Francuzskija čynoŭniki patrabavali ŭsypić dzika, jaki žyvie na fiermie. Za jaho zastupilisia tysiačy čałaviek, u tym liku Bryžyt Bardo
Fiermierka Ełod Kapie vyratavała maleńkaje dzikaje parasia, i jano stała sapraŭdnym členam siamji. Adnak ułady patrabavali ŭsypić žyviolinu, i ŭ jaje abaronu pačałasia cełaja mižnarodnaja kampanija.
Francuzski sud dazvoliŭ zavodčycy koniej Eładzi Kapie pakinuć dzika Ryjet, jaki žyvie na jaje fiermie. Čynoŭniki patrabavali žyviolinu ŭsypić, i heta vyklikała burnyja pratesty.
Eładzi znajšła dzikaje parasia kala śmiećcievych bakaŭ u siabie na stajni ŭ śniežni 2023 hoda. Fiermierka vyratavała žyviolinu ad hibieli i pasprabavała prystroić jaje ŭ jaki-niebudź pryrodny park.
Adnak nichto brać Ryjet — dzika nazvali ŭ honar francuzskaha paštetu — nie zachacieŭ. Niekatoryja adkryta kazali žančynie, što žyviolinu lepš prystrelić. Tady Eładzi vyrašyła pakinuć Ryjet u siabie, piša The Guardian.
Fiermierka sterylizavała i vakcynavała Ryjet. Dla novaha žychara Ełod pabudavała asobny valjer z usim nieabchodnym. Pastupova parasia vyrasła ŭ vialikaha dzika i stała členam siamji. Pa słovach haspadyni, Ryjet pavodzić siabie, jak sabaka: jana ŭmieje vykonvać kamandy i chutka prybiahaje, kali jaho zavuć pa imieni. Dzik pasiabravaŭ z końmi i sabakami i viesieła pravodzić čas na fiermie.
Eładzi sprabavała atrymać dazvoł na ŭtrymańnie dzika, adnak čynoŭniki byli kateharyčna suprać. Ułady departamienta nazyvali situacyju niezakonnaj. Na ich dumku, dzik moža być pieranosčykam afrykanskaj čumy śviniej abo tubierkulozu i pahražać zdaroŭju žyvioł i ludziej. Arhumient Eładzi, što fierma znachodzicca daloka ad viosak i akružanaja lesam, nie pracavaŭ. Čynoŭniki pahražali zabrać Ryjet i ŭsypić jaje. A Eładzi pahražała turma i štraf da 150 tysiač jeŭra za niezakonnaje ŭtrymańnie dzikaj žyvioliny.
Tady ŭ siecivie pačałasia cełaja mižnarodnaja kampanija ŭ abaronu dzika. Da jaje padklučylisia papularnyja błohiery, niekatoryja palityki i navat lehiendarnaja aktrysa i viadomaja zoaabaronca Bryžyt Bardo.
«Dapamažycie! Ja patrabuju, kab Ryjet paškadavali. Jakija pačvary patrabujuć jaje ŭsypić… Hetaja maleńkaja žyviolina maje prava žyć, i heta naš abaviazak. Jana nievinavataja. Usypleńnie — heta złačynstva! My znachodzimsia pad kiravańniem zabojcaŭ», — napisała Bardo ŭ adkrytym liście.
Pietycyju ŭ abaronu Ryjet padpisali amal 200 tysiač čałaviek, miascovyja žychary arhanizavali maŭklivy marš. U čaćvier sud staŭ na bok Eładzi Kapie: jon zahadaŭ prefiektury pierahledzieć zajaŭku na ŭtrymańnie Ryjet i vypłacić fiermiercy 1500 jeŭra kampiensacyi.
Pa słovach Ełod, Ryjet naviny nie asabliva chvalavali: «Jana prosta biehaje i hulaje, joj usio adno. I jana zastaniecca z nami».
Ciapier čytajuć
Łatuška: U Piatkievič treślisia ruki, hałava, jana tupała, kryčała: «Vy nasadžajecie nacyjanalizm»39
Kamientary