Stała viadoma, što za biełarus arhanizoŭvaŭ napad na rasijskaha apazicyjaniera Vołkava ŭ Vilni

Raniej premjer-ministr Polščy Donald Tusk, zajaŭlajučy pra zatrymańnie ŭ jahonaj krainie padazravanych u napadzie na Vołkava, adznačyŭ, što jany «źviazanyja z kołami futbolnych fanataŭ ultras», a taksama što zatrymany hramadzianin Biełarusi, jaki ich naniaŭ. Pavodle źviestak vydańnia The Insider, na hetaha biełarusa vyjšli, vyvučajučy suviazi zatrymanaha za napady ŭ Arhiencinie.

Imia aryštavanaha biełarusa nie nazyvałasia, ale ciapier «Miediazona» vyśvietliła, što jaho zavuć Viktar Paviełka.

Viktaru Paviełku 36 hadoŭ. U 2022 hodzie jaho ŭžo sudzili ŭ Polščy pa spravie ab machlarstvie i admyvańni hrošaj. Adnoj z 17 abvinavačanych tady stała viadomaja ŭ Polščy televiadučaja Marcelina Zavadskaja, jakuju źviazvali z Paviełkam ramantyčnyja stasunki.

Jak raskazvała polskaje vydańnie Polityka, Paviełka — syn aficera KDB Biełarusi, a ŭ Polščy jon stvaryŭ złačynnuju hrupu, jakaja prymušała ludziej da machlarstva. Siarod ich była i televiadučaja Zavadskaja.

U sudzie adzin z padsudnych śćviardžaŭ, što padručnyja biełarusa pastavili na jaho mašynu GPS-majačok, paśla čaho jaho vysačyli i paranili nažom. Inšy padsudny, hramadzianin Ukrainy, charaktaryzavaŭ Paviełku jak čałavieka, jaki pje i pavodzić siabie ahresiŭna, časta pahražajučy fizičnaj raspravaj. Jašče adzin padsudny, były bajec MMA, jaki zajmaŭsia razam z Paviełkam hulniavym biznesam, uspaminaŭ, što toj padsyłaŭ da jaho dadomu ruskamoŭnych vymahalnikaŭ, kab vybić zapazyčanaść.

U vyniku sud u Kališy prysudziŭ Paviełku da 3 hadoŭ i 8 miesiacaŭ źniavoleńnia. Da taho času asudžany ŭžo bolš za dva hady byŭ u SIZA, a tamu praz peŭny čas apynuŭsia na voli.

U prakuratury Polščy «Miediazonie» paviedamili, što pa spravie ab napadach na rasijskich apazicyjanieraŭ biełarusu vystaŭlenyja try abvinavačvańni, siarod ich — arhanizacyja napadu pa palityčnych matyvach. Jon znachodzicca pad aryštam.

Proźvišča Paviełka adnojčy zhadvaje ŭ pierapiscy Anatol Blinoŭ.

«Jość navina — jość kurjer, jaki vozić załatyja maniety i hrošy ź Biełarusi ŭ Šviejcaryju i nazad. Znajomy majho numizmata, — pisaŭ jon 1 śniežnia minułaha hoda. — Bankaŭski kurjer — Paviełka Uładzimir».

Pra kaho mienavita tut idzie havorka, ź pierapiski niezrazumieła (nie vyklučana, što Blinoŭ prosta pierabłytaŭ imia).

Aryštavany Viktar Paviełka, kali vieryć listu Blinova, supracoŭničaje sa śledstvam i daje suprać jaho pakazańni.

• 5
• 0
• 6
• 3
• 1
• 0
• 6
• 0