Čym zapomniŭsia Mikita Miełkazioraŭ — samy papularny biełaruski intervjujer

Naradziŭsia ŭ Chabaraŭsku, ale vyras u Minsku

Pieršyja piać hadoŭ svajho žyćcia Mikita pravioŭ u Rasii. Paśla maci pryviezła jaho ŭ Minsk da svaich baćkoŭ, a sama viarnułasia na hod u Chabaraŭsk — afarmlać razvod dy davučvacca ŭ mahistratury.

Z tatam Mikita apošni raz razmaŭlaŭ va ŭzroście 11 hadoŭ — patelefanavaŭ sam, kab paprasić dazvoł na vyjezd za miažu. Z usich svajakoŭ pa linii baćki ŭ vyniku kamunikavaŭ tolki z babulaj.

Uspaminaŭ pra rasijski pieryjad žyćcia było nie vielmi šmat: «Tata byŭ staršynioj chabaraŭskaha kamsamołu, jaho navat u saviecki čas pa teliku pakazali. A potym jon staŭ zajmacca biznesam, haniać z Azii mašyny pravarulnyja. Pamiataju, što było šmat ikry, čyrvonaj ryby, ja jaje lublu. Mama raskazvała, što ŭ ardynatarskaj u ich stajaŭ trochlitrovy słoik ikry z utorknutaj łyžkaj, i nichto jaje nie jeŭ».

Dumaŭ pra karjeru futbalista

Da 10 kłasa Mikita zajmaŭsia futbołam u DzJuSŠ. Kazaŭ, što ŭ jaho była starannaść, ale nie było sapraŭdnaha talentu. Plus nie chapała śmiełaści, nachabstva, kab prabivacca. U raździavalniach jon dačytvaŭ Dastajeŭskaha, a pacany hetaha nie razumieli.

U vyniku chłopiec vyrašyŭ admovicca ad mar pra futboł i pačaŭ rychtavacca da pastupleńnia na fakultet žurnalistyki BDU.

U maładości ŭ Mikity byli prablemy z zaležnaściu. Adnak jon zmoh uziać situacyju pad kantrol i ŭrešcie całkam admoviŭsia ad ałkaholu.

Svaju karjeru Mikita pačynaŭ jak spartyŭny žurnalist. Pracavaŭ u haziecie «Vsio pro futboł», na internet-partale «Trybuna», zatym pierajšoŭ na Onliner.by.

Pavialičyć

Ale na amatarskim uzroŭni jon praciahvaŭ hulać u futboł i ŭ darosłym žyćci. Jon byŭ kapitanam u futbolnaj kamandy Biełaruskaj asacyjacyi žurnalistaŭ, na poli zajmaŭ pazicyju centralnaha abaroncy.

Nie saromieŭsia nazyvać siabie nieafitam

Mikita ščyra pryznavaŭsia, što da 2020 hoda zusim nie cikaviŭsia palitykaj:

«Ja z tych, kaho nazyvajuć niejmaviernymi ci nieafitami. I tak, da 2020‑ha mnie było davoli roŭna, što tam adbyvajecca z krainaj. Ciapier ja adkryvaju ŭ siabie zdolnaści hanarycca biełaruskaj movaj i kajfavać ad jaje ŭžyvańnia i hučańnia. A taksama adčuvać niejkuju moc ad novych viedaŭ pa historyi svajoj krainy».

Jon uvohule nie vielmi chvalavaŭsia praz toje, što pra jaho dumajuć. Mikita kazaŭ: «Ja nie bajusia nie viedać — bajusia, što nie budu chacieć daviedacca. Paśla intervju ŭ mianie źjaviłasia šyrejšaje koła znajomych, ludziej ź vialikimi viedami, ź jakimi ja mahu paraicca, da kaho źviarnucca».

Pierajšoŭ na biełaruskuju movu paśla čelendžu

U 2021 hodzie Mikita abjaviŭ čelendž — kali na jaho instahram padpišucca 30 tysiač čałaviek, jon zapiša vypusk pa-biełarusku. Mnohija tady aburylisia, što dla kantentu na rodnaj movie vystaŭlajucca ŭmovy.

Ale ŭ vyniku Mikita nie tolki zapisaŭ vypusk pa-biełarusku, ale i pačaŭ aktyŭna vyvučać biełaruskuju movu i pastupova pierajšoŭ na jaje. Svaim prykładam błohier paspryjaŭ papularyzacyi biełaruščyny. Na jaho jutub-kanale šmat vypuskaŭ vychodziła na biełaruskaj movie, dyj u inšych prajektach Mikita razmaŭlaŭ na joj.

U 2023-m Mikita nabiŭ sabie tatu na nazie ź piśmieńnikam Uładzimiram Karatkievičam i kacianiatami.

Stvaryŭ «Žyćcio-malina»

Mikita sprabavaŭ zapuskać roznyja YouTube-prajekty, ale samym paśpiachovym dla jaho staŭ kanał «Žyćcio-malina» (na jaho zaraz padpisana 97 tysiač čałaviek).

Startavaŭ prajekt letam 2020 hoda. Mikita kazaŭ, što heta miesca, dzie nie pieraškadžajuć havaryć i pakazvajuć biełarusaŭ dla biełarusaŭ. Udzielnikami prajekta byli Śviatłana Cichanoŭskaja, Pavieł Łatuška, Zianon Paźniak, Volha Chižynkova, Alena Leŭčanka, Arciom Šrajbman, Alaksandra Hierasimienia, Vadzim Prakopjeŭ, Anton Matolka, Mikałaj Chalezin i mnohija inšyja.

Najbolš prahladaŭ — bolš za 1,1 miljona — nabrała razmova Miełkaziorava ź biełaruskim dobraachvotnikam Janki.

Pabraŭsia šlubam z madellu Linaj Capavaj

Mikita i Lina Capava paznajomilisia praź instahram u 2022 hodzie. Kali Lina pierabrałasia ŭ Varšavu, to ŭ ich zaviazalisia adnosiny.

Pavialičyć

Para aficyjna ažaniłasia ŭ studzieni 2025 hoda — raśpisalisia anłajn u ZŠA, u štacie Juta.

Mikita ź Linaj zaviali miłaha ščaniuka parody pci-brabanson. Hadavaniec atrymaŭ proźvišča Fudžy. Mikita z zachapleńniem raskazvaŭ pra novaha siabra ŭ sacsietkach.

Pavialičyć

Jaho kroksy zabraŭ muziej

Niadaŭna Miełkazioraŭ pieradaŭ svaje zapaminalnyja žoŭtyja kroksy ŭ Muziej volnaj Biełarusi. Jon raskazvaŭ, što abutak prachudziŭsia i žonka kazała, što para vykinuć. Mikita ž žartam napisaŭ u muziej, ci nie treba im taki ekspanat. Muziej pryniaŭ kroksy.

Pavialičyć

• 9
• 0
• 2
• 5
• 5
• 55
• 0
• 8