Jeŭrapiejskaja kamisija dała aficyjnuju zhodu na ŭviadzieńnie jeŭra ŭ Bałharyi. Pavodle zajavy kamisii, kraina vykanała ŭsie nieabchodnyja ŭmovy, kab pierajści na adzinuju jeŭrapiejskuju valutu z 1 studzienia 2026 hoda.
Jeŭrapiejski centralny bank taksama adznačyŭ, što ekanomika Bałharyi «dastatkova padrychtavanaja» da hetaha kroku, piša Bild.
«Bałharyja siońnia nabliziłasia na adzin krok da pryniaćcia jeŭra. Kraina zojmie svajo zakonnaje miesca ŭ farmiravańni klučavych rašeńniaŭ jeŭrazony», — zajaviła staršynia Jeŭrakamisii Ursuła fon der Lajen.
Hałoŭny ekanamist JECB Filip Łejn dadaŭ, što ŭrad u Safii prajaviŭ «vialikuju rašučaść», kab pravieści nieabchodnyja reformy.
Raniej uviadzieńnie jeŭra adkładvałasia z-za vysokaj inflacyi ŭ krainie. Ciapier ža, pavodle dadzienych Jeŭrakamisii, siaredni ŭzrovień rostu cen u minułym hodzie skłaŭ 2,7%, što krychu nižej za dapuščalny paroh.
Kali ministry finansaŭ ES uchvalać rašeńnie ŭ lipieni, Bałharyja stanie 21-m členam jeŭrazony — i samym biednym pa ŭzroŭni dachodaŭ.
Nacyjanalnaja valuta Bałharyi — leŭ — z 2020 hoda ŭžo pryviazana da jeŭra praź śpiecyjalny valutny miechanizm.
Kamientary