Ahient biełaruskaj raźviedki pryznaŭsia, što minuły hod byŭ «prosta p**dziacovym»
Raman Pratasievič, jaki nijak nie znojdzie sabie miesca, pierad Novym hodam apublikavaŭ čarhovy rospačny post.
«Vitaju, čacik!
Apošni post u hetym hodzie jak nikoli padychodzić dla taho, kab skazać, što dla mianie minuły hod byŭ prosta p**dziacovym. Absalutna ŭsio pajšło zusim nie tak, jak ja chacieŭ by ci płanavaŭ. Dy i sustrakać Novy hod ja budu ŭ vielmi depresiŭnym i adčužanym stanie. Ź inšaha boku, usio mahło b być i horš. Ščyra spadziajusia na toje, što ŭsio abaviazkova budzie dobra.
Tak što chaj nastupny hod budzie i dla mianie, i dla vas našmat lepšym za minuły. Lubicie i chaj vas lubiać, idzicie da svaich mar, bolš dumajcie pra siabie i viercie intuicyi! Nu i viadoma ž, ščaścia, zdaroŭja i spadaryni Fartuny.
Usich abniaŭ!»
Nahadajem, što Alaksandr Łukašenka ŭ kastryčniku 2025 hoda nazvaŭ błohiera Ramana Pratasieviča supracoŭnikam svajoj raźviedki.
«Doŭha raskazvać nie budu. Pratasievič — heta supracoŭnik našaj raźviedki. Nam treba było jaho zatrymlivać? A voś pytańnie, čamu jany [rejsam Ryanair] u Vilniu lacieli, tam nie sieli, a raźviarnulisia i ŭ Minsk prylacieli, sieli paśla zvanka, što ŭ ich na borcie tam niejkaja vybuchoŭka… Nu sadziciesia, vy ŭ Vilniu lacieli, nad Vilniaj byli — sadziciesia. Raźviarnulisia, prylacieli ŭ Minsk. Sieli ŭ Minsku. Ja kažu: «Nu što, pravodźcie apieracyju, jon ža pad prykryćciom pracavaŭ hetych źbiehłych. Pravodźcie apieracyju jak naležyć», — zajaviŭ jon.
«Pryjšłosia nam apieracyju pravodzić pa jaho zatrymańni. Chacia nam nie treba było jaho zatrymlivać. Jon pryjechaŭ u Hrecyju, jaho tudy vyklikali, jon davioŭ raźviedčykam usio, što nas cikaviła, atrymaŭ zadańnie i lacieŭ nazad. Tudy, dzie pracavaŭ, praź Vilniu. Nas abvinavacili ŭ tym, što my zatrymali apazicyjaniera. A jon nie naš apazicyjanier. My nie zatrymlivali apazicyjaniera. Voś uviali sankcyi», — skazaŭ jon.
Słovy Łukašenki pra samalot, adnak, byli chłuśnioju. Samalot Ryanair prymusova pasadzili 23 maja 2021 hoda. Dyśpietčar nacyjanalnaha aeraporta daŭ pakazańni, jak jaho dziejańniami ŭ toj dzień kiravaŭ supracoŭnik Kamiteta dziaržaŭnaj biaśpieki Biełarusi.
Pratasieviča i Sapiehu zatrymali, paśla pieraviali pad chatni aryšt da suda. Paźniej Pratasieviču prysudzili 8 hadoŭ kałonii, Sapiezie — 6 hadoŭ, ale praz čas maładych ludziej pamiłavali.
Varta adznačyć, što Raman Pratasievič pierad zajavaj Łukašenki źnik. Jaho nie było vidać užo dva z pałovaj miesiacy.
Asabisty telehram-kanał Pratasieviča nie abnaŭlaŭsia z 18 žniŭnia da 8 listapada.
Telehram-kanał z navinami Sprava, jaki stvaraŭ Pratasievič, novyja dopisy publikuje rehularna. Ale jaho daŭno viadzie nie Pratasievič — rytoryka i temy pastoŭ stali inšymi.
Tyja, chto sprabavaŭ źviazacca z Pratasievičam, kazali, što jon nie adkazvaje na paviedamleńni.
Pierad tym svaim źniknieńniem z radaraŭ jon byŭ zapisaŭ videa, dzie vyhladaŭ strašna pryhniečanym. Jon kazaŭ, što nie moža znajści siabie ŭ Biełarusi, nie moža znajści pracy i chacieŭ by vyjechać za miažu.
17 śniežnia jon raptam abjaviŭsia ŭ jakaści viadoŭcy łukašenkaŭskaha kanała STV.
Raman Pratasievič u svoj čas nabyŭ šyrokuju viadomaść jak adzin z redaktaraŭ papularnaha telehram-kanała Nexta, jaki adyhraŭ važnuju rolu pry kaardynacyi biełaruskich pratestaŭ u 2020 hodzie.
23 maja 2021 hoda Pratasievič razam sa svajoj dziaŭčynaj Sofjaj Sapiehaj byŭ zatrymany ŭ vyniku arhanizavanaj biełaruskimi ŭładami vymušanaj pasadki ŭ Minsku samalota Ryanair, jaki lacieŭ z Afinaŭ u Vilniu. Paśla taho jon pajšoŭ na supracoŭnictva sa śledstvam, dziakujučy čamu jahonyja ŭmovy ŭtrymańnia pad vartaj byli značna miakčejšyja, čym u zvyčajnych palitviaźniaŭ.
Minski abłasny sud 3 maja 2023 hoda prysudziŭ Pratasieviča da 8 hadoŭ pazbaŭleńnia voli va ŭmovach uzmocnienaha režymu. 22 maja 2023 hoda Pratasievič byŭ pamiłavany.
Paśla taho jon niejki čas pracavaŭ zvarščykam na Minskim elektratechničnym zavodzie imia Kazłova, paśla viełakurjeram, barmienam. Ale pry hetym śćviardžaŭ, što maje vialikija ciažkaści z pošukam pracy i brać jaho nidzie nie chočuć.
Ułady nieadnarazova rabili sproby vykarystoŭvać Ramana ŭ svajoj prapahandzie. Jamu stvaryli admysłovy telehram-kanał, adzin čas daručali nazyvać proźviščy palitviaźniaŭ, jakich vyzvalali. Ale ŭrešcie ŭsie hetyja sproby nie mieli asablivaha pośpiechu. Nakolki praciahłaj budzie novaja — pakaža čas.
Za dva dni da svajho rospačnaha pasta Pratasievič apublikavaŭ sarkastyčny kałaž z saboj i prapahandystam Ryhoram Azaronkam.
Raniej vykazvałasia mierkavańnie, što Raman Pratasievič moh być zavierbavany biełaruskimi śpiecsłužbami ŭ 2010-ja, ale razarvać suviazi ź imi paśla taho, jak jamu ŭdałosia vyjechać u Polšču.
Čytajcie taksama: Kaho i čamu zdaŭ Raman Pratasievič. Heta historyja pra toje, jak adno fota moža źmianić usio žyćcio. Mnoha žyćciaŭ
Ciapier Minsk moža vieści składanuju hulniu adnosna jaho, kab vykarystoŭvać jaho dla dyskredytacyi biełaruskaj apazicyi i adnačasova, kab vyjści z-pad sankcyj za prymusovuju pasadku samalota «Rajnejer» u 2021 hodzie.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna6
Kamientary