «UKantakcie» apublikavana historyja jaho zatrymańnia, jakuju jon dasłaŭ u liście. Tuju ž historyju jon vykłaŭ u piśmovym intervju «Pieršamu adździełu».
Pavodle jaho słoŭ, razam z knihaj asobna pradavalisia fatahrafii rassakrečanych archiŭnych dakumientaŭ (bolš za tysiaču staronak), i mienavita hetyja dadatkovyja materyjały razam ź inšymi fota i schiemami ź internetu jon pierasłaŭ znajomamu žurnalistu «z metaj publikacyi», tamu što «chacieŭ padzialicca z hramadskaściu» — i spadziavaŭsia atrymać hanarar.
Publikacyja nie adbyłasia: pavodle słoŭ Skvarcova, FSB zatrymała jaho znajomaha, taksama zacikaŭlenaha schiemami, i toj zabaraniŭ publikavać svoj materyjał.
Jak śćviardžaje Skvarcoŭ, pry zatrymańni, jakoje adbyłosia ŭ jaho doma ŭ Piermi, apieratyŭniki jaho źbivali i źnievažali, a taksama patrabavali nazvać na kamieru imia žurnalista, jakoje jon za paŭhoda ŭžo zabyŭ.
Choć Skvarcoŭ vykarystoŭvaŭ nie knihu, a tolki dadatkovyja materyjały da jaje, śledčy adpraviŭ na ekśpiertyzu mienavita knihu, raspaviadaŭ abvinavačvany ŭ dziaržaŭnaj zdradzie.
Kanał padtrymki paviedamlaŭ, što ŭ SIZA fatohraf praciahvaŭ zajmacca tvorčaściu, malavaŭ schiemy fantastyčnych budynkaŭ i navat raspracoŭvaŭ svoj mierč.
Vinu Skvarcoŭ nie pryznaŭ. Jon nastojvaje, što nie mieŭ dostupu da dziaržaŭnaj tajamnicy i złamysnaha namieru, a pieradadzienyja im źviestki nie byli zasakrečanaj infarmacyjaj.
«Źviestki, vidać, što ŭjaŭlajuć saboj dziaržaŭnuju tajamnicu, a mienavita schiemy, jakija źmiaščajuć infarmacyju pra dysłakacyju śpiecyjalnych abjektaŭ, pry biaździejańni FSB i HUSP [Hałoŭnaje ŭpraŭleńnie śpiecyjalnych prahram prezidenta Rasii] ciaham dziesiacihodździaŭ znachodzilisia ŭ svabodnym dostupie ŭ internecie i ciapier praciahvajuć tam znachodzicca», — padkreślivaŭ jon.
Ciapier čytajuć
«Zachodziš u kamieru, a jany kažuć: «My z taboj admaŭlajemsia siadzieć». Cichanoŭski raskazaŭ, jak sutyknuŭsia z prablemaj nizkaha statusu8
Kamientary