Piasok pa canie plitki: žychar Baranavičaŭ ašaleŭ ad cen na budaŭničy materyjał
Biełarusy abmiarkoŭvajuć rost cen na budmateryjały i dziŭnyja adroźnieńni pa rehijonach.
Ceny na piasok u Baranavičach dasiahnuli 1 000 rubloŭ za mašynu. Svajo abureńnie žychar Baranavičaŭ apublikavaŭ u Threads, i post chutka sabraŭ dziasiatki kamientaryjaŭ ad ludziej z usioj krainy, piša BGmedia.
«Piasok pa canie niatannaj tratuarnaj plitki», — piša aŭtar.
Pavodle jaho słoŭ, za mašynu prosiać kala 800 rubloŭ, a časam cana dachodzić i da 1000. I, jak jon adznačaje, navat za takija hrošy jašče treba znajści pastaŭščyka.
Karystalniki ŭ kamientaryjach paćviardžajuć: ceny sapraŭdy vyraśli i praciahvajuć raści. Niekatoryja sprabujuć patłumačyć situacyju.
«Sam piasok kaštuje niadoraha. Dastaŭka darahaja. Ad hetaha i plašycie».
«Voziać z Zelvy, u nas karjer zakryli».
Ale bolšaść nastrojenaja kudy bolš krytyčna. Ludzi pišuć naŭprost: rynak «razahnali», a ceny — «kosmas».
Asabliva karystalnikaŭ ździŭlaje roźnica ŭ cenach pamiž rehijonami.
U Baranavičach nazyvajuć 800—1000 rubloŭ za mašynu.
U Hrodnie, pavodle słoŭ kamientataraŭ, možna znajści za 250—300 rubloŭ.
U Vaŭkavysku — 10 ton za 180 rubloŭ z dastaŭkaj.
U Homieli — 30 ton za 350 rubloŭ.
U Minskaj vobłaści — 800 rubloŭ za 10 ton, ale jość prapanovy i tańniejšyja — 580 za 20 ton.
Takaja roźnica vyklikaje hałoŭnaje pytańnie: adkul biarucca takija nakrutki? Niekatoryja karystalniki ŭpeŭnienyja, što sprava nie tolki ŭ łahistycy.
«Tut daražej na 30% ad narmalnych cen». «Piasok — kosmas. Jon nie kaštuje takich hrošaj». «Cemient taksama: pavinien być kala 7,5 rubla, a pradajuć pa 10—11».
Ludzi ŭsio čaściej kažuć pra toje, što ich «krychu ašukvajuć», asabliva tych, chto tolki pačynaje budoŭlu i nie aryjentujecca ŭ rynku.
Asobnaja tema — zakryćcio miascovych karjeraŭ. Karystalniki pišuć, što z-za hetaha piasok davodzicca vazić ź inšych rehijonaŭ, što aŭtamatyčna pavialičvaje košt. «Karjer zakryli — cana adrazu ŭźlacieła ŭ kosmas», — adznačajuć u kamientaryjach.
I heta, na dumku mnohich, tolki pačatak. Ludzi čakajuć rostu cen i na inšyja budaŭničyja materyjały — bieton, cemient i suchija sumiesi.
Na fonie abmierkavańnia hučać i zakliki da dziejańniaŭ. Niekatoryja rajać źviartacca ŭ MARH, kab pravieryć abhruntavanaść cen. Ale inšyja staviacca da hetaha skieptyčna: maŭlaŭ, rynak užo daŭno žyvie pa svaich praviłach.
Ciapier čytajuć
Toj samy masažyst raskazaŭ, navošta zdymaŭ hołych klijentak22
Kamientary