Ci mohuć biełarusy, jakim Šviecyja admoviła ŭ prytułku, raźličvać na pierahlad rašeńnia? I što budzie z novymi zajavami?
Niahledziačy na zapeŭnivańni šviedskich uładaŭ ab pierahladzie svajoj pazicyi adnosna ŭciekačoŭ ź Biełarusi, biełarusam praciahvajuć admaŭlać u prytułku.
Pra situacyju, u jakoj znachodziacca biełarusy ŭ Šviecyi, raskazvaje šviedskaje vydańnie Omni. Pryvodzim karotki pierakaz.
U Šviecyi razam ź siamjoj znachodzicca Kanstancin Siarohin, jaki supravadžaŭ Siarhieja Cichanoŭskaha ŭ jakaści apieratara. U 2023 hodzie muž i žonka atrymali admovu ŭ prytułku. Jany padali apielacyju i čakajuć rašeńnia Mihracyjnaha suda. U pary dvoje dziaciej dvuch i siami hadoŭ. U Biełarusi im pahražajuć značnyja turemnyja terminy.
Šviedskaje vydańnie pryvodzić ličby — z 2021 pa 2023 hod z 400 biełarusaŭ, jakija źviartalisia pa palityčny prytułak u Šviecyi, stanoŭčyja rašeńni atrymali tolki 12. Jašče 27 hramadzian Biełarusi zmahli atrymać abaronu jak biežancy z Ukrainy, bo pražyvali tam na momant pačatku poŭnamaštabnaj ahresii.
Niadaŭna Mihracyjnaja słužba Šviecyi paviedamiła, što vosieńniu praviadzie analiz spraŭ hramadzian Biełarusi. Na pytańnie vydańnia, ci aznačaje heta, što biełarusy, jakija padali zajaŭki na prytułak, mohuć raźličvać na pierahlad svaich spravaŭ, Mihracyjnaja słužba rastłumačyła, što nie budzie prymać novych rašeńniaŭ pa isnujučych spravach. Pierahlad budzie tolki ŭnutranym, kab atrymać uroki ź minułych rašeńniaŭ.
— My nie budziem adkryvać spravy nanova i nie budziem prymać novych rašeńniaŭ. Heta robicca dla našych ułasnych vysnoŭ i dla acenki pravilnaści našych papiarednich rašeńniaŭ. U karotkaterminovaj pierśpiektyvie heta nie paŭpłyvaje na tych, chto ŭžo atrymaŭ rašeńnie, — cytujucca słovy načalnika adzieła pa pytańniach pravoŭ mihrantaŭ Mihracyjnaj słužby Pera Lovienbierha.
Čynoŭnik patłumačyŭ, što zajaŭniki, jakija atrymali admovu, mohuć padać zajavu ab najaŭnaści pieraškod dla vykanańnia rašeńnia. Heta dazvolić im atrymać paŭtorny razhlad spravy na padstavie novych abstavin. Adnak zajava pavinna być padadziena, pakul čałaviek znachodzicca ŭ Šviecyi.
Ale situacyja na samoj spravie nie palapšajecca. U jakaści prykładu pryvodzicca historyja biełarusa Viktara, jaki padaŭ padobnuju zajavu ŭ mai 2024 hoda, na jakuju atrymaŭ admovu i paŭtornaje pradpisańnie pakinuć krainu. U vieraśni mužčyna padaŭ novuju zajavu.
«U mianie takoje adčuvańnie, byccam ja stukajusia ŭ začynienyja dźviery», — dzielicca Viktar i dadaje, što znachodzicca na stanie emacyjnaha źniasileńnia i strachu, što chutka jaho mohuć departavać u Biełaruś.
Były ministr kultury Rusłan Čarniecki znajšoŭ sabie padpracoŭku9
Kamientary