Lehiendarny brytanski futbalist pakinie Bi-bi-si paśla publikacyj u sacsietkach

Taksama jon nie budzie vieści tranślacyi čempijanatu śvietu pa futbole ŭ 2026 hodzie. Pryčynaj zvalnieńnia samaha vysokaapłatnaha viadučaha karparacyi stała publikacyja ŭ sacyjalnych sietkach, jakaja była rasceniena jak antysiemickaja. Aficyjnaje paviedamleńnie čakajecca paźniej u paniadziełak.

Na minułym tydni jamu pryjšłosia prynieści prabačeńni za toje, što jon padzialiŭsia ŭ Instagram rolikam ab sijaniźmie, jaki supravadžaŭsia malunkam pacuka — simvała, jaki histaryčna vykarystoŭvajecca jak antysiemicki abraźlivy štamp.

Liniekier skazaŭ, što hłyboka škaduje ab źmieście publikacyi i dadaŭ, što śviadoma nie staŭ by raspaŭsiudžvać antysiemickija materyjały, a historyju vydaliŭ adrazu ž, jak daviedaŭsia ab simvaliźmie malunka.

Raniej jaho ahient zajaviŭ, što Hary nie zaŭvažyŭ pacuka, a kali b i zaŭvažyŭ, to nie źviazaŭ by z abraźlivym značeńniem.

Tym nie mienš, kiraŭnictva Bi-bi-si paličyła pavodziny Liniekiera škodnymi dla reputacyi viaščalnaj karparacyi.Na minułym tydni hienieralny dyrektar Cim Dejvi zajaviŭ: «Reputacyja Bi-bi-si — heta adkaznaść kožnaha, i kali niechta robić pamyłku, heta doraha nam abychodzicca».

Liniekier — adna z samych paznavalnych asob u krainie, były prafiesijny futbalist i papularny spartyŭny kamientatar — užo nie ŭ pieršy raz apynajecca ŭ centry skandała z-za svaich publikacyj u sacyjalnych sietkach.

U sakaviku 2023 hoda jon napisaŭ u Twitter, što farmuloŭki ŭładaŭ ab mihrantach, jakija prybyvajuć u krainu praz Ła-Manš na nievialikich łodkach, paraŭnalnyja z rytorykaj Hiermanii 1930-ch hadoŭ: tady ŭrad padzialiŭsia płanami aŭtamatyčna vysyłać amal usich mihrantaŭ, jakija prybyvajuć u krainu nielehalna, biez mahčymaści padać prašeńnie ab prytułku. Z-za hetaha pasta ŭ adras Liniekiera prahučali abvinavačańni ŭ parušeńni pryncypu biespartyjnaści, asnoŭnaha dla BBC, i viaščalnik vyrašyŭ časova adstranić jaho ad viadzieńnia papularnaj subotniaj telepieradačy Match of the Day, jakaja analizuje hulni Premjer-lihi. Paśla adstranieńnia Liniekiera mnohija inšyja spartyŭnyja kamientatary karparacyi admovilisia vychodzić u efir u znak salidarnaści ź im.

Paśla hetaha Liniekier pahadziŭsia prytrymlivacca isnujučych praviłaŭ viadzieńnia supracoŭnikami svaich sacyjalnych sietak i znoŭ staŭ vieści pieradaču, a praviły Bi-bi-si, jakija tyčacca pavodzin u sacyjalnych sietkach, byli pierahledžany: ciapier viadučyja klučavych prahram, akramia navin i biahučych padziej — uklučajučy Match of the Day — majuć «asablivuju adkaznaść za zachavańnie pryncypaŭ biespartyjnaści Bi-bi-si z-za svajoj viadomaści».

U listapadzie 2024 hoda Liniekier abviaściŭ ab svaim sychodzie ź pieradačy Match of the Day, ale adznačyŭ, što zastaniecca na Bi-bi-si dla viadzieńnia tranślacyj Kubka Anhlii i čempijanatu śvietu.

U minułym miesiacy ŭ intervju jon zajaviŭ, što, na jaho dumku, Bi-b-si chacieła b, kab jon pakinuŭ Match of the Day, kali jon vioŭ pieramovy ab novym kantrakcie ŭ minułym hodzie: «Nu, mahčyma, jany sapraŭdy chacieli, kab ja pajšoŭ. Takoje ŭražańnie było». U tym ža intervju Liniekier taksama vykazaŭsia ab svaich tvitach 2023 hoda, zajaviŭšy, što nie škaduje ab skazanym, ale dadaŭ: «Zrabiŭ by ja heta znoŭ, viedajučy nastupstvy? Nie, nie staŭ by — z-za ŭsioj toj nikčemnaści, što za hetym nastupiła».

Jon namiaknuŭ, što jaho nastupnaja karjera «nie budzie źviazana z telebačańniem», dadaŭšy, što, chutčej za ŭsio, zasiarodzicca na padkastach.

Bi-bi-si tady nie prakamientavała słovy Liniekiera, ale nazvała jaho «viadučym suśvietnaha ŭzroŭniu» i dabaviła, što prahrama Match of the Day «pastajanna źmianiajecca, padstrojvajučysia pad źmianiajučyjasia zvyčki hledačoŭ». Novymi viadučymi prahramy z pačatku siezona 2025—2026 hadoŭ byli abvieščany Kielli Kiejts, Mark Čepman i Habi Łohan.

Hary Liniekier — adzin z samych viadomych brytanskich futbalistaŭ, hulaŭ z 1978 pa 1994 hady. Vystupaŭ ŭa «Lester», «Eviertan», «Totenchiem» i «Barsiełonu», trojčy stanaviŭsia najlepšym bambardziram čempijanata. Zabiŭ za Anhliju 10 miačoŭ na čempijanatach śvietu. Jamu naležyć fraza «U futboł hulajuć 22 mužčyny, ale vyjhrajuć zaŭsiody niemcy». 

Jaho karjera ŭ ŚMI pačałasia na Bi-bi-si, dzie z kanca 1990-ch hadoŭ jon viadzie hałoŭnuju futbolnuju prahramu «Matč dnia» (anhł. Match of the Day), što źjaŭlajecca samym doŭhim terminam pracy siarod usich viadučych hetaha šou.

• 1
• 0
• 0
• 1
• 0
• 0
• 0
• 0