Usio bolš maładych ludziej prymajuć duš u ciemry. Kažuć, heta dapamahaje im źniać stres i lepš spać. Heta nie prosta čarhovaja moda z sacsietak, a mietad, jaki maje realnaje navukovaje i histaryčnaje abhruntavańnie.
U internecie siońnia možna znajści proćmu raznastajnych trendaŭ, jakija tyčacca zdaroŭja, pryhažości i dobraha samaadčuvańnia. Ale kali bolšaść padobnych «rekamiendacyj» z sacsietak na pravierku akazvajucca poŭnaj łuchtoj abo prosta markietynhavym chodam, to hetaje zachapleńnie niečakana znajšło całkam łahičnaje tłumačeńnie ŭ śpiecyjalistaŭ. Havorka idzie pra tak zvany ciomny duš (dark shower), jaki stanovicca ŭsio bolš papularnym siarod maładych ludziej.
Ideja maksimalna prostaja, ale maje svaje niuansy: zamiest taho, kab stajać pad jarkim śviatłom lampaŭ, vy prymajecie duš u paŭzmroku abo pry poŭnaj adsutnaści štučnaha aśviatleńnia. Pryčym, jak adznačajecca, moładź tak prymaje duš mienavita ŭ viečarovy čas — kab padzialić dzień na «aktyŭnuju» i «spakojnuju» fazy.
Dla pakaleńnia, jakoje pravodzić uvieś dzień pierad ekranami hadžetaŭ, jarkaje vierchniaje śviatło ŭviečary — razdražnialnaje. Karystalniki TikTok paraŭnoŭvajuć efiekt z darahim spa-sałonam abo hłybokaj miedytacyjaj.
Hetuju ideja aktyŭna vitajuć nie tolki ekołahi (ekanomija elektryčnaści), ale i miedyki. Daśledavańni pakazali, što pryniaćcie ciopłaha duša abo vanny pierad snom sapraŭdy moža dapamahčy palepšyć jakaść snu i skaracić čas zasynańnia.
Jak tłumačać ekśpierty, tut spracoŭvajuć adrazu niekalki bijałahičnych miechanizmaŭ. Pa-pieršaje, ciopłaja vada spryjaje źnižeńniu ŭnutranaj tempieratury cieła paśla vychadu z duša, što źjaŭlajecca dla arhanizma važnym sihnałam: čas spać. Pa-druhoje, pryhłušanaje śviatło (abo poŭnaja ciemra) stymuluje vypracoŭku miełataninu — hałoŭnaha harmonu snu. Zvyčajnyja jarkija lampy ŭ vannaj, naadvarot, padmanvajuć naš mozh, prymušajučy jaho dumać, što na dvare ŭsio jašče dzień, i tym samym źbivajuć pryrodnyja bijarytmy.
Adnak karyść «ciomnaha dušu» nie abmiažoŭvajecca tolki fizijałohijaj. Ekśpierty źviartajuć uvahu na miedytatyŭny bok pracesu: znachodžańnie ŭ ciemry abo pry ćmianym śviatle spryjaje rassłableńniu praz uśviadomlenaje zadavalnieńnie ad samoha dośviedu. Heta dapamahaje psichałahična adklučycca ad dzionnych kłopataŭ pierad snom.
Kab vyvieści hety chatni rytuał na novy ŭzrovień i pieratvaryć vanny pakoj u sapraŭdny spa-centr, śpiecyjalisty rekamiendujuć zadziejničać inšyja pačućci. Naprykład, dadavać u hiel dla duša abo vykarystoŭvać alei z zaspakajalnymi vodarami, takimi, jak łavanda — heta ŭzmocnić sensarnyja ŭražańni i pahłybić rełaksacyju.
someone on tiktok said that you should shower in the dark & it's so therapeutic
Važnuju rolu adyhryvaje i hukavoje supravadžeńnie. Cichaja, spakojnaja muzyka moža dapamahčy supakoić rozum, chacia mnohim dla poŭnaha spakoju budzie dastatkova prostaha šumu vady. Hałoŭnaje praviła tut — paźbiahać enierhičnych rytmaŭ: nie varta padpiavać starym chitam Alaksieja Chlastova ci ładzić kancerty ŭ dušy, kali vaša meta — jakasny adpačynak.
Cikava, što hety sučasny trend maje vielmi hłybokija histaryčnyja karani. Pryniaćcie «ciomnaha dušu» faktyčna źjaŭlajecca paŭtoram staražytnych rytuałaŭ uśviadomlenaha abmyvańnia.
Adnak varta pamiatać pra techniku biaśpieki. «Ciomny duš» nie pavinien pieratvarycca ŭ kvest na vyžyvańnie. Kab nie paśliznucca, u pamiaškańni pavinna zastavacca chacia b adna słabaja krynica śviatła, naprykład, śviečka ŭ biaśpiečnym miescy.
Zrešty, śpiecyjalisty robiać važnuju remarku: duš u paŭzmroku nie vyrašyć surjoznych abo chraničnych prablem ź biessańniu sam pa sabie, ale jon moža stać karysnaj častkaj rytuału rassłableńnia pierad snom.
Ciapier čytajuć
Chto taja Alina, ź jakoj Łukašenka tancavaŭ hetym razam na navahodnim bali20
Kamientary