«Chachłuša kanał viadzie». Fanatka Łukašenki abraziła ŭkrainku i palivaje brudam Litvu, dzie sama pracuje
Biełaruska Karyna Mond žyvie na dźvie krainy — Litvu i Biełaruś. Jana nie chavaje svaju nieluboŭ da ŭsiaho litoŭskaha, zatoje zachaplajecca Łukašenkam.
Miarkujučy pa sacyjalnych sietkach Karyny, u 2019 hodzie jana vyjšła zamuž za litoŭca i asieła ŭ Vilni. Tut zajmałasia biznesam: mieła svaju bjuci-škołu, u jakoj vučyła dziaŭčat na majstraŭ manikiuru i piedykiuru. Taksama Karyna handlavała ŭsim nieabchodnym dla manikiurščyc. Śćviardžaje, što sama pracuje ŭ bjuci-śfiery 28 hadoŭ.
Pa dopisach Karyny ŭ instahramie bačna, jak joj nie padabałasia novaja kraina. Naprykancy 2024 hoda jana paviedamiła, što pierajechała ŭ Minsk. Ale paznačyła ŭ instahramie, što pracuje ŭ Litvie.
Tady adna z padpisčyc spytała, ci składana žyć na dźvie krainy. Na što Karyna adkazała: «Kruta, kali abiedźvie krainy kłasnyja. Ale voś Litva ŭ paraŭnańni ź Minskam — siało ŭ tundry ź nieadekvatnymi ludźmi. Tamu chutčej dziŭna — ty byccam padarožničaješ u časie. Nu a ciažka — nie, kali ty lubiš padarožničać».
Niadaŭna Karyna abraziła ŭkrainku, jakaja viadzie akaŭnt pra padziei ŭ Vilni. Nianaviść vyklikała toje, što administratarka instahram-akaŭnta «Nužnyj spravočnik Vilniusa» apublikavała ŭ storys navinu, što ŭ suviazi z vybarami ŭ Biełarusi litoŭskija pamiežniki ŭzmacnili achovu miažy.
«Voś jašče adna traŭma. Chachłuša kanał viadzie, i tak joj zaŭsiody chočacca pakazać, jak Biełaruś prynižajuć. I ŭsio nijak nie atrymlivajecca», — imavierna, Karyna chacieła adpravić paviedamleńnie kamuści ź siabrovak, ale dasłała mienavita administratarcy akaŭnta.
Ale ž na hetym biełaruska nie supakoiłasia. Razam ź siabroŭkaj — prapahandystkaj STB Kaciarynaj Zabiańko (jakaja ŭ 2020 hodzie škadavała amapaŭcaŭ) — Karyna pajšła na finał akcyi «Marafon adzinstva» ŭ «Minsk-Arenie».
«A hetaje videa śpiecyjalna źniata dla tych, čyj uzrovień intelektu nie dasiahaje navat viedańnia ściahoŭ krain-susiedziaŭ. Ściahi krain vučać jašče ŭ sadku ci ŭ małodšych kłasach», — aburyłasia Karyna ŭ storys. Mahčyma, joj nie padabajecca, što ŭ Litvie bieł-čyrvona-bieły ściah možna pabačyć čaściej za čyrvona-zialony.
Žančyna zamiłoŭvałasia vystupam Koli Łukašenki: «Koleńka. Hanarusia. A što ŭmieje syn vašaha prezidenta?». Ad źjaŭleńnia Łukašenki-starejšaha jana, zdajecca, adčuła kulminacyju patryjatyčnych pačućciaŭ: «I tut ja pavaročvajusia. A Baćka prosta pobač staić, rodnieńki, prosta ŭ prachodzie. Prosta pobač-pobač».
Ciapier Karyna znoŭ pryjechała ŭ Litvu i krytykuje tych, chto choča nabyć frezu praź litoŭskamoŭny akaŭnt jaje kramy. Tłumačyć svajo razdražnieńnie tak: «Ja zrazumieła: niervova-prypadkavaj ja stanaŭlusia, tolki kali pierasiakaju piardzianskuju miažu» (tak žančyna nazyvaje litoŭskuju miažu).
Biełaruskaja biznes-łedzi, jakaja žyvie ŭ Litvie, uklučyła navahodni zvarot Łukašenki. I adchapiła ŭ sacsietkach
Režysiorka kancertaŭ dla Łukašenki śviatkavała Novy hod i Rastvo ŭ Vialikabrytanii — šmat FOTA
«Nu kajf ža!» Kamientatarka «Biełaruś 5» Daryna Zapolskaja adpačyvaje ŭ Francyi FOTA
Pakul Łukašenka skardzicca na biełarusaŭ za luboŭ da Versace, prapahandystka pachvaliłasia ich parfumaj
Kamientary