Netflix raskazaŭ pra nievierahodny pośpiech sieryjała «Vielmi dziŭnyja spravy». Sieryjał upłyvaje na ŭsie śfiery žyćcia
K vychadu apošniaj sieryi kultavaha sieryjała «Vielmi dziŭnyja spravy» (Stranger Things) Netflix padvioŭ vyniki dzieviacihadovaha isnavańnia svajho hałoŭnaha chita. Sieryjał nie tolki ŭpłyvaje na sučasnuju kulturu i žyćcio maładoha pakaleńnia, ale i słužyć mahutnym ekanamičnym ruchavikom dla cełych štataŭ.
Ekskluziŭnuju statystyku apublikavała vydańnie Variety.
Ličby ŭražvajuć: ahulnaja kolkaść prahladaŭ sieryjała za ŭvieś čas pieravysiła 1,2 miljarda. Hety pakazčyk stavić «Vielmi dziŭnyja spravy» vyšej za luby inšy prajekt u historyi Netflix. Choć asobnyja siezony «Venzdej» i «Hulni ŭ kalmara» majuć bolš prahladaŭ, čym čaćviorty siezon «Dziŭnych spraŭ», nivodzin inšy sieryjał nie moža pachvalicca takoj ahulnaj papularnaściu.
Piaty siezon užo pabiŭ rekord Netflix pa kolkaści prahladaŭ za pieršy tydzień dla anhłamoŭnaha sieryjała, a ŭsiaho za 25 dzion jaho pieršy tom nabraŭ 102,6 miljona prahladaŭ.
Fienomien u tym, što novyja sieryi prymušajuć hledačoŭ viartacca da papiarednich: upieršyniu ŭ historyi stryminhu ŭsie piać siezonaŭ adnaho šou adnačasova apynulisia ŭ top-10 samych papularnych prajektaŭ tydnia.
Upłyŭ sieryjała vyjšaŭ daloka za miežy ekranaŭ, źmianiŭšy navat muzyčnyja čarty i spažyvieckija zvyčki. Dziakujučy čaćviortamu siezonu pieśnia Kiejt Buš «Running Up That Hill» praz 38 hadoŭ paśla vychadu ŭpieršyniu trapiła ŭ top-10 amierykanskich chit-paradaŭ.
Anałahičny los napatkaŭ i kampazicyju Metallica «Master of Puppets». Piaty siezon praciahnuŭ hetuju tradycyju: pa danych Spotify, prasłuchoŭvańni pieśni Dajany Ros «Upside Down» siarod moładzi vyraśli na 1250%.
Navat zamarožanyja vafli Eggo, lubimaja ježa hieraini Adzinaccać, pieražyli sapraŭdny reniesans: paśla vychadu druhoha siezona ich prodažy padskočyli na 14%. Padobny bum adbyŭsia i z nastolnaj hulnioj Dungeons & Dragons, pastajannyja adsyłki da jakoj pavialičyli cikavaść da jaje na 673%.
Sieryjał staŭ i mahutnym ekanamičnym ruchavikom. Z 2016 hoda prajekt stvaryŭ bolš za 8000 pracoŭnych miescaŭ u ZŠA i ŭnios 1,4 miljarda dalaraŭ u VUP krainy. Najbolšuju vyhadu atrymaŭ štat Džordžyja, dzie prachodziła bolšaja častka zdymak.
Akramia taho, byŭ stvorany ceły suśviet vakoł «Dziŭnych spraŭ»: pradadziena bolš za 3,1 miljona knih i komiksaŭ, a žyvoje mierapryjemstva «Stranger Things: The Experience» naviedali 850 tysiač čałaviek u Łos-Andželesie, Łondanie, Paryžy i inšych haradach. Pjesa-prykvieł «Stranger Things: The First Shadow», jakaja debiutavała ŭ Łondanie, atrymała čatyry premii «Toni» i dźvie premii «Aliŭje».
Ale hałoŭnaja spadčyna sieryjała — heta cełaje pakaleńnie maładych akcioraŭ, jakich jon pieratvaryŭ u suśvietnych zorak. Mili Bobi Braŭn (Adzinaccać) stała adnoj z hałoŭnych fihur Netflix, a Sejdzi Sink (Maks), Džozef Kuin (Edzi) i Maja Choŭk (Robin) atrymali roli ŭ bujnych halivudskich prajektach, u tym liku ŭ kinasuśviecie Marvel. Ich papularnaść bačnaja i ŭ sacyjalnych sietkach: kolkaść padpisčykaŭ Mili Bobi Braŭn u Instagram vyrasła z 2,1 miljona da 68 miljonaŭ.
Jak pisała Variety jašče ŭ 2023 hodzie, «Vielmi dziŭnyja spravy» bolš, čym luby inšy sieryjał, dakazali žachlivuju moc Netflix, z kožnym siezonam achoplivajučy ŭsio bolšuju hłabalnuju aŭdytoryju. Finał sieryjała, jaki vyjšaŭ na Novy hod, upieršyniu ŭ historyi stryminhu byŭ pakazany ŭ kinateatrach ZŠA i Kanady i staŭ hodnym zaviaršeńniem cełaj epochi.
Kamientary