Fatohraf-ahient Miščuk raskazaŭ svaju viersiju taho, što adbyłosia

Pavialičyć

Ivan Mišyn (źleva) i Ivan Miščuk (sprava). Foty z AIS «Pašpart» my atrymali dziakujučy «Biełpołu» 

«Ja viedaju, što vy čakajecie ad mianie infarmacyi. Mnie treba byŭ čas sabrać fakty, jakija abviarhajuć hetuju infarmacyju», — napisaŭ u čat polskich fatohrafaŭ Miščuk.

Miščuk źviartaje ŭvahu, što jaho ŭzrost u artykule spačatku byŭ paznačany niedakładna (praz techničnuju pamyłku data nasamreč stajała niapravilnaja, ciapier jana vypraŭlena), i asprečvaje:

«U mianie niama druhoha pašparta, ja zajechaŭ pa svaim adzinym dakumiencie Ivana Valeryjeviča Miščuka, a nie niejkaha Ivana Mišyna».

Zrešty, nichto i nie śćviardžaje, što jon pryjechaŭ u Polšču jak Mišyn — havorka pra toje, što ŭ Biełarusi jamu byŭ vydadzieny pašpart dla vykanańnia niejkaha zadańnia. Jakoha — nieviadoma.

Fatohraf tłumačyć, što ŭ padziejach 2020 hoda nie ŭdzielničaŭ, bo z 7 pa 19 žniŭnia lažaŭ u špitali z karanavirusa.

U realnaści pratesty praciahvalisia niekalki miesiacaŭ, u ich uziali ŭdzieł sotni tysiač čałaviek. Miščuk nie byŭ abaviazany ŭdzielničać u ich — choć paśla chvaroby, choć jašče kali, — ale situacyja pakazvaje, što jon nie mieŭ nijakaha dačynieńnia da palityčnaj aktyŭnaści. 

Taksama jon udakładniaje niekalki niepryncypovych techničnych momantaŭ: «U palicyjalnaj škole nikoli nie vučyŭsia. Ja skončyŭ Varšaŭskuju Akademiju fatahrafii 24.06.22. Humanitarnaja viza była vydadziena ŭsiaho na 3 miesiacy — z 15.12.22 pa 15.03.23, a nie na hod».

«U artykule havorycca, što mnoj zacikavilisia ŭ ByPol i pieradali infarmacyju ŭ ofis Cichanoŭskaj, ale ŭ hety ž čas ja atrymaŭ palityčny prytułak u Polščy. Što supiarečyć tamu, što ja śpiecahient. Kali adny nibyta znajšli ŭ mianie druhi pašpart, inšyja dali abaronu, tamu što ja suprać režymu Łukašenki i ja nie ŭjaŭlaju nijakich pahroz», — pierakonvaje Miščuk.

Miščuk piša, što padaŭ na abaronu, kali zakančvałasia humanitarnaja viza, i atrymaŭ dakumient 22 červienia 2023.

Adnak atrymańnie palityčnaha prytułku nie moža ličycca aŭtamatyčnym paćvierdžańniem niedatyčnaści da biełaruskich śpiecsłužbaŭ. Nahadajem, što niadaŭna była hučnaja historyja z byłoj biełaruskaj žurnalistkaj Natallaj Sudlankovaj, jakaja mieła palityčny prytułak u Čechii i šmat hadoŭ pracavała na HRU. Paśla taho, jak čechi zahadali joj pakinuć krainu, jana vyjechała ŭ Maskvu.

Miščuk taksama tłumačyć u čacie: «Na pracu ŭ ABBA nie naviazvaŭsia, mianie zaprasili zdymać forum, jak zvyčajny zapyt, vy mianie razumiejecie, jak nichto inšy». Heta pytańnie interpretacyi. Jon nie naviazvaŭ, ale prapanavaŭ svaje pasłuhi. Naturalny praces, ale jon adbyŭsia vidavočna pa inicyjatyvie Miščuka.

«Ja aktyŭna pisaŭ usim, tamu što šukaŭ pracu i chacieŭ naładzić žyćcio ŭ Varšavie, kab pieravieźci siamju ŭ biaśpiečnuju krainu», — tłumačyć svaju matyvacyju fatohraf.

Naprykancy dopisu uładalnik pašparta prykryćcia paviedamiŭ, što źviarnuŭsia pa dapamohu ŭ «Viasnu».

• 0
• 1
• 38
• 25
• 5
• 0
• 6
• 0