Zołkin pra Babaryku i Kaleśnikavu: Heta biełahvardziejskaja apazicyja, jak i Jašyn, i Kara-Murza
Ukrainski błohier Uładzimir Zołkin publična adkazaŭ na krytyku z boku biełaruskich miedyja i karystalnikaŭ sacsietak adnosna jaho intervju ź Viktaram Babarykam, zapisanaha na druhi dzień paśla vyzvaleńnia byłoha palitviaźnia.
U strymie na svaim jutub-kanale Uładzimir Zołkin adznačyŭ, što jaho paśla vychadu intervju ź Viktaram Babarykam atakujuć biełaruskija ŚMI i zvyčajnyja karystalniki ŭ sacsietkach.
Asnoŭnaja pretenzija ŭ tym, što błohier niapravilna siabie pavioŭ z Babarykam, abo navat prymušaŭ jaho da intervju.
Jak adznačyŭ błohier, padobnyja abvinavačańni abraźlivyja ŭžo ŭ samoj svajoj łohicy.
«Ty realna nastolki tupy, što, razumiejučy, što hety čałaviek moža pryjechać u Jeŭropu (…) i raspavieści, što ty jaho prymušaŭ, možaš jaho prymušać? Surjozna? Troški kryŭdnaje pytańnie napraŭdu», — aburyŭsia Zołkin i padkreśliŭ, što nichto nikoha ni da čaho nie prymušaŭ.
Błohier iranična apisaŭ, jak, na dumku krytykaŭ, moh by vyhladać hety prymus:
«Zachodzić Babaryka, sadzicca da mianie, ja dastaju pistalet, prystaŭlaju jamu da skroni i kažu: «Babaryka, chutka skažy mnie, čyj Krym! Tolki stop! Nie kažy mnie, čyj Krym, a skažy, što ty nie viedaješ».
Sa słoŭ Zołkina, jon prajechaŭ 300 kiłamietraŭ u Čarnihaŭ, kab trapić na pres-kanfierencyju, bo jaho jak ukrainca cikaviła tolki adno: ci možna hetych ludziej usprymać jak apazicyju Łukašenku.
Adkaz dla jaho byŭ vidavočnym:
«Dla mianie asabista vidavočna, što na hety momant Babaryku z takimi pohladami niemahčyma ŭsprymać jak surjoznuju apazicyju Łukašenku, dziejnuju — nie takuju, jakaja budzie ŭ francuzskich restaracyjach, jak niadaŭna Kara-Murza z Kasparavym tam pasvarylisia ŭ francuzskaj restaracyi, prosta razmaŭlać, a niešta rabić — tak. Heta toje, što mnie było treba vyśvietlić, ja dla siabie heta vyśvietliŭ».
Jak śćviardžaje Zołkin, jon prademanstravaŭ heta inšym ukraincam, jakija, mahčyma, uskładali na Babaryku niejkija nadziei. Pry hetym jon «nie rabiŭ nijakich vysnoŭ ni za kaho. To-bok pakazaŭ — rabicie vysnovy samastojna».
Błohier prapanavaŭ achvotnym pryjechać da Babaryki i spytać u jaho, čyj usio ž Krym.
Jon nahadaŭ, što jašče ŭ 2020 hodzie Babaryka nie razabraŭsia z hetym pytańniem — i, jak miarkuje błohier, nie zrabiŭ hetaha dahetul.
«I ja tak dumaju, nie fakt, što jon u hetym pytańni naohuł kali-niebudź raźbiarecca, bo ŭ 2020‑m hodzie jamu nichto nie zaminaŭ u hetym pytańni raźbiracca», — dadaŭ Zołkin.
«Biełahvardziejskaja apazicyja»
Ukrainski błohier padkreśliŭ, što jaho nie chvaluje los Viktara Babaryki. U Zołkina tolki adzinaje praktyčnaje pytańnie, «možna ź imi niejak uzajemadziejničać dla zrynańnia łukašenkaŭskaha i pucinskaha režymu ci nielha?».
«Na hety momant ja kažu — nielha. Zaŭtra, mahčyma, jany źmieniać svaje płany, skažuć: «My budziem dapamahać Pałku Kalinoŭskaha», i ja skažu: «O, okiej, dajšło». A pakul što nam niama pra što razmaŭlać».
«Ja nie razumieju, čaho ad mianie chočuć biełarusy. Raźbirajciesia ź imi, rabicie što chočacie. Ja dla ŭkraincaŭ pakazaŭ hetuju historyju. Kab jany bačyli, što heta za ludzi», — znoŭ padkreśliŭ ukrainski błohier.
Zołkin nie admaŭlaje, što «historyja była trochi emacyjnaj», bo jon pamiataje anałahičnuju situacyju paśla vyzvaleńnia rasijskich apazicyjanieraŭ Jašyna, Kara-Murzy i Pivavarava. Tady, pavodle jaho słoŭ, mnohija va Ukrainie taksama spadziavalisia, što tyja stanuć aktyŭnaj apazicyjaj i pačnuć realna dapamahać uzbrojenaj baraćbie suprać pucinskaha režymu:
«A jany prosta ni ryba ni miasa. Žele».
U hetym ža šerahu jon pastaviŭ i častku biełaruskaj apazicyi:
«Takim, jak jany, i takim, jak hetyja Babaryki, Kaleśnikavy — im realna treba źbiracca dzieści ŭ francuzskim restaranie, nalić pa čarcy harełki, kulnuć: «Vašie błahorodije, hospoža udača», abniacca i płakać».
Zołkin acharaktaryzavaŭ takuju madel jak «biełahvardziejskuju apazicyju»:
«Biełahvardziejskaja apazicyja, razumiejecie? Havaryć, i to havaryć nie kankretna — heta ich kancepcyja. I dakładna ničoha nie rabić».
***
Uładzimiru Zołkinu 44 hady. Jon juryst pa adukacyi. Byŭ asudžany na 14 hadoŭ za naŭmysnaje zabojstva. Zołkin nie pryznaŭ vinu, sprabavaŭ davieści, što heta była zvyčajnaja bojka, jakaja skončyłasia niaŭdałym padzieńniem achviary. Paśla ŭmoŭna-daterminovaha vyzvaleńnia staŭ błohieram. Zołkin zdabyŭ papularnaść dziakujučy svajmu kanału, na jakim publikuje intervju z rasijskimi vajennapałonnymi. Jon razmaŭlaje ź ludźmi, a paśla telefanuje ich svajakam u Rasiju i pytajecca, čamu jany adpravili svajho blizkaha zabivać ukraincaŭ. Hetyja videa nabirajuć miljony prahladaŭ.
Babaryka try chviliny adkazvaŭ na pytańnie, čyj Krym. Tak i nie adkazaŭ
Što Babaryka i Kaleśnikava adkazali na pytańni pra vajnu
Kraŭcoŭ pra pieršuju pres-kanfierencyju Babaryki i Kaleśnikavaj: Sprečku razdźmuvali vyklučna ŭ fejsbuku, Łosik toj ža
Rasijski apazicyjanier, jaki vyjšaŭ pa abmienie viaźniami: Dla mianie niedapuščalna dapamahać USU
Kamientary
Siemjam Midiča, Jermaka.. Śpis kamu tut zvanić karotkim nie budzie.
U Pavuka chaj pavučycca kamu treba zvanić.