Kitaj rychtuje misiju dla abarony Ziamli ad asteroida. Što za jon i nakolki mocna pahražaje płaniecie?

Na fonie abnaŭleńnia danych pra asteroid 2024 YR4 Kitaj abviaściŭ ab stvareńni śpiecyjalnaj kamandy dla abarony Ziamli ad kaśmičnych pahroz. Užo ŭ studzieni kraina pačała nabor śpiecyjalistaŭ pa płanietarnaj abaronie, prapanoŭvajučy vakansii ŭ śfiery manitorynhu kaśmičnych ciełaŭ i naładžvańnia sistem rańniaha papiaredžańnia, paviedamlaje vydańnie South China Morning Post.

Adkaznaść za hety prajekt uziaŭ na siabie kitajski Centr śpiecyjalnych prajektaŭ pry Dziaržaŭnym upraŭleńni abaronnaj navuki, techniki i pramysłovaści (SASTIND), jaki zajmajecca raźvićciom aerakaśmičnych technałohij. Ustanova ŭžo zajaviła pra namier raspracavać novyja sistemy nazirańnia za kaśmičnaj prastoraj vakoł Ziamli i padrychtavać instrumienty dla źmieny trajektoryi kaśmičnych ciełaŭ ci ich źniščeńnia na biaśpiečnaj adlehłaści ad płaniety.

Asteroid 2024 YR4, jak vynikaje z nazvy, byŭ vyjaŭleny tolki ŭ minułym hodzie (ŭ kancy śniežnia), kali addalaŭsia ad Ziamli, što ŭskładniaje zbor dakładnaj infarmacyi ab jaho pamierach i trajektoryi. Ale pavodle apošnich danych Jeŭrapiejskaha kaśmičnaha ahienctva i NASA, asteroid maje dyjamietr kala 90 mietraŭ, što supastaŭna z vyšynioj Statui Svabody ŭ Ńju-Jorku, i moža ŭpaści na płanietu ŭ kancy 2032 hoda ź vierahodnaściu 2,2% (miesiac tamu hety šaniec aceńvaŭsia ŭ 1,2%).

Kali adbudziecca sutyknieńnie, to jano moža vyklikać vybuch mahutnaściu da vaśmi miehaton — u 500 razoŭ mahutniej za atamnuju bombu, skinutaj na Chirasimu — što zdolnaje źniščyć ceły miehapolis ź miljonami žycharoŭ ci vyklikać pry padzieńni ŭ akijan vielizarnyja cunami vyšynioj da 100 mietraŭ.

U hrupie ryzyki, pavodle papiarednich danych, znachodziacca terytoryi 10 krain: Indyi, Pakistana, Banhładeš, Efiopii, Sudana, Nihieryi, Vieniesueły, Kałumbii, Ekvadora i Kitaja. Taksama vierahodna sutyknieńnie asteroida ź Miesiacam, a nie ź Ziamloj. Ale bolšaść navukoŭcaŭ miarkuje, što kaśmičnaje cieła pralacić mima ci vybuchnie ŭ pavietry biez usialakaj škody dla płaniety. 

Ažyćciavić kančatkovy analiz trajektoryi i pamieraŭ asteroida možna budzie tolki padčas nastupnaha zbližeńnia z našaj płanietaj u 2028 hodzie. Pry hetym, niahledziačy na nizkuju vierahodnaść sutyknieńnia z 2024 YR4, jahonaje adkryćcio nahadvaje pra važnaść svoječasovaha vyjaŭleńnia asteroidaŭ i stvareńnia efiektyŭnych technałohij dla ich adchileńnia, piša SCMP.

Čałaviectva pavinna stavicca da takich pahroz surjozna, bo luboje ihnaravańnie moža mieć katastrafičnyja nastupstvy, padkreślivajuć navukoŭcy.

Krainy Zachadu taksama aktyŭna pracujuć nad prajektami dla abarony Ziamli ad kaśmičnych pahroz. NASA, adzin ź lidaraŭ u hetaj halinie, z 2016 hoda viadzie prahramu manitorynhu i rańniaha papiaredžańnia ab niebiaśpiečnych abjektach. Niadaŭna ahienctva praviało misiju DART, padčas jakoj kaśmičny aparat upieršyniu ŭ historyi paśpiachova źmianiŭ trajektoryju asteroida. 

• 5
• 0
• 0
• 0
• 1
• 0
• 0
• 1