U Minsku ludziej karmili zdychlacinaj, navat dziaciej u sadkach

Piać hadoŭ u Minsku i rajonie ludziej karmili miasam z mohilnikaŭ. Pra heta stała viadoma z dakłada Hienieralnaj prakuratury, tekst jakoj «Biełpoł» zdabyŭ i pieradaŭ «Biełsatu». Vyjaŭlenyja ŭdzielniki arhanizavanych hrup, jakija pierapracoŭvali padal, jakuju źbirali ŭ Homielskaj, Minskaj i Mahiloŭskaj abłaściach.

List ab pryčynach niezakonnaha abarotu miasa staršynia Śledčaha kamiteta Dźmitryj Hara skiravaŭ u sakaviku tahačasnamu premjer-ministru Ramanu Hałoŭčanku.

Paźniej vice-premjer pa sielskaj haspadarcy Juryj Šulejka razasłaŭ ministram handlu, sielskaj haspadarki, achovy zdaroŭja, staršyniam abłvykankamaŭ, a taksama staršyni Dziaržstandartu prośbu razhledzieć uźniatyja SK prablemy. 

Śledstva ličyć arhanizataram schiemy indyvidualnaha pradprymalnika Alaksandra Staravojtava. Schiema dziejničała ŭ 2021—2024 hadach.

Jak miarkuje SK, Staravojtaŭ mieŭ pad kantrolem try TAA: «ReałMitHandal», «Ahramitstar» (spyniła dziejnaść u vyniku rearhanizacyi 28 śniežnia 2023 hoda) i «Mitkonier». Pieršaja firma zakuplała, u tym liku praź biržu, miasa i pieradavała druhoj firmie pierapracoŭvać i fasavać. Ale štuka ŭ tym, što zakonna kuplenuju jałavičynu źmiešvali ź niezakonna zdabytaj, u tym liku z padłaj.

Śledstva dakazała, što na pierapracoŭvańnie pastupiła nie mienš za 57 tonaŭ niedabrajakasnaha miasa.

Narychtoŭčy cech dziejničaŭ u najmanym pamiaškańni ŭ žyłym masivie stalicy. Paznačany ŭ liście adras — vuł. Lidskaja, 22 — supadaje z adrasam ŽEU № 9 Frunzienskaha rajona Minska. Pad tym ža adrasam mieściacca punkt achovy paradku, vieterynarnaja klinika, dziciačyja i darosłyja studyi tancaŭ i śpievaŭ. 

Pavialičyć

Hety cech farmalna naličvaŭ 5,5 pracaŭnika: buchhałtar na paŭstaŭki, adzin žyłoŭščyk miasa, dyrektar, technołah, vieterynar i prybiralnik.

Jak śćviardžaje SK, da pracy ź miasam pryciahvali «roznych asob, u tym liku tych, jakija viali asacyjalny ład žyćcia, biez afarmleńnia pracoŭnych stasunkaŭ i vykanańnia patrabavańniaŭ nakont abaviazkovaha papiaredniaha miedyčnaha ahladu».

Pierapracoŭvali nie mienš za tysiaču tonaŭ pradukcyi za hod, vyśvietlili śledčyja.

«Ahramitstar» i «Mitkonier» nazyvali siabie abjektami hramadskaha charčavańnia. Jak jany, tak i «ReałMitHandal», nie byli navat u Handlovym rejestry ci Rejestry vytvorcaŭ. 

Paśla pierapracoŭvańnia firma pradavała paŭfabrykaty optam, u tym liku HKUP «Drobnaaptovaja baza na Zachodniaj».

Jakraz apošniaja kampanija zabiaśpiečvała praduktami sadki Minska i rajona, a taksama škoły i balnicy.

Ułady spravu zasakrecili, ale infarmacyju apubličyŭ «Biełpoł», u ruki jakoha trapiŭ dakład Hienprakuratury.

• 1
• 0
• 8
• 19
• 13
• 1
• 14
• 0