Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 2026

Na tytulnym fota da hetaha artykuła — robat, jaki dyryžuje arkiestram u kitajskim horadzie Cziańsi 28 śniežnia 2025 hoda. Heta častka novaj realnaści. Kudy ŭsio ruchajecca ŭ najbližejšaj budučyni?

Bieśpierapynnaje navučańnie

Bieśpierapynnaje navučańnie znoŭ źjaviłasia na paradku dnia. Pad bieśpierapynnym navučańniem majucca na ŭvazie sistemy štučnaha intelektu, jakija mohuć praciahvać vučycca paśla zapusku, a nie zastavacca niaźmiennymi paśla adnarazovaha navučańnia.

U teoryi heta dazvalaje madelam adaptavacca da novych źviestak, pavodzin karystalnikaŭ i źmien u asiarodździ. Jość niekalki cikavych idej, ale pakul nivodnaja ź ich nie hatovaja dla šyrokaha i nadziejnaha vykarystańnia. Kab sapraŭdy pravieryć pierśpiektyŭnyja padychody, patrebnyja značnyja biudžety, składanaja infrastruktura i strohi kantrol, kab madel nie «navučyłasia nie tamu, čamu treba».

Zakrytyja i adkrytyja AI-łabaratoryi

Amierykanskija AI-łabaratoryi ŭ značnaj stupieni stali zakrytymi. Heta značyć, što najbolš pieradavyja daśledavańni i madeli bolš nie publikujucca adkryta. Najnoŭšyja techniki treninhu francirnych madelaŭ — samych mahutnych i darahich — siońnia značna mienš dastupnyja hramadskaści, čym hod tamu. Heta, naprykład, zaŭvažna pa publikacyjach i hałoŭnaj kanfierencyi haliny — NeurIPS.

Cikava, što na fonie bolšaj zakrytaści amierykanskich lidaraŭ rynku, kitajskija łabaratoryi ciapier pieraniali estafietu vypusku ŭ śviet madelaŭ z adkrytymi vahami ci navat całkam z adkrytym kodam. Adkryty kod aznačaje, što prahramnaje zabieśpiačeńnie dastupnaje ŭsim. Adkrytyja vahi — što samu navučanuju madel možna ściahnuć i vykarystoŭvać.

DeepSeek-momant i RLVR

DeepSeek-momant mieŭ vialiki ŭpłyŭ na 2025 hod. Jon pakazaŭ, što nievialikija kamandy, vykarystoŭvajučy razumnyja mietady, mohuć dasiahać vynikaŭ, jakija raniej patrabavali vielizarnych resursaŭ.

Źjaviŭsia značny prahres u RLVR — navučańni z padmacavańniem ź vieryfikavanymi ŭznaharodami. Heta mietad, kali madel atrymlivaje «ŭznaharodu» za pravilnyja dziejańni, a pravilnaść možna aŭtamatyčna pravieryć.

Pakul heta lepš za ŭsio pracuje ŭ matematycy i prahramavańni. U 2026 hodzie my, imavierna, ubačym pašyreńnie hetaha kirunku postnavučańnia ŭ fiziku, chimiju i inšyja navuki. Dapamoha navukovym daśledavańniam — adna z hałoŭnych met, ale mahčyma, dla realnaha praryvu spatrebiacca novyja mietady navučańnia madelaŭ.

Pavialičyć

Źviestki i ŭłasnaść

Zbor źviestak ź vieryfikavanymi ŭznaharodami dla biznes-zadač — składanaja sprava.

Bolšaść śpiecyjalizavanych źviestak — pryvatnaja ŭłasnaść kampanij i achoŭvajecca imi, bo heta daje im kankurentnuju pieravahu. Nie tak i prosta pierakanać biznes-lidaraŭ padzialicca takimi źviestkami, naprykład, z OpenAI ci Anthropic.

Madeli siaredniaha pamieru

Vialiki patencyjał u vykarystańni madelaŭ siaredniaha pamieru z adkrytymi vahami i ich navučańni ŭnutry kampanij.

Takija madeli dastatkova mahutnyja, ale značna tańniejšyja ŭ vykarystańni. Heta stanovicca ŭsio bolš ekanamična metazhodna.

Ahienty

2026 hod biez sumnievu zastaniecca hodam ahientaŭ. Ahienty ŠI — heta sistemy, jakija mohuć płanavać dziejańni, vykarystoŭvać instrumienty i vykonvać zadačy.

U 2025 hodzie vialiki pośpiech mieli ahienty dla prahramavańnia. U 2026 hodzie my ŭbačym ich pašyreńnie ŭ inšyja śfiery.

Dla mnohich kampanij aptymalnym vybaram mohuć stać nievialikija madeli, jakija buduć umieć lepš uzajemadziejničać ź instrumientami (prahladać fajły, šukać infarmacyju, vykonvać funkcyi, pisać kod i h.d.).

Vykarystańnie vyličeńniaŭ padčas infierensu

Pavieličeńnie vyličalnych resursaŭ padčas infierensu (momantu, kali madel daje adkaz) maje vialiki patencyjał.

To-bok zamiest taho, kab sprabavać dasiahnuć jak maha lepšych vynikaŭ pry treniroŭcy madelaŭ, maje šmat praktyčnaha sensu pracavać nad madelami, što mohuć apracavać bolšy kantekst (bolšuju kolkaść słoŭ), lepš intehrujucca ź instrumientami i bolš razumna vykarystoŭvajuć resursy.

Pry hetym budzie praciahvacca naroščvańnie infrastruktury bujnymi kampanijami. U hetym płanie 2026 hod moža być jašče bolš haračym, čym minuły.

Vibe coding i testavańnie

Vibe coding, vajb-prahramavańnie, pastupova vyciaśniaje tradycyjnaje prahramavańnie.

Heta padychod, kali raspracoŭščyk zadaje kirunak, a ŠI biare na siabie asnoŭny abjom pracy ŭ napisańni koda ci navat chutčej całkam piša jaho zhodna z zadadzienym płanam. Heta robić testavańnie značna bolš važnym. Kampanijam patrebna inviestavać u aŭtamatyčnyja testy i pravierku jakaści. Mianiajecca i sama rola raspracoŭnika. Jak pažartavaŭ viadomy daśledčyk u halinie ŠI Andrej Karpaci, novaj movaj prahramavańnia stała anhielskaja mova.

Adpaviedna, staryja farmaty techničnych intervju stanoviacca ŭsio mienš karysnymi.

Burbałka i ahulny štučny intelekt

ŠI-burbałka na fondavym rynku supraŭdy isnuje. Mahčyma, jana navat łopnie ŭ 2026 hodzie. Ale navat u hetym vypadku prahres pradoŭžycca. Rynak pierahrety, peŭnyja karektyvy rana ci pozna adbuducca, ale novaj ŠI-zimy, ja dumaju, nie čakajecca. Jak i ahulnaha štučnaha intelektu ŭ nastupnym hodzie čakać usio jašče ranavata.

• 20
• 1
• 0
• 10
• 0
• 0
• 1
• 0