Dalar pradajuć pa 3 rubli, choć jašče ŭ pačatku hoda jaho kurs nabližaŭsia da 3,5. Što adbyvajecca z valutaj?
Što paŭpłyvała?
Kurs Nacbanka na 8 traŭnia — 3,06 rubla za dalar.
Asnoŭnym faktaram, jaki paŭpłyvaŭ na kurs biełaruski, ekśpiert BEROC Anastasija Łuzhina nazyvaje ŭmacavańnie rasijskaha rubla. Kali ŭ pačatku hoda za dalar davali 113 rasijskich rubloŭ, to bližej da kanca sakavika — 83 rubli.
Druhi momant — dalar prasieŭ da jeŭra. Dziakujučy hetamu my bačym, što jeŭra patańnieŭ značna mienš, čym dalar. Kali ŭ pačatku 2025 hoda za jeŭra davali 3,62 rubla, to ciapier 3,4. Dalar ža ŭ pačatku hoda kaštavaŭ 3,47, a ciapier 3,06.
Źnižeńnie kursu dalara na suśvietnym rynku ekśpiert tłumačyć reakcyjaj na palityku Donalda Trampa.
«Inviestary bačyli ryzyki ŭ toj palitycy, jakuju pravodzić Tramp u dačynieńni da tych ža taryfaŭ. Ale na siońniašni dzień vidavočna, što niejkija žorstkija vykazvańni pakul nie realizujucca. Tamu i źnižeńnie kursu dalara spyniłasia, choć za hety pieryjad dalar patańnieŭ u adnosinach da jeŭra prykładna na 10 adsotkaŭ».
Pry hetym u košyku valut kurs praktyčna nie źmianiŭsia: kali da dalara naš rubiel umacoŭvajecca, to da rasijskaha rubla naadvarot słabieje.
Kali kazać pra ekanomiku ahułam, to ciapierašniaje ŭmacavańnie rubla da dalara maje chutčej časovy charaktar, miarkuje ekśpiert.
Trend moža źmianicca
Što budzie dalej z rasijsim rublom, kurs jakoha ŭpłyvaje i na biełaruski? Tut važnymi zastajucca dva faktary: heta pytańni ekspartu i hieapalityčny faktar.
«Situacyja z ekspartam u Rasii ciapier niadrennaja. Adbyłosia źnižeńnie impartu pry zachavańni ekspartu na ŭzroŭni minułaha hoda. Stanoŭča na kurs rubla ŭździejničajuć čakańni inviestaraŭ u dačynieńni da choć by častkovaha źniaćcia sankcyj. Tamu my majem sumieś hieapalityčnych i ekanamičnych faktaraŭ, jakija ŭpłyvajuć na ŭmacavańnie rasijskaj valuty», — tłumačyć ekśpiert.
Pry hetym isnuje ryzyka taho, što ŭžo bližej da kanca hoda rasijski rubiel stanie stračvać svaje pazicyi. Adna z važnych pryčyn tamu — nizkija ceny na naftu.
«Kali buduć naroščvacca abjomy zdabyčy nafty, to ceny na jaje praciahnuć padać, što pahoršyć ekspartnyja pakazčyki RF. Ale ŭździejańnie bolš tannaj nafty na kurs spracoŭvaje nie adrazu, tamu hety efiekt pačynaje adčuvacca z zatrymkaj».
Ci budzie dalar tańniej za 3 rubli pa Nacbanku?
Łuzhina nie vyklučaje, što my možam ubačyć dalar mienšy za try biełaruskija rubli pa kursie Nacbanka, ale heta nie budzie praciahłaj tendencyjaj.
«Bližej da kanca hoda rubiel pačnie chutčej za ŭsio słabieć, pakolki mocny rubiel stymuluje impart. Pry ŭmovie nizkich cen na enierharesursy heta budzie vieści da płaŭnaha źnižeńnia kursu rasijskaha rubla, i, adpaviedna, biełaruskaha».
Svaju rolu mohuć adyhrać i vyklučna ŭnutrybiełaruskija faktary.
«U kancy minułaha hoda i pačatku hetaha hoda situacyja ŭ źniešnim handli Biełarusi pahoršyłasia. Choć dla valutnaha rynku jana pakul nie krytyčnaja, ale admoŭnaje salda raście».
Kali admoŭnaje salda praciahnie pavialičvacca, heta moža pahoršyć situacyju na valutnym rynku.
Kamientary