Сёння на нарадзе па развіцці пацярпелых ад катастрофы на ЧАЭС раёнаў Аляксандр Лукашэнка выказаў шэраг нараканняў па працы ва ўсходніх рэгіёнах Беларусі. Высновы былі зробленыя ў тым ліку па выніках ягоных нядаўніх працоўных паездак.
«У нас хапае на захадзе праблем, але не столькі, колькі на Усходзе. Разбасячыліся — далей няма куды. Я вось пабываў у Віцебскай вобласці. Дзе б я ні быў, даручыў: давайце сур'ёзна праверым пасля маёй паездкі. Куча пытанняў», — канстатаваў Лукашэнка, якога цытуе яго прэс-служба.
У якасці прыкладу ён прывёў наведванне ў Копысі сыраробнай вытворчасці — прадпрыемства, якое належыць ТАА «Мілккоп Старт» Сяргея Цяцерына:
«10-15 гадоў таму пабудавалі, добрае прадпрыемства і абсталяванне сучаснае. Бяры малако, перапрацоўвай, сыры прадавай. Вунь у Расіі з рукамі, з нагамі [забіраюць]. Зарабляйце грошы. Дык яны ж мне ў адкрытую хлусяць. Пытаюся, а колькі можаце перапрацаваць? — 200 тон. А перапрацоўвае 60.
Ды нічога падобнага! Там былі жулікаватыя схемы. Не 60 перапрацуюць там, а дзве тоны за суткі. А астатняе малако, што атрымлівалі, перапрадавалі і на гэтым зараблялі. Гэта як называецца? Ну гэта мы ў найбліжэйшы час разбярэмся», — паабяцаў Лукашэнка.
Сваю латыфундыю на Аршаншчыне Сяргей Цяцерын пачаў ствараць у 2018 годзе пад ціскам Лукашэнкі. Для галаўной сядзібы прыдворны бізнэсмен абраў вёску Хімы Аршанскага раёна. Яна знаходзіцца за некалькіх кіламетраў ад Копысі і вёскі Александрыя Шклоўскага раёна на другім беразе Дняпра, адкуль паходзіць род Лукашэнкі і дзе ён сам правёў сваё дзяцінства.
Цяцерын некалькі гадоў скупляў у гэтай мясцовасці ўчасткі «для вядзення сялянскай (фермерскай) гаспадаркі». Агульная плошча зямлі, якая цяпер у ягоным кіраванні — прыкладна 29 гектараў.
Але выглядае, што Цяцерыну цяпер надакучыла займацца сыраробствам (калі ўвогуле хоць калі гэта і так падабалася), і няпрофільны актыў ён хацеў бы скінуць на дзяржаву. Гэта вынікае з апублікаванага прэс-службай Лукашэнкі відэа ягонай размовы са сваімі чыноўнікамі, якая не ўвайшла ў афіцыйны прэс-рэліз.
«Ну а па гэтым сырзаводзе прынцыпова разбірайся. Калі не спраўляецца — філіялам да Шклоўскага завода, там можна зрабіць. Ты ж бачыш, што там шыкоўнае прадпрыемства», — звярнуўся Лукашэнка да свайго кіраўніка спраў Юрыя Назарава.
Цяпер чытаюць
Вядучы СТБ Раман Пратасевіч пабраўся шлюбам трэцім разам33
Каментары