U stalicy Ukrainy pryniali rašeńnie demantavać pomnik rasijskamu piśmieńniku Michaiłu Bułhakavu, jaki znachodzicca na Andrejeŭskim spusku. Adpaviednaje rašeńnie padtrymała Kijeŭskaja haradskaja rada, piša «Ukrainskaja praŭda».
Jašče viasnoj 2024 hoda ekśpierty Ukrainskaha instytuta nacyjanalnaj pamiaci pryznali ŭradženca Kijeva Michaiła Bułhakava ŭkrainafobam i nośbitam impierskaha śvietapohladu. Na ich dumku, pomniki i taponimy, źviazanyja ź jaho imiem, źjaŭlajucca simvałami rasijskaj impierskaj palityki, a ich prysutnaść u publičnaj prastory ŭsprymajecca jak prapahanda dziaržavy-ahresara.
Ekśpierty adznačyli, što, niahledziačy na hady žyćcia ŭ Kijevie, piśmieńnik pahardliva staviŭsia da ŭkraincaŭ i ich kultury, varoža ŭsprymaŭ imknieńnie Ukrainy da niezaležnaści i niehatyŭna vykazvaŭsia pra ŭkrainskuju dziaržaŭnaść. Jany taksama padkreślili, što jahonyja pohlady najbolš blizkija da sučasnaj ideałohii pucinizmu.
Paśla hetaha Kijeŭskaja haradskaja rada pačała razhladać pietycyju ab vydaleńni z publičnaj prastory zhadak pra Bułhakava. U vyniku było padtrymana rašeńnie pra demantaž jaho pomnika.
Adnačasova z hetym kijeŭskija ŭłady padtrymali likvidacyju ŭ Kijevie pomnikaŭ Dźmitryju Manuilskamu, Michaiłu Hlinku, Hańnie Achmatavaj, pamiatnaha kamienia ŭ honar 100‑hodździa Lenina i miemaryjalnaj doški Piatru Čajkoŭskamu. Taksama płanujuć demantavać miemaryjalnuju došku z nadpisam: «U hetym domie ŭ pieryjad niamiecka-fašysckaj akupacyi (1941—1943 hh.) vioŭ pracu padpolny Šaŭčenkaŭski rajkam KP(b)U u horadzie Kijevie».
U toj ža čas vakoł spadčyny Michaiła Bułhakava ŭ Kijevie praciahvajucca dyskusii. Kiraŭnik Ukrainskaha instytuta nacyjanalnaj pamiaci Anton Drabovič nazvaŭ vysnovy ekśpiertaŭ častkova emacyjnymi, choć i pahadziŭsia z ahulnaj acenkaj postaci piśmieńnika. Jon padkreśliŭ, što zakryvać muziej Bułhakava ŭ Kijevie nie varta, ale ŭstanova pavinna źmianić nazvu i kancepcyju, kab raskazvać pra piśmieńnika ŭsiu praŭdu i z ukrainskaha punktu hledžańnia.
U muziei, u svaju čarhu, zajavili, što ličać niekatoryja farmuloŭki ekśpiertaŭ praźmierna kateharyčnymi i navat manipulatyŭnymi, a acenki asoby Bułhakava — paviarchoŭnymi. U adkaz Instytut nacyjanalnaj pamiaci inicyjavaŭ dadatkovaje ekśpiertnaje vyvučeńnie hetaha pytańnia.
Kamientary
Cikava, što siońniašni strym Kačynskaha jak raz ab hetym
Tak, Dekałanizacyja maskoŭskaj imperyi — adziny šlach spynić maskoŭskija zavajoŭnickija vojny. I ja maju na ŭvazie nie pucinski imperyjalizm, a maskoŭski imperyjalizm uvohule — ad Niavalnaha, Puškina i Sałžanicyna da Duhina, Bułhakava i Brodzkaha