Łukašenka vykryŭ «žulikavatyja schiemy» na pradpryjemstvie Ciacieryna
Siońnia na naradzie pa raźvićci paciarpiełych ad katastrofy na ČAES rajonaŭ Alaksandr Łukašenka vykazaŭ šerah narakańniaŭ pa pracy va ŭschodnich rehijonach Biełarusi. Vysnovy byli zroblenyja ŭ tym liku pa vynikach jahonych niadaŭnich pracoŭnych pajezdak.
«U nas chapaje na zachadzie prablem, ale nie stolki, kolki na Uschodzie. Razbasiačylisia — dalej niama kudy. Ja voś pabyvaŭ u Viciebskaj vobłaści. Dzie b ja ni byŭ, daručyŭ: davajcie surjozna pravierym paśla majoj pajezdki. Kuča pytańniaŭ», — kanstatavaŭ Łukašenka, jakoha cytuje jaho pres-słužba.
U jakaści prykładu jon pryvioŭ naviedvańnie ŭ Kopysi syrarobnaj vytvorčaści — pradpryjemstva, jakoje naležyć TAA «Miłkkop Start» Siarhieja Ciacieryna:
«10-15 hadoŭ tamu pabudavali, dobraje pradpryjemstva i abstalavańnie sučasnaje. Biary małako, pierapracoŭvaj, syry pradavaj. Vuń u Rasii z rukami, z nahami [zabirajuć]. Zarablajcie hrošy. Dyk jany ž mnie ŭ adkrytuju chłusiać. Pytajusia, a kolki možacie pierapracavać? — 200 ton. A pierapracoŭvaje 60.
Dy ničoha padobnaha! Tam byli žulikavatyja schiemy. Nie 60 pierapracujuć tam, a dźvie tony za sutki. A astatniaje małako, što atrymlivali, pierapradavali i na hetym zarablali. Heta jak nazyvajecca? Nu heta my ŭ najbližejšy čas raźbiaremsia», — paabiacaŭ Łukašenka.
Svaju łatyfundyju na Aršanščynie Siarhiej Ciacieryn pačaŭ stvarać u 2018 hodzie pad ciskam Łukašenki. Dla hałaŭnoj siadziby prydvorny biznesmien abraŭ viosku Chimy Aršanskaha rajona. Jana znachodzicca za niekalkich kiłamietraŭ ad Kopysi i vioski Aleksandryja Škłoŭskaha rajona na druhim bierazie Dniapra, adkul pachodzić rod Łukašenki i dzie jon sam pravioŭ svajo dziacinstva.
Ciacieryn niekalki hadoŭ skuplaŭ u hetaj miascovaści ŭčastki «dla viadzieńnia sialanskaj (fiermierskaj) haspadarki». Ahulnaja płošča ziamli, jakaja ciapier u jahonym kiravańni — prykładna 29 hiektaraŭ.
Ale vyhladaje, što Ciacierynu ciapier nadakučyła zajmacca syrarobstvam (kali ŭvohule choć kali heta i tak padabałasia), i niaprofilny aktyŭ jon chacieŭ by skinuć na dziaržavu. Heta vynikaje z apublikavanaha pres-słužbaj Łukašenki videa jahonaj razmovy sa svaimi čynoŭnikami, jakaja nie ŭvajšła ŭ aficyjny pres-reliz.
«Nu a pa hetym syrzavodzie pryncypova raźbirajsia. Kali nie spraŭlajecca — filijałam da Škłoŭskaha zavoda, tam možna zrabić. Ty ž bačyš, što tam šykoŭnaje pradpryjemstva», — źviarnuŭsia Łukašenka da svajho kiraŭnika spraŭ Juryja Nazarava.
Syravarnia ŭ Kopysi, jakuju ŭčora inśpiektavaŭ Łukašenka, naležyć Siarhieju Ciacierynu. Ale, vidać, nie nadta jaho raduje
Łukašenka daručyŭ Piatkievič arhanizavać narady z asnoŭnymi strukturami ŭ krainie
Łukašenka apraŭdvajecca za ideju z pryjezdam 150 tysiač pakistancaŭ — heta, kab «zachavać naš narod»
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary