Чалы прааналізаваў дэталі ўкраінскай аперацыі «Павуцінне» і прыйшоў да нечаканай высновы

Як вядома, 1 чэрвеня СБУ масіравана атакавала расійскія аэрадромы дронамі. Спецаперацыя называлася «Павуцінне». Па інфармацыі з украінскага боку, у выніку яе атрымалася паразіць 41 расійскі самалёт. У Германіі заяўляюць, што магло быць пашкоджана каля 10% аб'ектаў стратэгічнай авіяцыі Расіі.

У новым выпуску сваёй аналітычнай праграмы Сяргей Чалы прааналізаваў дэталі гэтай аперацыі.

Ён звяртае ўвагу на тое, што, мяркуючы па фота, самалёты былі літаральна «знішчаныя да тла». Украінскія дроны мэтанакіравана білі па крылах бамбардзіроўшчыкаў, дзе знаходзяцца паліўныя бакі. «То-бок узарваліся запраўленыя самалёты, тыя, што рыхтаваліся да хуткага вылету», — тлумачыць Чалы.

І задаецца пытаннем: да якога вылету рыхтавалася расійская авіяцыя?

На прарасійскім сайце «Царьград» 31 мая — літаральна за дзень да атакі — з'явіўся артыкул пад гучным загалоўкам «Маланка Зеўса — дзясяткі Ту-22 і Ту-95 ВКС Расіі гатовыя да ўдару адплаты».

У артыкуле згадвалася пра буйную перагрупоўку стратэгічнай і франтавой авіяцыі, якую зафіксавалі спадарожнікавыя даныя і адкрытыя крыніцы, «якая можа ўказваць на падрыхтоўку да адной з самых магутных аперацый з пачатку канфлікту ва Украіне».

«Эксперты адзначаюць, што падобная лагістычная авіяцыйная актыўнасць не назіралася з 2021 года», — цытуе аналітык змест артыкула.

Аўтары артыкула, спасылаючыся на заходніх аналітыкаў, пісалі аб тым, што Расія канцэнтравала сілы для каардынаванай ракетнай атакі па ключавых аб’ектах украінскай інфраструктуры — энергетыцы, транспартных вузлах і цэнтрах прыняцця рашэнняў.

«Падобная аперацыя, па некаторых даных, якая атрымала ўмоўную назву «Маланка Зеўса», можа быць звязана з ходам дыпламатычных перамоваў. Яе мэта — прымушэнне Кіева да прыняцця расійскіх умоў пад пагрозай пераходу канфлікту ў максімальна жорсткую і хуткаплынную фазу», — цытуе Чалы.

У артыкуле таксама згадваецца, што «за апошнія дні толькі на адзін расійскі аэрадром было здзейснена мінімум восем рэйсаў Іл-76, як мяркуецца, для дастаўкі буйной партыі ракетнага ўзбраення».

Аналітык звяртае ўвагу, што ў загалоўку артыкула, які з'явіўся за дзень да аперацыі УСУ, прысутнічае слова «адплата». Але адплата за што?

Цяпер артыкул выдалены, але захаваўся ў архівах інтэрнэту.

Павялічыць

Як даводзіць Чалы, украінская атака 1 чэрвеня перапыніла запланаваную Расіяй ракетную атаку пад выглядам аперацыі «Маланка Зеўса», якая рыхтавалася пад чарговы раўнд перамоваў у Стамбуле. І менавіта гэтым тлумачацца «кіслыя твары» расійскай дэлегацыі, якая разлічвала «прад’явіць свае карты».

Дзіўная рэакцыя Пуціна

Замест прызнання страт у авіяцыі, расійская прапаганда адрэагавала інакш. Намеснік міністра замежных спраў Сяргей Рабкоў заявіў, што ўкраінскія атакі былі спробай сарваць другі раўнд перамоў у Стамбуле. Але якія менавіта атакі ён мае на ўвазе?

Адказ на гэта пытанне дае відэа нарады Пуціна з членамі ўрада, якое, па афіцыйных крыніцах, адбылося 4 чэрвеня.

На ім Пуцін просіць старшыню Следчага камітэта Расіі Аляксандра Бастрыкіна зрабіць справаздачу аб выніках расследавання падрываў у ноч з 31 мая на 1 чэрвеня чыгуначных мастоў у Бранскай і Курскай абласцях, у выніку якіх загінулі 7 чалавек. Гэтыя інцыдэнты, а не атака дронаў, сталі асноўнай тэмай нарады.

Аналітык заўважае, што ўся нарада выглядае як пастаноўка. На экране з’яўляецца дзіцячы доктар Леанід Рашаль, які раптам пачынае гаварыць не пра бягучую сітуацыю, а пра тое, як «правільна забралі Крым у 2014-м». Ні слова пра знішчаныя самалёты. Усе акцэнты — толькі на «тэрарызм».

Пад канец нарады Пуцін, чытаючы загадзя падрыхтаваны тэкст з суфлёра, кажа: «Украіна пераўтвараецца ў тэрарыстычную дзяржаву, а яе саюзнікі — у спонсараў тэрарызму. (…) За што іх заахвочваць, даючы перадышку ў баявых дзеяннях, якія будуць выкарыстаныя для напампоўвання рэжыму заходняй зброяй, для працягу гвалтоўнай мабілізацыі і падрыхтоўкі іншых тэрарыстычных актаў, падобных да тых, якія былі ажыццёўлены ў Бранскай і Курскай абласцях».

«Ён гаворыць не аб атаках на самалёты, а аб узрывах мастоў», — адзначае Чалы.

«А зараз складзем 2 плюс 2. На аэрадромах Расіі стаялі запраўленыя, гатовыя да нанясення ракетных удараў самалётаў. Удараў адплаты за тэрарыстычныя акты, якія здарыліся некалькімі гадзінамі раней, ракетамі, якія завозіліся за некалькі дзён да нагоды для ўдараў гэтымі ракетамі», —

акцэнтуе ўвагу аналітык і прыгадвае відэа з дронаў, на якім можна разгледзець тыя самыя крылатыя ракеты, ужо падвешаныя пад крыламі самалётаў, што робіцца непасрэдна за пару гадзін да вылету.

«Вось які зручны тэракт, так?» — іранічна заўважае Чалы.

• 79
• 2
• 2
• 3
• 3
• 1
• 0
• 0