Zamiežniki skardziacca — u biełaruski ŭniviersitet nie pastupiš biez pasiarednikaŭ
Studenty-zamiežniki — užo tradycyjnaja krynica hrošaj dla biełaruskich univiersitetaŭ. Ale kali jedzieš u Biełaruś pa dypłom, časta musiš zapłacić i ahienctvam-pasiarednikam, pryčym ceny dachodziać da socień dalaraŭ. Pastupić biez ahienctvaŭ zmoža nie kožny.
Pra svoj dośvied z ahienctvami napisaŭ karystalnik sacsietki Reddit. U publikacyi jon raskazaŭ, što žadaje vučycca ŭ Biełarusi, ale maje prablemu — univiersitety prymušajuć jaho źviartacca da ahientaŭ-pasiarednikaŭ.
Hetyja ahienty patrabujuć vypłacić im napierad šmat hrošaj. Aŭtar pasta nie žadaje hetaha rabić, bo nie viedaje, ci moža jon daviarać ahienctvam, i tamu chacieŭ by pastupić va ŭniviersitet biez pasiarednikaŭ abo znajści nadziejnaha ahienta. Zamiežnik adpraŭlaŭ listy nakont pastupleńnia ŭ roznyja ŭniviersitety, ale nidzie jamu nie adkazali.
Voś što jon zdoleŭ daviedacca:
«Niekatoryja studenty kažuć, što ŭniviersitety staviać ahientaŭ u pryjarytet, bo tyja vyrašajuć usie pytańni z papierami, vizami i žyllom. Mnie skazali, što mnie moža spatrebicca try tysiačy dalaraŭ najaŭnymi ŭ aeraporcie na roznyja vypłaty i vydatki pa žyllu».
Adzin z kamientataraŭ, hramadzianin Iraka z dośviedam navučańnia ŭ Hrodna, piša, što pamiž ahientami i ŭniviersitetami isnuje damoŭlenaść — nibyta kali ahient paśpiachova rehistruje studenta va ŭniviersitecie i vykonvaje ŭsie farmalnaści, univiersitet spłočvaje jamu častku (kala 400 dalaraŭ) ad tych hrošaj, jakija student płacić za pieršy siemiestr navučańnia.
«Chutčej za ŭsio, vy budziecie sutykacca z hetym nieparadkam tolki ŭ pieršym siemiestry. Z druhoha siemiestra, padabajecca vam heta ci nie, vam daviadziecca spraŭlacca z usim samastojna — zdahadajciesia, čamu? Univiersitety płaciać hetym ahientam, tolki kali tyja paśpiachova zarehistrujuć novych studentaŭ. Tamu kali vy źviernieciesia da ahienta pa dapamohu ŭ druhim siemiestry, jon nikoli nie adreahuje».
U kamientarach taksama zhadvajuć tureckaje ahienctva, jakoje pracuje z budučymi studentami MDŁU. Pavodle słovaŭ adnaho z karystalnikaŭ, jon sekanomiŭ 1500 dalaraŭ, tamu što napisaŭ u sam univiersitet i pastupiŭ tudy biez dapamohi ahienctva.
Znajści takija ahienctvy ŭ siecivie nieskładana. Da prykładu, na staroncy tak zvanaha Belarus Admission Center pieraličanyja pryčyny, čamu zamiežnikam treba jechać u Biełaruś pa «najlepšuju ŭ Jeŭropie adukacyju». Heta toje, što biełaruskija dypłomy byccam by pryznajucca pa ŭsim śviecie i adukacyja ŭ Biełarusi maje dobruju jakaść.
Taksama ahienty pišuć, što ŭ Biełarusi jość šyroki vybar kursaŭ dla navučańnia, i ceny takija, što zamiežniki mohuć sabie dazvolić. U dadatak, zamiežnikaŭ prymajuć u biełaruskija ŭniviersitety bieź siertyfikataŭ, jakija dakazvali b viedańnie anhlijskaj movy.
Studenty-zamiežniki časta pryjazdžajuć u Biełaruś pa miedyčnuju adukacyju, i BDMU nie chavaje svajho supracoŭnictva z ahienctvami-pasiarednikami. Na anhłamoŭnaj staroncy sajta jość ceły śpis takich ahienctvaŭ, dzie paznačana — mieduniviersitet maje ź imi pahadnieńni pa supracoŭnictvie ŭ rekrutynhu, nakiravańni i zaprašeńni zamiežnikaŭ na navučańnie. Praŭda, BDMU padkreślivaje na toj samaj staroncy, što nie maje z hetymi pasiarednikami finansavych adnosinaŭ.
Na staroncy adnaho z hetych partnioraŭ, Word Platinum International, znachodzim infarmacyju pra ceny ich pasłuh dla zamiežnikaŭ. Havorka pra kursy ruskaj movy ŭ BDTU — heta nie vyšejšaja adukacyja, ale zatoje zrazumieła, ź jakimi sumami pracuje ahienctva.
Naprykład, vy žychar Turcyi i žadajecie miesiac pavučycca ruskaj movie ŭ BDTU. Pa abiacańniach ahienctva, jano padrychtuje dla vas usie dakumienty, dapamoža ź vizaj i kvitkami sa Stambuła ŭ Minsk i nazad, zabiaśpiečyć miedyčnyja ahlady i pražyvańnie ŭ studenckim internacie, budzie dapamahać z pytańniami padčas navučańnia i mihracyjnymi prablemami.
Usio heta budzie kaštavać 1220 dalaraŭ.
«Naša Niva» — bastyjon biełaruščyny
PADTRYMAĆ
Były biełaruski vajar sutki katavaŭ svajho siabra, a paśla zabiŭ siabie1
Kamientary