«Jon atrymaŭ polskaje hramadzianstva za 9 miesiacaŭ»: Cimanoŭskaja ŭ šoku ad taho, što jaje były muž viarnuŭsia ŭ Minsk

Nahadajem: Kryścina Cimanoŭskaja i Arsienij Zdanievič byli razam dzieviać hadoŭ, ź ich šeść u aficyjnym šlubie. U chutkim časie paśla hrandyjoznaha skandału z udziełam Kryściny na Alimpijadzie ŭ Tokia Arsienij źjechaŭ ź Biełarusi, paličyŭšy, što jamu niebiaśpiečna tam zastavacca.

Paźniej biahucha raspaviadała, što za dva hady vymušanaha pierajezdu ŭ Polšču jany niekalki razoŭ razychodzilisia. U intervju «Našaj Nivie» Kryścina kazała, što emihracyja stała dla ich adnosin składanym vyprabavańniem: «Mahčyma, prablemy byli praz naš raptoŭny pierajezd, praz toje, što my aboje stracili ŭsio, što ŭ nas było. Niejki čas ja była ŭ depresii, i heta nie vielmi dobra adbivałasia na našych adnosinach».

Pavialičyć

U vyniku para ŭsio ž raźviałasia ŭ 2023 hodzie. A Kryścina abvinavačvała byłoha muža nie tolki ŭ zdradach, ale i ŭ finansavych machinacyjach.

U niepryhožaj historyi sprabavała razabracca «Trybuna». Vydańnie pisała, što Arsienij Zdanievič razam ź biełaruskim płyŭcom Jaŭhienam Curkinym (byłym mužam Alaksandry Hierasimieni) pačaŭ zajmacca biznesam — kuplaj i dastaŭkaj aŭtamabilaŭ z ZŠA.

Pradpryjemstva pracavała tak: mašyny kuplali na aŭkcyjonie, ramantavali i dastaŭlali klijentam u Polšču.

Adnak urešcie supracoŭnictva z Curkinym nie atrymała raźvićcia i naohuł zharnułasia. Jašče viasnoj minułaha hoda «Trybunie» stała viadoma pra vychad Curkina z aŭtamabilnaha prajekta. Były muž Cimanoŭskaj praciahnuŭ haniać mašyny ŭžo ŭ adzinočku. Adnak vielmi padobna, što ŭ biznesie ŭ Zdanieviča paŭstali prablemy.

U materyjale «Trybuny» zhadvajecca, što Zdanievič zarehistravaŭ u Polščy kampaniju USA CAR EXPRESS, jakaja zajmałasia dastaŭkaj aŭtamabilaŭ z ZŠA. Adnak z vosieni 2023 hoda klijenty nie atrymlivali abiacanyja mašyny i nie mahli źviazacca z Zdanievičam.

Paviedamlałasia, što sam Arsienij pajechaŭ u Hruziju, dzie praciahvaŭ vieści raskošny ład žyćcia, kuplaŭ darahija rečy, ale nie vykonvaŭ abaviazacielstvy pierad klijentami.

Cimanoŭskaja raskazała, što Zdanievič nibyta prysabiečyŭ dźvie mašyny, jakija byli kuplenyja za jaje $30 tysiač, a taksama nie viarnuŭ joj $3 tysiačy doŭhu.

Kryścina navat zajaŭlała, što «kali raptam niejki dobry advakat hatovy ŭziacca za hetuju spravu z mašynami, kab dapamahčy i mnie, i inšym, to ja z zadavalnieńniem budu supracoŭničać i navat hatovaja paspryjać u pazbaŭleńni [Arsienija Zdanieviča] polskaha hramadzianstva, tamu što jon heta hramadzianstva atrymaŭ dziakujučy mnie».

I voś ciapier biahucha zaŭvažyła, što były kachany spakojna tančyć u ryłsie minskaj «Miehamyjni» na vulicy Karala. U podpisu da žartlivaha videa pytajucca: «Kamu dać premiju?». Darečy, apublikavany jon 21 studzienia.

Pavialičyć

Kryścina ŭ šoku ad taho, što były muž u pryncypie advažyŭsia pierasiekčy miažu radzimy (chacia ŭdakładniaje, što, zhodna ź jaje infarmacyjaj, Arsienij spačatku pajechaŭ u Rasiju, a potym u Biełaruś):

«Pa-pieršaje, jon atrymaŭ u Polščy polskaje hramadzianstva praz podpis prezidenta za 9 miesiacaŭ, tamu što źjaŭlajecca palityčnym uciekačom i pry padačy na ​​hramadzianstva paznačyŭ u ankiecie, što jamu niebiaśpiečna viartacca ŭ Biełaruś. Pa-druhoje, jon davaŭ šmat intervju suprać ułady, a taksama ŭ jaho było šmat storys pra 2020, vybary, mitynhi i vajnu va Ukrainie. Pa-treciaje, razam sa mnoj jon chadziŭ na mitynhi ŭ Polščy i nasiŭ BČB-ściah».

Taksama jana śćviardžaje, što Arsienija šukaje palicyja ŭ dźviuch krainach.

Kryścina tehnuła ŭ svaich storys akaŭnty MUS Biełarusi, a taksama pamiežnaj słužby.

• 6
• 3
• 30
• 102
• 3
• 1
• 5
• 0