Даляр прадаюць па 3 рублі, хоць яшчэ ў пачатку года яго курс набліжаўся да 3,5. Што адбываецца з валютай?
Што паўплывала?
Курс Нацбанка на 8 траўня — 3,06 рубля за даляр.
Асноўным фактарам, які паўплываў на курс беларускі, эксперт BEROC Анастасія Лузгіна называе ўмацаванне расійскага рубля. Калі ў пачатку года за даляр давалі 113 расійскіх рублёў, то бліжэй да канца сакавіка — 83 рублі.
Другі момант — даляр прасеў да еўра. Дзякуючы гэтаму мы бачым, што еўра патаннеў значна менш, чым даляр. Калі ў пачатку 2025 года за еўра давалі 3,62 рубля, то цяпер 3,4. Даляр жа ў пачатку года каштаваў 3,47, а цяпер 3,06.
Зніжэнне курсу даляра на сусветным рынку эксперт тлумачыць рэакцыяй на палітыку Дональда Трампа.
«Інвестары бачылі рызыкі ў той палітыцы, якую праводзіць Трамп у дачыненні да тых жа тарыфаў. Але на сённяшні дзень відавочна, што нейкія жорсткія выказванні пакуль не рэалізуюцца. Таму і зніжэнне курсу даляра спынілася, хоць за гэты перыяд даляр патаннеў у адносінах да еўра прыкладна на 10 адсоткаў».
Пры гэтым у кошыку валют курс практычна не змяніўся: калі да даляра наш рубель умацоўваецца, то да расійскага рубля наадварот слабее.
Калі казаць пра эканоміку агулам, то цяперашняе ўмацаванне рубля да даляра мае хутчэй часовы характар, мяркуе эксперт.
Трэнд можа змяніцца
Што будзе далей з расійсім рублём, курс якога ўплывае і на беларускі? Тут важнымі застаюцца два фактары: гэта пытанні экспарту і геапалітычны фактар.
«Сітуацыя з экспартам у Расіі цяпер нядрэнная. Адбылося зніжэнне імпарту пры захаванні экспарту на ўзроўні мінулага года. Станоўча на курс рубля ўздзейнічаюць чаканні інвестараў у дачыненні да хоць бы частковага зняцця санкцый. Таму мы маем сумесь геапалітычных і эканамічных фактараў, якія ўплываюць на ўмацаванне расійскай валюты», — тлумачыць эксперт.
Пры гэтым існуе рызыка таго, што ўжо бліжэй да канца года расійскі рубель стане страчваць свае пазіцыі. Адна з важных прычын таму — нізкія цэны на нафту.
«Калі будуць нарошчвацца аб'ёмы здабычы нафты, то цэны на яе працягнуць падаць, што пагоршыць экспартныя паказчыкі РФ. Але ўздзеянне больш таннай нафты на курс спрацоўвае не адразу, таму гэты эфект пачынае адчувацца з затрымкай».
Ці будзе даляр танней за 3 рублі па Нацбанку?
Лузгіна не выключае, што мы можам убачыць даляр меншы за тры беларускія рублі па курсе Нацбанка, але гэта не будзе працяглай тэндэнцыяй.
«Бліжэй да канца года рубель пачне хутчэй за ўсё слабець, паколькі моцны рубель стымулюе імпарт. Пры ўмове нізкіх цэн на энергарэсурсы гэта будзе весці да плаўнага зніжэння курсу расійскага рубля, і, адпаведна, беларускага».
Сваю ролю могуць адыграць і выключна ўнутрыбеларускія фактары.
«У канцы мінулага года і пачатку гэтага года сітуацыя ў знешнім гандлі Беларусі пагоршылася. Хоць для валютнага рынку яна пакуль не крытычная, але адмоўнае сальда расце».
Калі адмоўнае сальда працягне павялічвацца, гэта можа пагоршыць сітуацыю на валютным рынку.
Жонка агента-каханка Анжалікі Мельнікавай звязаная з арганізацыяй Руская мадэль эфектыўнага спакушэння21
Каментары