Aktyŭna abmiarkoŭvajuć niezvyčajny vobraz kanclera Hiermanii Ołafa Šolca, jaki pryjechaŭ va Ukrainu z tajamničaj valizkaj i sam biez dapamohi achoŭnikaŭ nios jaje ŭ rukach. Što tam było ŭnutry?
Mnohija źviarnuli ŭvahu na toje, što kancler Hiermanii Ołaf Šolc pryjechaŭ u Kijeŭ ź vialikaj aluminijevaj valizkaj, jakuju ŭ niazvykłaj dla pieršych asob maniery nios u rukach samastojna, što vyklikała šmatlikija pytańni i žarty ŭ niamieckich i ŭkrainskich sacsietkach, piša vydańnie Der Spiegel.
Na supolnaj pres-kanfierencyi z prezidentam Ukrainy Uładzimiram Zialenskim žurnalisty vyrašyli padniać temu tajamničaj valizki i pacikavilisia ŭ kanclera Hiermanii, što tam unutry.
«Što ŭ valizcy? Hrošy, zbroja ci moža mini-Taurus?» — spytali ŭkrainskija žurnalisty.
Šolc, zvyčajna strymany, u adkaz pažartavaŭ: «Heta prosta rečy dla padarožža: bializna i ŭsio, što treba ŭ darozie».
Zialenski adreahavaŭ na dyjałoh śmiecham, ale hetaja scenka tolki padkreśliła, što čakańni Ukrainy ŭ adnosinach da Hiermanii zastajucca vielmi vysokimi, asabliva ciapier, kali vajna z Rasijaj praciahvajecca ŭžo treci hod, adznačaje Der Spiegel.
U svaju čarhu, Šolc zajaviŭ, što ŭžo ŭ śniežni Hiermanija pieradaść Ukrainie šostuju sistemu IRIS-T — vielmi efiektyŭny kompleks supraćpavietranaj abarony karotkaha radyusa dziejańnia, a taksama puskavyja ŭstanoŭki dla Patriot — amierykanskaj SPA ź vialikim radyusam dziejańnia. Akramia taho, Ukraina atrymaje samachodnyja zienitnyja ŭstanoŭki Gepard, jakimi źbivajuć drony, i viertaloty Sea King.
Pry hetym niamiecki kancler padkreśliŭ, što Hiermanija nie asłabić dapamohu, nazvaŭšy «niedapuščalnymi» abstreły rasijanami ŭkrainskaj enierhietyčnaj infrastruktury.
Nahadajem, Ołaf Šolc prybyŭ u stalicu Ukrainy ŭ paniadziełak biez papiarednich anonsaŭ. Heta ŭžo druhi vizit Šolca va Ukrainu paśla pačatku poŭnamaštabnaha ŭvarvańnia Rasii ŭ 2022 hodzie. Raniej kancler naviedvaŭ Kijeŭ u červieni 2022 hoda, kali stała jasna, što Ukraina vystajała, vytrymała strašny ŭdar nasupierak usim čakańniam. Ciapierašni vizit adbyŭsia paśla niadaŭniaj razmovy Šolca z Pucinym.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary